śrīmadvālmīkīya rāmāyaṇē araṇyakāṇḍam ।
atha pañchaṣaṣṭitamassargaḥ ।
tapyamānaṃ tathā rāmaṃ sītāharaṇakarśitam ।
lōkānāmabhavē yuktaṃ sāṃvartakamivānalam ॥ 1 ॥
vīkṣamāṇaṃ dhanussajyaṃ niśśvasantaṃ punaḥ punaḥ ।
dagdhukāmaṃ jagatsarvaṃ yugāntē cha yathā haram ॥ 2 ॥
adṛṣṭapūrvaṃ saṅkruddhaṃ dṛṣṭvā rāmaṃ tu lakṣmaṇaḥ ।
abravītprāñjalirvākyaṃ mukhēna pariśuṣyatā ॥ 3 ॥
purā bhūtvā mṛdurdāntassarvabhūtahitē rataḥ ।
na krōdhavaśamāpannaḥ prakṛtiṃ hātumarhasi ॥ 4 ॥
chandrē lakṣmīḥ prabhā sūryē gatirvāyau bhuvi kṣamā ।
ētattu niyataṃ sarvaṃ tvayi chānuttamaṃ yaśaḥ ॥ 5 ॥
ēkasya nāparādhēna lōkān hantuṃ tvamarhasi ।
na tu jānāmi kasyāyaṃ bhagnassāṅgrāmikō rathaḥ ॥ 6 ॥
kēna vā kasya vā hētōssāyudhassaparichChadaḥ ।
khuranēmikṣataśchāyaṃ siktō rudhirabindhubhiḥ ॥ 7 ॥
dēśō nirvṛttasaṅgrāmassughōraḥ pārthivātmaja ।
ēkasya tu vimardhō'yaṃ na dvayōrvadatāṃvara ॥ 8 ॥
na hi vṛttaṃ hi paśyāmi balasya mahataḥ padam ।
naikasya tu kṛtē lōkānvināśayitumarhasi ॥ 9 ॥
yuktadaṇḍā hi mṛdavaḥ praśāntā vasudhādhipāḥ ।
sadā tvaṃ sarvabhūtānāṃ śaraṇyaḥ paramā gatiḥ ॥ 10 ॥
kō nu dārapraṇāśaṃ tē sādhu manyēta rāghava ।
saritassāgarāśśailā dēvagandharvadānavāḥ ॥ 11 ॥
nālaṃ tē vipriyaṃ kartuṃ dīkṣitasyēva sādhavaḥ ।
yēna rājanhṛtā sītā tamanvēṣitumarhasi ॥ 12 ॥
madvitīyō dhanuṣpāṇissahāyaiḥ paramarṣibhiḥ ।
samudraṃ cha vichēṣyāmaḥ parvatāṃścha vanāni cha ॥ 13 ॥
guhāścha vividhā ghōrā nadī padmavanāni cha ।
dēvagandharvalōkāṃścha vichēṣyāmassamāhitāḥ ॥ 14 ॥
yāvannādhigamiṣyāmastava bhāryāpahāriṇam ।
na chētsāmnā pradāsyanti patnīṃ tē tridaśēśvarāḥ ॥ 15 ॥
kōsalēndra tataḥ paśchātprāptakālaṃ kariṣyasi ।
śīlēna sāmnā vinayēna sītāṃ nayēna na prāpsyasi chēnnarēndra ।
tatassamutsādaya hēmapuṅkhai rmahēndravajrapratimaiśśaraughaiḥ ॥ 16 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē pañchaṣaṣṭitamassargaḥ ॥
