ශ්රීමද්වාල්මීකීය රාමායණේ අරණ්යකාංඩම් ।
අථ පංචෂෂ්ටිතමස්සර්ගඃ ।
තප්යමානං තථා රාමං සීතාහරණකර්ශිතම් ।
ලෝකානාමභවේ යුක්තං සාංවර්තකමිවානලම් ॥ 1 ॥
වීක්ෂමාණං ධනුස්සජ්යං නිශ්ශ්වසංතං පුනඃ පුනඃ ।
දග්ධුකාමං ජගත්සර්වං යුගාංතේ ච යථා හරම් ॥ 2 ॥
අදෘෂ්ටපූර්වං සංක්රුද්ධං දෘෂ්ට්වා රාමං තු ලක්ෂ්මණඃ ।
අබ්රවීත්ප්රාංජලිර්වාක්යං මුඛේන පරිශුෂ්යතා ॥ 3 ॥
පුරා භූත්වා මෘදුර්දාංතස්සර්වභූතහිතේ රතඃ ।
න ක්රෝධවශමාපන්නඃ ප්රකෘතිං හාතුමර්හසි ॥ 4 ॥
චංද්රේ ලක්ෂ්මීඃ ප්රභා සූර්යේ ගතිර්වායෞ භුවි ක්ෂමා ।
ඒතත්තු නියතං සර්වං ත්වයි චානුත්තමං යශඃ ॥ 5 ॥
ඒකස්ය නාපරාධේන ලෝකාන් හංතුං ත්වමර්හසි ।
න තු ජානාමි කස්යායං භග්නස්සාංග්රාමිකෝ රථඃ ॥ 6 ॥
කේන වා කස්ය වා හේතෝස්සායුධස්සපරිච්ඡදඃ ।
ඛුරනේමික්ෂතශ්චායං සික්තෝ රුධිරබිංධුභිඃ ॥ 7 ॥
දේශෝ නිර්වෘත්තසංග්රාමස්සුඝෝරඃ පාර්ථිවාත්මජ ।
ඒකස්ය තු විමර්ධෝऽයං න ද්වයෝර්වදතාංවර ॥ 8 ॥
න හි වෘත්තං හි පශ්යාමි බලස්ය මහතඃ පදම් ।
නෛකස්ය තු කෘතේ ලෝකාන්විනාශයිතුමර්හසි ॥ 9 ॥
යුක්තදංඩා හි මෘදවඃ ප්රශාංතා වසුධාධිපාඃ ।
සදා ත්වං සර්වභූතානාං ශරණ්යඃ පරමා ගතිඃ ॥ 10 ॥
කෝ නු දාරප්රණාශං තේ සාධු මන්යේත රාඝව ।
සරිතස්සාගරාශ්ශෛලා දේවගංධර්වදානවාඃ ॥ 11 ॥
නාලං තේ විප්රියං කර්තුං දීක්ෂිතස්යේව සාධවඃ ।
යේන රාජන්හෘතා සීතා තමන්වේෂිතුමර්හසි ॥ 12 ॥
මද්විතීයෝ ධනුෂ්පාණිස්සහායෛඃ පරමර්ෂිභිඃ ।
සමුද්රං ච විචේෂ්යාමඃ පර්වතාංශ්ච වනානි ච ॥ 13 ॥
ගුහාශ්ච විවිධා ඝෝරා නදී පද්මවනානි ච ।
දේවගංධර්වලෝකාංශ්ච විචේෂ්යාමස්සමාහිතාඃ ॥ 14 ॥
යාවන්නාධිගමිෂ්යාමස්තව භාර්යාපහාරිණම් ।
න චේත්සාම්නා ප්රදාස්යංති පත්නීං තේ ත්රිදශේශ්වරාඃ ॥ 15 ॥
කෝසලේංද්ර තතඃ පශ්චාත්ප්රාප්තකාලං කරිෂ්යසි ।
ශීලේන සාම්නා විනයේන සීතාං නයේන න ප්රාප්ස්යසි චේන්නරේංද්ර ।
තතස්සමුත්සාදය හේමපුංඛෛ ර්මහේංද්රවජ්රප්රතිමෛශ්ශරෞඝෛඃ ॥ 16 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ පංචෂෂ්ටිතමස්සර්ගඃ ॥
