ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ଅଷ୍ଟାଦଶସ୍ସର୍ଗଃ ।
ଇତ୍ୟୁକ୍ତଃ ପ୍ରଶ୍ରିତଂ ଵାକ୍ୟଂ ଧର୍ମାର୍ଥସହିତଂ ହିତମ୍ ।
ପରୁଷଂ ଵାଲିନା ରାମୋ ନିହତେନ ଵିଚେତସା ॥ 1 ॥
ତଂ ନିଷ୍ପ୍ରଭମିଵାଦିତ୍ୟଂ ମୁକ୍ତତୋୟମିଵାଂବୁଦମ୍ ।
ଉକ୍ତଵାକ୍ୟଂ ହରିଶ୍ରେଷ୍ଠମୁପଶାଂତମିଵାନଲମ୍ ॥ 2 ॥
ଧର୍ମାର୍ଥଗୁଣସଂପନ୍ନଂ ହରୀଶ୍ଵରମନୁତ୍ତମମ୍ ।
ଅଧିକ୍ଷିପ୍ତସ୍ତଦା ରାମଃ ପଶ୍ଚାଦ୍ଵାଲିନମବ୍ରଵୀତ୍ ॥ 3 ॥
ଧର୍ମମର୍ଥଂ ଚ କାମଂ ଚ ସମୟଂ ଚାପି ଲୌକିକମ୍ ।
ଅଵିଜ୍ଞାୟ କଥଂ ବାଲ୍ୟାନ୍ମାମିହାଦ୍ୟ ଵିଗର୍ହସେ ॥ 4 ॥
ଅପୃଷ୍ଟ୍ଵା ବୁଦ୍ଧିସଂପନ୍ନାନ୍ଵୃଦ୍ଧାନାଚାର୍ୟସମ୍ମତାନ୍ ।
ସୌମ୍ୟ ଵାନରଚାପଲ୍ୟାତ୍କିଂ ମାଵକ୍ତୁମିହେଚ୍ଛସି ॥ 5 ॥
ଇକ୍ଷ୍ଵାକୂଣାମିୟଂ ଭୂମିସ୍ସଶୈଲଵନକାନନା ।
ମୃଗପକ୍ଷିମନୁଷ୍ୟାଣାଂ ନିଗ୍ରହପ୍ରଗ୍ରହାଵପି ॥ 6 ॥
ତାଂ ପାଲୟତି ଧର୍ମାତ୍ମା ଭରତସ୍ସତ୍ୟଵାଗୃଜୁଃ ।
ଧର୍ମକାମାର୍ଥତତ୍ତ୍ଵଜ୍ଞୋ ନିଗ୍ରହାନୁଗ୍ରହେ ରତଃ ॥ 7 ॥
ନୟଶ୍ଚ ଵିନୟଶ୍ଚୋଭୌ ୟସ୍ମିନ୍ସତ୍ୟଂ ଚ ସୁସ୍ଥିତମ୍ ।
ଵିକ୍ରମଶ୍ଚ ୟଥା ଦୃଷ୍ଟସ୍ସ ରାଜା ଦେଶକାଲଵିତ୍ ॥ 8 ॥
ତସ୍ୟ ଧର୍ମକୃତାଦେଶା ଵୟମନ୍ୟେ ଚ ପାର୍ଥିଵାଃ ।
ଚରାମୋ ଵସୁଧାଂ କୃତ୍ସ୍ନାଂ ଧର୍ମସଂତାନମିଚ୍ଛଵଃ ॥ 9 ॥
ତସ୍ମିନ୍ନୃପତିଶାର୍ଦୂଲେ ଭରତେ ଧର୍ମଵତ୍ସଲେ ।
ପାଲୟତ୍ୟଖିଲାଂ ଭୂମିଂ କଶ୍ଚରେଦ୍ଧର୍ମନିଗ୍ରହମ୍ ॥ 10 ॥
ତେ ଵୟଂ ଧର୍ମଵିଭ୍ରଷ୍ଟଂ ସ୍ଵଧର୍ମେ ପରମେ ସ୍ଥିତାଃ ।
ଭରତାଜ୍ଞାଂ ପୁରସ୍କୃତ୍ୟ ନିଗୃହ୍ଣୀମୋ ୟଥାଵିଧି ॥ 11 ॥
ତ୍ଵଂ ତୁ ସଂକ୍ଲିଷ୍ଟଧର୍ମା ଚ କର୍ମଣା ଚ ଵିଗର୍ହିତଃ ।
କାମତଂତ୍ରପ୍ରଧାନଶ୍ଚ ନ ସ୍ଥିତୋ ରାଜଵର୍ତ୍ମନି ॥ 12 ॥
ଜ୍ୟେଷ୍ଠୋ ଭ୍ରାତା ପିତା ଚୈଵ ୟଶ୍ଚ ଵିଦ୍ୟାଂ ପ୍ରୟଚ୍ଛତି ।
ତ୍ରୟସ୍ତେ ପିତରୋ ଜ୍ଞେୟା ଧର୍ମ୍ୟେ ଚ ପଥି ଵର୍ତିନଃ ॥ 13 ॥
ୟଵୀୟାନାତ୍ମନଃ ପୁତ୍ରଶଶିଷ୍ୟଶ୍ଚାପି ଗୁଣୋଦିତଃ ।
ପୁତ୍ରଵତ୍ତେ ତ୍ରୟଶ୍ଚିଂତ୍ୟା ଧର୍ମଶ୍ଚେଦତ୍ରକାରଣମ୍ ॥ 14 ॥
ସୂକ୍ଷ୍ମଃ ପରମଦୁରଜେୟସ୍ସତାଂ ଧର୍ମଃ ପ୍ଲଵଂଗମ ।
ହୃଦିସ୍ଥସ୍ସର୍ଵଭୂତାନାମାତ୍ମା ଵେଦ ଶୁଭାଶୁଭମ୍ ॥ 15 ॥
ଚପଲଶ୍ଚପଲୈସ୍ସାର୍ଧଂ ଵାନରୈରକୃତାତ୍ମଭିଃ ।
ଜାତ୍ୟଂଧ ଇଵ ଜାତ୍ୟଂଧୈର୍ମଂତ୍ରୟନ୍ ପ୍ରେକ୍ଷସେ ନୁ କିମ୍ ॥ 16 ॥
ଅହଂ ତୁ ଵ୍ୟକ୍ତତାମସ୍ୟ ଵଚନସ୍ୟ ବ୍ରଵୀମି ତେ ।
ନ ହି ମାଂ କେଵଲଂ ରୋଷାତ୍ତ୍ଵଂ ଵିଗର୍ହିତୁମର୍ହସି ॥ 17 ॥
ତଦେତତ୍କାରଣଂ ପଶ୍ୟ ୟଦର୍ଥଂ ତ୍ଵଂ ମୟା ହତଃ ।
ଭ୍ରାତୁର୍ଵର୍ତସି ଭାର୍ୟାୟାଂ ତ୍ୟକ୍ତ୍ଵା ଧର୍ମଂ ସନାତନମ୍ ॥ 18 ॥
ଅସ୍ୟ ତ୍ଵଂ ଧରମାଣସ୍ୟ ସୁଗ୍ରୀଵସ୍ୟ ମହାତ୍ମନଃ ।
ରୁମାୟାଂ ଵର୍ତସେ କାମାତ୍ସ୍ନୁଷାୟାଂ ପାପକର୍ମକୃତ୍ ॥ 19 ॥
ତଦ୍ଵ୍ୟତୀତସ୍ୟ ତେ ଧର୍ମାତ୍କାମଵୃତ୍ତସ୍ୟ ଵାନର ।
ଭ୍ରାତୃଭାର୍ୟାଵମର୍ଶେଽସ୍ମିଂଦଂଡୋଽୟଂ ପ୍ରତିପାଦିତଃ ॥ 20 ॥
ନ ହି ଧର୍ମଵିରୁଦ୍ଧସ୍ୟ ଲୋକଵୃତ୍ତାଦପେୟୁଷଃ ।
ଦଂଡାଦନ୍ୟତ୍ର ପଶ୍ୟାମି ନିଗ୍ରହଂ ହରିୟୂଥପ ॥ 21 ॥
ନ ହି ତେ ମର୍ଷୟେ ପାପଂ କ୍ଷତ୍ରିୟୋଽହଂ କୁଲୋଦ୍ଭଵଃ ।
ଔରସୀଂ ଭଗିନୀଂ ଵାପି ଭାର୍ୟାଂ ଵାପ୍ୟନୁଜସ୍ୟ ୟଃ ॥ 22 ॥
ପ୍ରଚରେତ ନରଃ କାମାତ୍ତସ୍ୟ ଦଂଡୋ ଵଧଃ ସ୍ମୃତଃ ।
ଭରତସ୍ତୁ ମହୀପାଲୋ ଵୟଂ ତ୍ଵାଦେଶଵର୍ତିନଃ ॥ 23 ॥
ତ୍ଵଂ ତୁ ଧର୍ମାଦତିକ୍ରାଂତଃ କଥଂ ଶକ୍ୟଂ ଉପେକ୍ଷିତୁମ୍ ।
ଗୁରୂର୍ଧର୍ମଵ୍ୟତିକ୍ରାଂତଂ ପ୍ରାଜ୍ଞୋ ଧର୍ମେଣ ପାଲୟନ୍ ॥ 24 ॥
ଭରତଃ କାମଵୃତ୍ତାନାଂ ନିଗ୍ରହେ ପର୍ୟଵସ୍ଥିତଃ ।
ଵୟଂ ତୁ ଭରତାଦେଶ ଵିଧିଂ କୃତ୍ଵା ହରୀଶ୍ଵର ।
ତ୍ଵଦ୍ଵିଧାନ୍ଭିନ୍ନମର୍ୟାଦାନ୍ନିୟଂତୁପର୍ୟଵସ୍ଥିତାଃ ॥ 25 ॥
ସୁଗ୍ରୀଵେଣ ଚ ମେ ସଖ୍ୟଂ ଲକ୍ଷ୍ମଣେନ ୟଥା ତଥା ।
ଦାରରାଜ୍ୟନିମିତ୍ତଂ ଚ ନିଃଶ୍ରେୟସି ରତ ସ୍ସ ମେ ॥ 26 ॥
ପ୍ରତିଜ୍ଞା ଚ ମୟା ଦତ୍ତା ତଦା ଵାନରସନ୍ନିଧୌ ।
ପ୍ରତିଜ୍ଞା ଚ କଥଂ ଶକ୍ୟା ମଦ୍ଵିଧେନାନଵେକ୍ଷିତୁମ୍ ॥ 27 ॥
ତଦେଭିଃ କାରଣୈସ୍ସର୍ଵୈର୍ମହଦ୍ଭିର୍ଧର୍ମସଂହିତୈଃ ॥ 28 ॥
ଶାସନଂ ତପ ୟଦ୍ୟୁକ୍ତଂ ତଦ୍ଭଵାନନୁମନ୍ୟତାମ୍ ।
ସର୍ଵଥା ଧର୍ମ ଇତ୍ୟେଵ ଦ୍ରଷ୍ଟଵ୍ୟସ୍ତଵ ନିଗ୍ରହଃ ॥ 29 ॥
ଵୟସ୍ୟସ୍ୟୋପକର୍ତଵ୍ୟଂ ଧର୍ମମେଵାନୁପଶ୍ୟତଃ ।
ଶକ୍ୟଂ ତ୍ଵୟାଽପି ତତ୍କାର୍ୟଂ ଧର୍ମମେଵାନୁପଶ୍ୟତା ॥ 30 ॥
ଶ୍ରୂୟତେ ମନୁନା ଗୀତୌ ଶ୍ଲୋକୌ ଚାରିତ୍ରଵତ୍ସଲୌ ।
ଗୃହୀତୌ ଧର୍ମକୁଶଲୈସ୍ତତ୍ତଥା ଚରିତଂ ହରେ ॥ 31 ॥
ରାଜଭିର୍ଧୃତଦଂଡାସ୍ତୁ କୃତ୍ଵା ପାପାନି ମାନଵାଃ ।
ନିର୍ମଲାସ୍ସ୍ଵର୍ଗମାୟାଂତି ସଂତସ୍ସୁକୃତିନୋ ୟଥା ॥ 32 ॥
ଶାସନାଦ୍ଵାଽପିମୋକ୍ଷାଦ୍ଵା ସ୍ତେନଃ ସ୍ତେୟାଦ୍ଵିମୁଚ୍ୟତେ ।
ରାଜାତ୍ଵଶାସନ୍ପାପସ୍ୟ ତଦଵାପ୍ନୋତି କିଲ୍ବିଷମ୍ ॥ 33 ॥
ଆର୍ୟେଣ ମମ ମାଂଧାତ୍ରା ଵ୍ୟସନଂ ଘୋରମୀପ୍ସିତମ୍ ।
ଶ୍ରମଣେନ କୃତେ ପାପେ ୟଥା ପାପଂ କୃତଂ ତ୍ଵୟା ॥ 34 ॥
ଅନ୍ୟୈରପି କୃତଂ ପାପଂ ପ୍ରମତ୍ତୈର୍ଵସୁଧାଧିପୈଃ ।
ପ୍ରାୟଶ୍ଚିତ୍ତଂ ଚ କୁର୍ଵଂତି ତେନ ତଚ୍ଛାମ୍ୟତେ ରଜଃ ॥ 35 ॥
ତଦଲଂ ପରିତାପେନ ଧର୍ମତଃ ପରିକଲ୍ପିତଃ ।
ଵଧୋ ଵାନରଶାର୍ଦୂଲ ନ ଵୟଂ ସ୍ଵଵଶେ ସ୍ଥିତାଃ ॥ 36 ॥
ଶୃଣୁ ଚାପ୍ୟପରଂ ଭୂୟଃ କାରଣଂ ହରିପୁଂଗଵ ।
ୟଚ୍ଛ୍ରୁତ୍ଵା ହେତୁମଦ୍ଵୀର ନ ମନ୍ୟୁଂ କର୍ତୁମର୍ହସି ॥ 37 ॥
ନ ମେ ତତ୍ର ମନସ୍ତାପୋ ନ ମନ୍ୟୁର୍ହରିପୁଂଗଵ ।
ଵାଗୁରାଭିଶ୍ଚ ପାଶୈଶ୍ଚ କୂଟୈଶ୍ଚ ଵିଵିଧୈର୍ନରାଃ ॥ 38 ॥
ପ୍ରତିଚ୍ଛନ୍ନାଶ୍ଚ ଦୃଶ୍ୟାଶ୍ଚ ଗୃହ୍ଣଂତି ସୁବହୂନ୍ମୃଗାନ୍ ।
ପ୍ରଧାଵିତାନ୍ଵା ଵିତ୍ରସ୍ତାନ୍ଵିସ୍ରବ୍ଧାଂଶ୍ଚାପି ନିଷ୍ଠିତାନ୍ ॥ 39 ॥
ପ୍ରମତ୍ତାନପ୍ରମତ୍ତାନ୍ଵା ନରା ମାଂସାର୍ଥିନୋ ଭୃଶମ୍ ।
ଵିଧ୍ୟଂତି ଵିମୁଖାଂଶ୍ଚାପି ନ ଚ ଦୋଷୋଽତ୍ର ଵିଦ୍ୟତେ ॥ 40 ॥
ୟାଂତି ରାଜର୍ଷୟଶ୍ଚାତ୍ର ମୃଗୟାଂ ଧର୍ମକୋଵିଦାଃ ।
ତସ୍ମାତ୍ତ୍ଵଂ ନିହତୋ ୟୁଦ୍ଧେ ମୟା ବାଣେନ ଵାନର ॥ 41 ॥
ଅୟୁଧ୍ୟନ୍ପ୍ରତିୟୁଧ୍ୟନ୍ଵା ୟସ୍ମାଚ୍ଛାଖାମୃଗୋ ହ୍ୟସି ।
ଦୁର୍ଲଭସ୍ୟ ଚ ଧର୍ମସ୍ୟ ଜୀଵିତସ୍ୟ ଶୁଭସ୍ୟ ଚ ॥ 42 ॥
ରାଜାନୋ ଵାନରଶ୍ରେଷ୍ଠ ପ୍ରଦାତାରୋ ନ ସଂଶୟଃ ।
ତାନ୍ନ ହିଂସ୍ୟାନ୍ନ ଚାକ୍ରୋଶେନ୍ନାକ୍ଷିପେନ୍ନାପ୍ରିୟଂ ଵଦେତ୍ ॥ 43 ॥
ଦେଵା ମାନୁଷରୂପେଣ ଚରଂତ୍ୟେତେ ମହୀତଲେ ।
ତ୍ଵଂ ତୁ ଧର୍ମମଵିଜ୍ଞାୟ କେଵଲଂ ରୋଷମାସ୍ଥିତଃ ॥ 44 ॥
ପ୍ରଦୂଷୟସି ମାଂ ଧର୍ମେ ପିତୃପୈତାମହେ ସ୍ଥିତମ୍ ।
ଏଵମୁକ୍ତସ୍ତୁ ରାମେଣ ଵାଲୀ ପ୍ରଵ୍ୟଥିତୋ ଭୃଶମ୍ ॥ 45 ॥
ନ ଦୋଷଂ ରାଘଵେ ଦଧ୍ୟୌ ଧର୍ମେଽଧିଗତନିଶ୍ଚୟଃ ।
ପ୍ରତ୍ୟୁଵାଚ ତତୋ ରାମଂ ପ୍ରାଂଜଲିର୍ଵାନରେଶ୍ଵରଃ ॥ 46 ॥
ୟତ୍ତ୍ଵମାତ୍ଥ ନରଶ୍ରେଷ୍ଠ ତଦେଵଂ ନାତ୍ର ସଂଶୟଃ ।
ପ୍ରତିଵକ୍ତୁଂ ପ୍ରକୃଷ୍ଟେ ହି ନାପକୃଷ୍ଟସ୍ତୁ ଶକ୍ନୁୟାତ୍ ॥ 47 ॥
ୟଦୟୁକ୍ତଂ ମୟା ପୂର୍ଵଂ ପ୍ରମାଦାଦ୍ଵାକ୍ୟମପ୍ରିୟମ୍ ।
ତତ୍ରାପି ଖଲୁ ମେ ଦୋଷଂ କର୍ତୁଂ ନାର୍ହସି ରାଘଵ ।
ତଦୟୁକ୍ତଂ ମୟା ପୂର୍ଵଂ ପ୍ରମାଦାଦୁକ୍ତମପ୍ରିୟମ୍ ।
ତତ୍ରାପି ଖଲୁ ମେ ଦୋଷଂ କର୍ତୁଂ ନାର୍ହସି ରାଘଵ ॥ 48 ॥
ତ୍ଵଂ ହି ଦୃଷ୍ଟାର୍ଥତତ୍ତ୍ଵଜ୍ଞଃ ପ୍ରଜାନାଂ ଚ ହିତେ ରତଃ ।
କାର୍ୟକାରଣସିଦ୍ଧୌ ଚ ପ୍ରସନ୍ନା ବୁଦ୍ଧିରଵ୍ୟୟା ॥ 49 ॥
ମାମପ୍ୟଗତଧର୍ମାଣଂ ଵ୍ୟତିକ୍ରାଂତପୁରସ୍କୃତମ୍ ।
ଧର୍ମସଂହିତୟା ଵାଚା ଧର୍ମଜ୍ଞ ପରିପାଲୟ ॥ 50 ॥
ନ ତ୍ଵାତ୍ମାନମହଂ ଶୋଚେ ନ ତାରାଂ ନ ଚ ବାଂଧଵାନ୍ ।
ୟଥା ପୁତ୍ରଂ ଗୁଣଜ୍ୟେଷ୍ଠମଂଗଦଂ କନକାଂଗଦମ୍ ॥ 51 ॥
ସ ମମାଦର୍ଶନାଦ୍ଦୀନୋ ବାଲ୍ୟାତ୍ପ୍ରଭୃତି ଲାଲିତଃ ।
ତଟାକ ଇଵ ପୀତାଂବୁରୁପଶୋଷଂ ଗମିଷ୍ୟତି ॥ 52 ॥
ବାଲଶ୍ଚାକୃତବୁଦ୍ଧିଶ୍ଚ ଏକପୁତ୍ରଶ୍ଚ ମେ ପ୍ରିୟଃ ।
ତାରେୟୋ ରାମ ଭଵତା ରକ୍ଷଣୀୟୋ ମହାବଲଃ ॥ 53 ॥
ସୁଗ୍ରୀଵେ ଚାଂଗଦେ ଚୈଵ ଵିଧତ୍ସ୍ଵ ମତିମୁତ୍ତମାମ୍ ।
ତ୍ଵଂ ହି ଶାସ୍ତା ଚ ଗୋପ୍ତା ଚ କାର୍ୟାକାର୍ୟଵିଧୌ ସ୍ଥିତଃ ॥ 54 ॥
ୟା ତେ ନରପତେ ଵୃତ୍ତିର୍ଭରତେ ଲକ୍ଷ୍ମଣେ ଚ ୟା ।
ସୁଗ୍ରୀଵେ ଚାଂଗଦେ ରାଜଂସ୍ତାଂ ତ୍ଵମାଧାତୁମିହାସି ॥ 55 ॥
ମଦ୍ଦୋଷକୃତଦୋଷାଂ ତାଂ ୟଥା ତାରାଂ ତପସ୍ଵିନୀମ୍ ।
ସୁଗ୍ରୀଵୋ ନାଵମନ୍ୟେତ ତଥାଽଵସ୍ଥାତୁମର୍ହସି ॥ 56 ॥
ତ୍ଵୟା ହ୍ୟନୁଗୃହୀତେନ ରାଜ୍ୟଂ ଶକ୍ୟମୁପାସିତୁମ୍ ॥ 57 ॥
ତ୍ଵଦ୍ଵଶେ ଵର୍ତମାନେନ ତଵ ଚିତ୍ତାନୁଵର୍ତିନା ।
ଶକ୍ୟଂ ଦିଵଂ ଚାର୍ଜୟିତୁଂ ଵସୁଧାଂ ଚାପି ଶାସିତୁମ୍ ॥ 58 ॥
ତ୍ଵତ୍ତୋଽହଂ ଵଧମାକାଂକ୍ଷନ୍ଵାର୍ୟମାଣୋଽପି ତାରୟା ।
ସୁଗ୍ରୀଵେଣ ସହ ଭ୍ରାତ୍ରା ଦ୍ଵଂଦ୍ଵୟୁଦ୍ଧମୁପାଗତଃ ॥ 59 ॥
ଇତ୍ୟୁକ୍ତ୍ଵା ସନ୍ନତୋ ରାମଂ ଵିରରାମ ହରୀଶ୍ଵରଃ ।
ସ ତମାଶ୍ଵାସୟଦ୍ରାମୋ ଵାଲିନଂ ଵ୍ୟକ୍ତଦର୍ଶନମ୍ ॥ 60 ॥
ସାମସଂପନ୍ନୟା ଵାଚା ଧର୍ମତତ୍ତ୍ଵାର୍ଥୟୁକ୍ତୟା ।
ନ ସଂତାପସ୍ତ୍ଵୟା କାର୍ୟ ଏତଦର୍ଥଂ ପ୍ଲଵଂଗମ ॥ 61 ॥
ନ ଵୟଂ ଭଵତା ଚିଂତ୍ୟା ନାପ୍ୟାତ୍ମା ହରିସତ୍ତମ ।
ଵୟଂ ଭଵଦ୍ଵିଶେଷେଣ ଧର୍ମତଃ କୃତନିଶ୍ଚୟାଃ ॥ 62 ॥
ଦଂଡ୍ୟେ ୟଃ ପାତୟେଦ୍ଦଂଡଂ ଦଂଡ୍ୟୋ ୟଶ୍ଚାପି ଦଂଡ୍ୟତେ ।
କାର୍ୟକାରଣସିଦ୍ଧାର୍ଥା ଵୁଭୌ ତୌ ନାଵସୀଦତଃ ॥ 63 ॥
ତଦ୍ଭଵାଂଦଂଡସଂୟୋଗାଦସ୍ମାଦ୍ଵିଗତକଲ୍ମଷଃ ।
ଗତସ୍ସ୍ଵାଂ ପ୍ରକୃତିଂ ଧର୍ମ୍ୟଂ ଧର୍ମଦୃଷ୍ଟେନ ଵର୍ତ୍ମନା ॥ 64 ॥
ତ୍ୟଜ ଶୋକଂ ଚ ମୋହଂ ଚ ଭୟଂ ଚ ହୃଦୟେ ସ୍ଥିତମ୍ ।
ତ୍ଵୟା ଵିଧାନଂ ହର୍ୟଗ୍ର୍ୟ ନ ଶକ୍ୟମତିଵର୍ତିତୁମ୍ ॥ 65 ॥
ୟଥା ତ୍ଵୟ୍ୟଂଗଦୋ ନିତ୍ୟଂ ଵର୍ତତେ ଵାନରେଶ୍ଵର ।
ତଥା ଵର୍ତେତ ସୁଗ୍ରୀଵେ ମୟି ଚାପି ନ ସଂଶୟଃ ॥ 66 ॥
ସ ତସ୍ୟ ଵାକ୍ୟଂ ମଧୁରଂ ମହାତ୍ମନ ସ୍ସମାହିତଂ ଧର୍ମପଥାନୁଵର୍ତିନଃ ।
ନିଶମ୍ୟ ରାମସ୍ୟ ରଣାଵମର୍ଦିନୋ ଵଚସ୍ସୁୟୁକ୍ତଂ ନିଜଗାଦ ଵାନରଃ ॥ 67 ॥
ଶରାଭିତପ୍ତେନ ଵିଚେତସା ମୟା ପ୍ରଦୂଷିତସ୍ତ୍ଵଂ ୟଦଜାନତା ପ୍ରଭୋ ।
ଇଦଂ ମହେଂଦ୍ରୋପମ ଭୀମଵିକ୍ରମ ପ୍ରସାଦିତସ୍ତ୍ଵଂ କ୍ଷମ ମେ ନରେଶ୍ଵର ॥ 68 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ଅଷ୍ଟାଦଶସ୍ସର୍ଗଃ ॥
