শ্রীমদ্বাল্মীকীয় রামাযণে অরণ্যকাংডম্ ।
অথ পংচষষ্টিতমস্সর্গঃ ।
তপ্যমানং তথা রামং সীতাহরণকর্শিতম্ ।
লোকানামভবে যুক্তং সাংবর্তকমিবানলম্ ॥ 1 ॥
বীক্ষমাণং ধনুস্সজ্য়ং নিশ্শ্বসংতং পুনঃ পুনঃ ।
দগ্ধুকামং জগত্সর্বং যুগাংতে চ যথা হরম্ ॥ 2 ॥
অদৃষ্টপূর্বং সংক্রুদ্ধং দৃষ্ট্বা রামং তু লক্ষ্মণঃ ।
অব্রবীত্প্রাংজলির্বাক্য়ং মুখেন পরিশুষ্যতা ॥ 3 ॥
পুরা ভূত্বা মৃদুর্দাংতস্সর্বভূতহিতে রতঃ ।
ন ক্রোধবশমাপন্নঃ প্রকৃতিং হাতুমর্হসি ॥ 4 ॥
চংদ্রে লক্ষ্মীঃ প্রভা সূর্য়ে গতির্বায়ৌ ভুবি ক্ষমা ।
এতত্তু নিযতং সর্বং ত্বয়ি চানুত্তমং যশঃ ॥ 5 ॥
একস্য় নাপরাধেন লোকান্ হংতুং ত্বমর্হসি ।
ন তু জানামি কস্য়ায়ং ভগ্নস্সাংগ্রামিকো রথঃ ॥ 6 ॥
কেন বা কস্য় বা হেতোস্সায়ুধস্সপরিচ্ছদঃ ।
খুরনেমিক্ষতশ্চায়ং সিক্তো রুধিরবিংধুভিঃ ॥ 7 ॥
দেশো নির্বৃত্তসংগ্রামস্সুঘোরঃ পার্থিবাত্মজ ।
একস্য় তু বিমর্ধোঽয়ং ন দ্বয়োর্বদতাংবর ॥ 8 ॥
ন হি বৃত্তং হি পশ্য়ামি বলস্য় মহতঃ পদম্ ।
নৈকস্য় তু কৃতে লোকান্বিনাশয়িতুমর্হসি ॥ 9 ॥
যুক্তদংডা হি মৃদবঃ প্রশাংতা বসুধাধিপাঃ ।
সদা ত্বং সর্বভূতানাং শরণ্য়ঃ পরমা গতিঃ ॥ 10 ॥
কো নু দারপ্রণাশং তে সাধু মন্য়েত রাঘব ।
সরিতস্সাগরাশ্শৈলা দেবগংধর্বদানবাঃ ॥ 11 ॥
নালং তে বিপ্রিয়ং কর্তুং দীক্ষিতস্য়েব সাধবঃ ।
যেন রাজন্হৃতা সীতা তমন্বেষিতুমর্হসি ॥ 12 ॥
মদ্বিতীয়ো ধনুষ্পাণিস্সহায়ৈঃ পরমর্ষিভিঃ ।
সমুদ্রং চ বিচেষ্য়ামঃ পর্বতাংশ্চ বনানি চ ॥ 13 ॥
গুহাশ্চ বিবিধা ঘোরা নদী পদ্মবনানি চ ।
দেবগংধর্বলোকাংশ্চ বিচেষ্য়ামস্সমাহিতাঃ ॥ 14 ॥
যাবন্নাধিগমিষ্য়ামস্তব ভার্য়াপহারিণম্ ।
ন চেত্সাম্না প্রদাস্য়ংতি পত্নীং তে ত্রিদশেশ্বরাঃ ॥ 15 ॥
কোসলেংদ্র ততঃ পশ্চাত্প্রাপ্তকালং করিষ্যসি ।
শীলেন সাম্না বিনয়েন সীতাং নয়েন ন প্রাপ্স্যসি চেন্নরেংদ্র ।
ততস্সমুত্সাদয় হেমপুংখৈ র্মহেংদ্রবজ্রপ্রতিমৈশ্শরৌঘৈঃ ॥ 16 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে পংচষষ্টিতমস্সর্গঃ ॥
