ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ପଂଚଷଷ୍ଟିତମସ୍ସର୍ଗଃ ।
ତପ୍ୟମାନଂ ତଥା ରାମଂ ସୀତାହରଣକର୍ଶିତମ୍ ।
ଲୋକାନାମଭଵେ ୟୁକ୍ତଂ ସାଂଵର୍ତକମିଵାନଲମ୍ ॥ 1 ॥
ଵୀକ୍ଷମାଣଂ ଧନୁସ୍ସଜ୍ୟଂ ନିଶ୍ଶ୍ଵସଂତଂ ପୁନଃ ପୁନଃ ।
ଦଗ୍ଧୁକାମଂ ଜଗତ୍ସର୍ଵଂ ୟୁଗାଂତେ ଚ ୟଥା ହରମ୍ ॥ 2 ॥
ଅଦୃଷ୍ଟପୂର୍ଵଂ ସଂକ୍ରୁଦ୍ଧଂ ଦୃଷ୍ଟ୍ଵା ରାମଂ ତୁ ଲକ୍ଷ୍ମଣଃ ।
ଅବ୍ରଵୀତ୍ପ୍ରାଂଜଲିର୍ଵାକ୍ୟଂ ମୁଖେନ ପରିଶୁଷ୍ୟତା ॥ 3 ॥
ପୁରା ଭୂତ୍ଵା ମୃଦୁର୍ଦାଂତସ୍ସର୍ଵଭୂତହିତେ ରତଃ ।
ନ କ୍ରୋଧଵଶମାପନ୍ନଃ ପ୍ରକୃତିଂ ହାତୁମର୍ହସି ॥ 4 ॥
ଚଂଦ୍ରେ ଲକ୍ଷ୍ମୀଃ ପ୍ରଭା ସୂର୍ୟେ ଗତିର୍ଵାୟୌ ଭୁଵି କ୍ଷମା ।
ଏତତ୍ତୁ ନିୟତଂ ସର୍ଵଂ ତ୍ଵୟି ଚାନୁତ୍ତମଂ ୟଶଃ ॥ 5 ॥
ଏକସ୍ୟ ନାପରାଧେନ ଲୋକାନ୍ ହଂତୁଂ ତ୍ଵମର୍ହସି ।
ନ ତୁ ଜାନାମି କସ୍ୟାୟଂ ଭଗ୍ନସ୍ସାଂଗ୍ରାମିକୋ ରଥଃ ॥ 6 ॥
କେନ ଵା କସ୍ୟ ଵା ହେତୋସ୍ସାୟୁଧସ୍ସପରିଚ୍ଛଦଃ ।
ଖୁରନେମିକ୍ଷତଶ୍ଚାୟଂ ସିକ୍ତୋ ରୁଧିରବିଂଧୁଭିଃ ॥ 7 ॥
ଦେଶୋ ନିର୍ଵୃତ୍ତସଂଗ୍ରାମସ୍ସୁଘୋରଃ ପାର୍ଥିଵାତ୍ମଜ ।
ଏକସ୍ୟ ତୁ ଵିମର୍ଧୋଽୟଂ ନ ଦ୍ଵୟୋର୍ଵଦତାଂଵର ॥ 8 ॥
ନ ହି ଵୃତ୍ତଂ ହି ପଶ୍ୟାମି ବଲସ୍ୟ ମହତଃ ପଦମ୍ ।
ନୈକସ୍ୟ ତୁ କୃତେ ଲୋକାନ୍ଵିନାଶୟିତୁମର୍ହସି ॥ 9 ॥
ୟୁକ୍ତଦଂଡା ହି ମୃଦଵଃ ପ୍ରଶାଂତା ଵସୁଧାଧିପାଃ ।
ସଦା ତ୍ଵଂ ସର୍ଵଭୂତାନାଂ ଶରଣ୍ୟଃ ପରମା ଗତିଃ ॥ 10 ॥
କୋ ନୁ ଦାରପ୍ରଣାଶଂ ତେ ସାଧୁ ମନ୍ୟେତ ରାଘଵ ।
ସରିତସ୍ସାଗରାଶ୍ଶୈଲା ଦେଵଗଂଧର୍ଵଦାନଵାଃ ॥ 11 ॥
ନାଲଂ ତେ ଵିପ୍ରିୟଂ କର୍ତୁଂ ଦୀକ୍ଷିତସ୍ୟେଵ ସାଧଵଃ ।
ୟେନ ରାଜନ୍ହୃତା ସୀତା ତମନ୍ଵେଷିତୁମର୍ହସି ॥ 12 ॥
ମଦ୍ଵିତୀୟୋ ଧନୁଷ୍ପାଣିସ୍ସହାୟୈଃ ପରମର୍ଷିଭିଃ ।
ସମୁଦ୍ରଂ ଚ ଵିଚେଷ୍ୟାମଃ ପର୍ଵତାଂଶ୍ଚ ଵନାନି ଚ ॥ 13 ॥
ଗୁହାଶ୍ଚ ଵିଵିଧା ଘୋରା ନଦୀ ପଦ୍ମଵନାନି ଚ ।
ଦେଵଗଂଧର୍ଵଲୋକାଂଶ୍ଚ ଵିଚେଷ୍ୟାମସ୍ସମାହିତାଃ ॥ 14 ॥
ୟାଵନ୍ନାଧିଗମିଷ୍ୟାମସ୍ତଵ ଭାର୍ୟାପହାରିଣମ୍ ।
ନ ଚେତ୍ସାମ୍ନା ପ୍ରଦାସ୍ୟଂତି ପତ୍ନୀଂ ତେ ତ୍ରିଦଶେଶ୍ଵରାଃ ॥ 15 ॥
କୋସଲେଂଦ୍ର ତତଃ ପଶ୍ଚାତ୍ପ୍ରାପ୍ତକାଲଂ କରିଷ୍ୟସି ।
ଶୀଲେନ ସାମ୍ନା ଵିନୟେନ ସୀତାଂ ନୟେନ ନ ପ୍ରାପ୍ସ୍ୟସି ଚେନ୍ନରେଂଦ୍ର ।
ତତସ୍ସମୁତ୍ସାଦୟ ହେମପୁଂଖୈ ର୍ମହେଂଦ୍ରଵଜ୍ରପ୍ରତିମୈଶ୍ଶରୌଘୈଃ ॥ 16 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ପଂଚଷଷ୍ଟିତମସ୍ସର୍ଗଃ ॥
