શ્રીમદ્વાલ્મીકીય રામાયણે અરણ્યકાંડમ્ ।
અથ પંચષષ્ટિતમસ્સર્ગઃ ।
તપ્યમાનં તથા રામં સીતાહરણકર્શિતમ્ ।
લોકાનામભવે યુક્તં સાંવર્તકમિવાનલમ્ ॥ 1 ॥
વીક્ષમાણં ધનુસ્સજ્યં નિશ્શ્વસંતં પુનઃ પુનઃ ।
દગ્ધુકામં જગત્સર્વં યુગાંતે ચ યથા હરમ્ ॥ 2 ॥
અદૃષ્ટપૂર્વં સંક્રુદ્ધં દૃષ્ટ્વા રામં તુ લક્ષ્મણઃ ।
અબ્રવીત્પ્રાંજલિર્વાક્યં મુખેન પરિશુષ્યતા ॥ 3 ॥
પુરા ભૂત્વા મૃદુર્દાંતસ્સર્વભૂતહિતે રતઃ ।
ન ક્રોધવશમાપન્નઃ પ્રકૃતિં હાતુમર્હસિ ॥ 4 ॥
ચંદ્રે લક્ષ્મીઃ પ્રભા સૂર્યે ગતિર્વાયૌ ભુવિ ક્ષમા ।
એતત્તુ નિયતં સર્વં ત્વયિ ચાનુત્તમં યશઃ ॥ 5 ॥
એકસ્ય નાપરાધેન લોકાન્ હંતું ત્વમર્હસિ ।
ન તુ જાનામિ કસ્યાયં ભગ્નસ્સાંગ્રામિકો રથઃ ॥ 6 ॥
કેન વા કસ્ય વા હેતોસ્સાયુધસ્સપરિચ્છદઃ ।
ખુરનેમિક્ષતશ્ચાયં સિક્તો રુધિરબિંધુભિઃ ॥ 7 ॥
દેશો નિર્વૃત્તસંગ્રામસ્સુઘોરઃ પાર્થિવાત્મજ ।
એકસ્ય તુ વિમર્ધોઽયં ન દ્વયોર્વદતાંવર ॥ 8 ॥
ન હિ વૃત્તં હિ પશ્યામિ બલસ્ય મહતઃ પદમ્ ।
નૈકસ્ય તુ કૃતે લોકાન્વિનાશયિતુમર્હસિ ॥ 9 ॥
યુક્તદંડા હિ મૃદવઃ પ્રશાંતા વસુધાધિપાઃ ।
સદા ત્વં સર્વભૂતાનાં શરણ્યઃ પરમા ગતિઃ ॥ 10 ॥
કો નુ દારપ્રણાશં તે સાધુ મન્યેત રાઘવ ।
સરિતસ્સાગરાશ્શૈલા દેવગંધર્વદાનવાઃ ॥ 11 ॥
નાલં તે વિપ્રિયં કર્તું દીક્ષિતસ્યેવ સાધવઃ ।
યેન રાજન્હૃતા સીતા તમન્વેષિતુમર્હસિ ॥ 12 ॥
મદ્વિતીયો ધનુષ્પાણિસ્સહાયૈઃ પરમર્ષિભિઃ ।
સમુદ્રં ચ વિચેષ્યામઃ પર્વતાંશ્ચ વનાનિ ચ ॥ 13 ॥
ગુહાશ્ચ વિવિધા ઘોરા નદી પદ્મવનાનિ ચ ।
દેવગંધર્વલોકાંશ્ચ વિચેષ્યામસ્સમાહિતાઃ ॥ 14 ॥
યાવન્નાધિગમિષ્યામસ્તવ ભાર્યાપહારિણમ્ ।
ન ચેત્સામ્ના પ્રદાસ્યંતિ પત્નીં તે ત્રિદશેશ્વરાઃ ॥ 15 ॥
કોસલેંદ્ર તતઃ પશ્ચાત્પ્રાપ્તકાલં કરિષ્યસિ ।
શીલેન સામ્ના વિનયેન સીતાં નયેન ન પ્રાપ્સ્યસિ ચેન્નરેંદ્ર ।
તતસ્સમુત્સાદય હેમપુંખૈ ર્મહેંદ્રવજ્રપ્રતિમૈશ્શરૌઘૈઃ ॥ 16 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અરણ્યકાંડે પંચષષ્ટિતમસ્સર્ગઃ ॥
