ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ଅଷ୍ଟାଵିଂଶସ୍ସର୍ଗଃ ।
ସ ତଦା ଵାଲିନଂ ହତ୍ଵା ସୁଗ୍ରୀଵମଭିଷିଚ୍ୟ ଚ ।
ଵସନ୍ମାଲ୍ୟଵତଃ ପୃଷ୍ଠେ ରାମୋ ଲକ୍ଷ୍ମଣମବ୍ରଵୀତ୍ ॥ 1 ॥
ଅୟଂ ସ କାଲସ୍ସଂପ୍ରାପ୍ତସ୍ସମୟୋଽଦ୍ୟ ଜଲାଗମଃ ।
ସଂପଶ୍ୟ ତ୍ଵଂ ନଭୋ ମେଘୈସ୍ସଂଵୃତଂ ଗିରିସନ୍ନିଭୈଃ ॥ 2 ॥
ନଵମାସଧୃତଂ ଗର୍ଭଂ ଭାସ୍କରସ୍ୟ ଗଭସ୍ତିଭିଃ ।
ପୀତ୍ଵା ରସଂ ସମୁଦ୍ରାଣାଂ ଦ୍ୟୌଃ ପ୍ରସୂତେ ରସାୟନମ୍ ॥ 3 ॥
ଶକ୍ୟମଂବରମାରୁହ୍ୟ ମେଘସୋପାନପଂକ୍ତିଭିଃ ।
କୁଟଜାର୍ଜୁନମାଲାଭିରଲଂକର୍ତୁଂ ଦିଵାକରମ୍ ॥ 4 ॥
ସଂଧ୍ୟାରାଗୋତ୍ଥିତୈସ୍ତାମ୍ରୈରଂତେଷ୍ଵଧିକ ପାଂଡରୈଃ ।
ସ୍ନିଗ୍ଧୈରଭ୍ରପଟଚ୍ଛେଦୈର୍ବଦ୍ଧଵ୍ରଣମିଵାଂବରମ୍ ॥ 5 ॥
ମଂଦମାରୁତ ନିଶ୍ଵାସଂ ସଂଧ୍ୟାଚଂଦନରଂଜିତମ୍ ।
ଆପାଂଡୁଜଲଦଂ ଭାତି କାମାତୁରମିଵାଂବରମ୍ ॥ 6 ॥
ଏଷା ଘର୍ମପରିକ୍ଲିଷ୍ଟା ନଵଵାରିପରିପ୍ଲୁତା ।
ସୀତେଵ ଶୋକସଂତପ୍ତା ମହୀ ବାଷ୍ପଂ ଵିମୁଂଚତି ॥ 7 ॥
ମେଘୋଦରଵିନିର୍ମୁକ୍ତାଃ କହ୍ଲାରସୁଖଶୀତଲାଃ ।
ଶକ୍ୟମଂଜଲିଭିଃ ପାତୁଂ ଵାତାଃ କେତକିଗଂଧିନଃ ॥ 8 ॥
ଏଷ ଫୁଲ୍ଲାର୍ଜୁନଶ୍ଶୈଲଃ କେତକୈରଧିଵାସିତଃ ।
ସୁଗ୍ରୀଵ ଇଵ ଶାଂତାରିର୍ଧାରାଭିରଭିଷିଚ୍ୟତେ ॥ 9 ॥
ମେଘକୃଷ୍ଣାଜିନଧରାଃ ଧାରାୟଜ୍ଞୋପଵୀତିନଃ ।
ମାରୁତାପୂରିତଗୁହାଃ ପ୍ରାଧୀତା ଇଵ ପର୍ଵତାଃ ॥ 10 ॥
କଶାଭିରିଵ ହୈମୀଭିର୍ଵିଦ୍ୟୁଦ୍ଭିରିଵତାଡିତମ୍ ।
ଅଂତସ୍ତ୍ସତନିର୍ଘୋଷଂ ସଵେଦନମିଵାଂବରମ୍ ॥ 11 ॥
ନୀଲମେଘାଶ୍ରିତା ଵିଦ୍ୟୁତ୍ସ୍ଫୁରଂତୀ ପ୍ରତିଭାତି ମା ।
ସ୍ଫୁରଂତୀ ରାଵଣସ୍ୟାଂକେ ଵୈଦେହୀଵ ତପସ୍ଵିନୀ ॥ 12 ॥
ଇମାସ୍ତା ମନ୍ମଥଵତାଂ ହିତାଃ ପ୍ରତିହତା ଦିଶଃ ।
ଅନୁଲିପ୍ତା ଇଵ ଘନୈର୍ନଷ୍ଟଗ୍ରହନିଶାକରାଃ ॥ 13 ॥
ଚିଦ୍ବାଷ୍ପାଭିସଂରୁଦ୍ଧାନ୍ ଵର୍ଷାଗମସମୁତ୍ସୁକାନ୍ ।
କୁଟଜାନ୍ପଶ୍ୟ ସୌମିତ୍ରେ ପୁଷ୍ପିତାନ୍ଗିରିସାନୁଷୁ ॥ 14 ॥
ମମ ଶୋକାଭିଭୂତସ୍ୟ କାମସଂଦୀପନାନ୍ ସ୍ଥିତାନ୍ ।
ରଜଃ ପ୍ରଶାଂତଂ ସହିମୋଽଦ୍ୟ ଵାୟୁ ର୍ନିଦାଘଦୋଷପ୍ରସରାଃ ପ୍ରଶାଂତାଃ ।
ସ୍ଥିତା ହି ୟାତ୍ରା ଵସୁଧାଧିପାନାଂ ପ୍ରଵାସିନୋ ୟାଂତି ନରାସ୍ସ୍ଵଦେଶାନ୍ ॥ 15 ॥
ସଂପ୍ରସ୍ଥିତା ମାନସଵାସଲୁବ୍ଧାଃ ପ୍ରିୟାନ୍ଵିତାଃ ସଂପ୍ରତି ଚକ୍ରଵାକାଃ ।
ଅଭୀକ୍ଷ୍ଣଵର୍ଷୋଦକଵିକ୍ଷତେଷୁ ୟାନାନି ମାର୍ଗେଷୁ ନ ସଂପତଂତି ॥ 16 ॥
କ୍ଵଚିତ୍ପ୍ରକାଶଂ କ୍ଵଚିଦପ୍ରକାଶଂ ନଭଃ ପ୍ରକୀର୍ଣାଂବୁଧରଂ ଵିଭାତି ।
କ୍ଵଚିତ୍କ୍ଵଚିତ୍ପର୍ଵତସନ୍ନିରୁଦ୍ଧଂ ରୂପଂ ୟଥା ଶାଂତମହାର୍ଣଵସ୍ୟ ॥ 17 ॥
ଵ୍ୟାମିଶ୍ରିତଂ ସାର୍ଜକଦଂବପୁଷ୍ପୈ ର୍ନଵଂ ଜଲଂ ପର୍ଵତଧାତୁତାମ୍ରମ୍ ।
ମୟୂରକେକାଭିରନୁପ୍ରୟାତଂ ଶୈଲାପଗାଶ୍ଶୀଘ୍ରତରଂ ଵହଂତି ॥ 18 ॥
ରସାକୁଲଂ ଷଟ୍ପଦସନ୍ନିକାଶଂ ପ୍ରଭୁଜ୍ୟତେ ଜଂବୁଫଲଂ ପ୍ରକାମମ୍ ।
ଅନେକଵର୍ଣଂ ପଵନାଵଧୂତଂ ଭୂମୌ ପତତ୍ୟାମ୍ରଫଲଂ ଵିପକ୍ଵମ୍ ॥ 19 ॥
ଵିଦ୍ୟୁତ୍ପତାକାସ୍ସବଲାକମାଲାଃ ଶୈଲେଂଦ୍ରକୂଟାକୃତିସନ୍ନିକାଶାଃ ।
ଗର୍ଜଂତି ମେଘାଃ ସମୁଦୀର୍ଣନାଦାଃ ମତ୍ତା ଗଜେଂଦ୍ରା ଇଵ ସଂୟୁଗସ୍ଥାଃ ॥ 20 ॥
ଵର୍ଷୋଦକାପ୍ୟାୟିତଶାଦ୍ଵଲାନି ପ୍ରଵୃତ୍ତନୃତ୍ତୋତ୍ସଵବର୍ହିଣାନି ।
ଵନାନି ନିର୍ଵୃଷ୍ଟଵଲାହକାନି ପଶ୍ୟାପରାହ୍ଣେଷ୍ଵଧିକଂ ଵିଭାଂତି ॥ 21 ॥
ସମୁଦ୍ଵହଂତ ସ୍ସଲିଲାତିଭାରଂ ବଲାକିନୋ ଵାରିଧରା ନଦଂତଃ ।
ମହତ୍ସୁ ଶୃଂଗେଷୁ ମହୀଧରାଣାଂ ଵିଶ୍ରମ୍ୟ ଵିଶ୍ରମ୍ୟ ପୁନଃ ପ୍ରୟାଂତି ॥ 22 ॥
ମେଘାଭିକାମା ପରିସଂପତଂତୀ ସମ୍ମୋଦିତା ଭାତି ବଲାକପଂକ୍ତିଃ ।
ଵାତାଵଧୂତା ଵରପୌଂଡରୀକୀ ଲଂବେଵ ମାଲା ରଚିତାଂବରସ୍ୟ ॥ 23 ॥
ବାଲେଂଦ୍ରଗୋପାଂତରଚିତ୍ରିତେନ ଵିଭାତି ଭୂମିର୍ନଵଶାଦ୍ଵଲେନ ।
ଗାତ୍ରାନୁପୃକ୍ତେନ ଶୁକପ୍ରଭେଣ ନାରୀଵ ଲାକ୍ଷୋକ୍ଷିତକଂବଲେନ ॥ 24 ॥
ନିଦ୍ରା ଶନୈଃ କେଶଵମଭ୍ୟୁପୈତି ଦ୍ରୁତଂ ନଦୀ ସାଗରମଭ୍ୟୁପୈତି ।
ହୃଷ୍ଟା ବଲାକା ଘନମଭ୍ୟୁପୈତି କାଂତା ସକାମା ପ୍ରିୟମଭ୍ୟୁପୈତି ॥ 25 ॥
ଜାତା ଵନାଂତାଶ୍ଶିଖିସଂପ୍ରନୃତ୍ତା ଜାତାଃ କଦଂବାଃ ସକଦଂବଶାଖାଃ ।
ଜାତା ଵୃଷା ଗୋଷୁ ସମାନକାମା ଜାତା ମହୀ ସସ୍ୟଵନାଭିରାମା ॥ 26 ॥
ଵହଂତି ଵର୍ଷଂତି ନଦଂତି ଭାଂତି ଧ୍ୟାୟଂତି ନୃତ୍ୟଂତି ସମାଶ୍ଵସଂତି ।
ନଦ୍ୟୋ ଘନା ମତ୍ତଗଜା ଵନାଂତାଃ ପ୍ରିୟାଵିହୀନାଶ୍ଶିଖିନଃ ପ୍ଲଵଂଗମାଃ ॥ 27 ॥
ପ୍ରହର୍ଷିତାଃ କେତକପୁଷ୍ପଗଂଧ ମାଘ୍ରାୟ ହୃଷ୍ଟା ଵନନିର୍ଝରେଷୁ ।
ପ୍ରପାତଶବ୍ଦାକୁଲିତା ଗଜେଂଦ୍ରା ସ୍ସାର୍ଧଂ ମୟୂରୈ ସ୍ସମଦା ନଦଂତି ॥ 28 ॥
ଧାରାନିପାତୈରଭିହନ୍ୟମାନାଃ କଦଂବଶାଖାସୁ ଵିଲଂବମାନାଃ ।
କ୍ଷଣାର୍ଜିତଂ ପୁଷ୍ପରସାଵଗାଢଂ ଶନୈର୍ମଦଂ ଷଟ୍ଚରଣାସ୍ତ୍ୟଜଂତି ॥ 29 ॥
ଅଂଗାରଚୂର୍ଣୋତ୍କରସନ୍ନିକାଶୈଃ ଫଲୈସ୍ସୁପର୍ୟାପ୍ତରସୈସ୍ସମୃଦ୍ଧୈଃ ।
ଜଂବୂଦ୍ରୁମାଣାଂ ପ୍ରଵିଭାଂତି ଶାଖାଃ ନିଲୀୟମାନା ଇଵ ଷଟ୍ପଦୌଘୈଃ ॥ 30 ॥
ତଟିତ୍ପତାକାଭିରଲଂକୃତାନା ମୁଦୀର୍ଣଗଂଭୀରମହାରଵାଣାମ୍ ।
ଵିଭାଂତି ରୂପାଣି ବଲାହକାନାଂ ରଣୋଦ୍ୟତାନାମିଵ ଵାନରଣାନାମ୍ ॥ 31 ॥
ମାର୍ଗାନୁଗଶ୍ଶୈଲଵନାନୁସାରୀ ସଂପ୍ରସ୍ଥିତୋ ମେଘରଵଂ ନିଶମ୍ୟ ।
ୟୁଦ୍ଧାଭିକାମଃ ପ୍ରତିନାଦଶଂକୀ ମତ୍ତୋ ଗଜେଂଦ୍ରଃ ପ୍ରତିସନ୍ନିଵୃତ୍ତଃ ॥ 32 ॥
କ୍ଵଚିତ୍ପ୍ରଗୀତା ଇଵ ଷଟ୍ପଦୌଘୈଃ କ୍ଵଚିତ୍ପ୍ରନୃତ୍ତା ଇଵ ନୀଲକଂଠୈଃ ।
କ୍ଵଚିତ୍ପ୍ରମତ୍ତା ଇଵ ଵାରଣେଂଦ୍ରୈ ର୍ଵିଭାଂତ୍ୟନେକାଶ୍ରୟିଣୋ ଵନାଂତାଃ ॥ 33 ॥
କଦଂବସର୍ଜାର୍ଜୁନକଂଦଲାଢ୍ୟା ଵନାଂତଭୂମିର୍ନଵଵାରିପୂର୍ଣା ।
ମୟୂରମତ୍ତାଭିରୁତପ୍ରନୃତ୍ତୈ ରାପାନଭୂମିପ୍ରତିମା ଵିଭାତି ॥ 34 ॥
ମୁକ୍ତାସକାଶଂ ସଲିଲଂ ପତଦ୍ଵୈ ସୁନିର୍ମଲଂ ପତ୍ରପୁଟେଷୁ ଲଗ୍ନମ୍ ।
ହୃଷ୍ଟା ଵିଵର୍ଣଚ୍ଛଦନା ଵିହଂଗା ସ୍ସୁରେଂଦ୍ରଦତ୍ତଂ ତୃଷିତାଃ ପିବଂତି ॥ 35 ॥
ଷଟ୍ପାଦତଂତ୍ରୀମଧୁରାଭିଧାନଂ ପ୍ଲଵଂଗମୋଦୀରିତକଂଠତାଲମ୍ ।
ଆଵିଷ୍କୃତଂ ମେଘମୃଦଂଗନାଦୈ ର୍ଵନେଷୁ ସଂଗୀତମିଵ ପ୍ରଵୃତ୍ତମ୍ ॥ 36 ॥
କ୍ଵଚିତ୍ପ୍ରନୃତ୍ତୈଃ କ୍ଵଚିଦୁନ୍ନଦଦ୍ଭିଃ କ୍ଵଚିଚ୍ଚ ଵୃକ୍ଷାଗ୍ରନିଷଣ୍ଣକାୟୈଃ ।
ଵ୍ୟାଲଂବବର୍ହାଭରଣୈର୍ମୟୂରୈ ର୍ଵନେଷୁ ସଂଗୀତମିଵ ପ୍ରଵୃତ୍ତମ୍ ॥ 37 ॥
ସ୍ଵନୈର୍ଘନାନାଂ ପ୍ଲଵଗାଃ ପ୍ରବୁଦ୍ଧାଃ ଵିହାୟ ନିଦ୍ରାଂ ଚିରସନ୍ନିରୁଦ୍ଧାମ୍ ।
ଅନେକରୂପାକୃତିଵର୍ଣନାଦାଃ ନଵାଂବୁଧାରାଭିହତା ନଦଂତି ॥ 38 ॥
ନଦ୍ୟସ୍ସମୁଦ୍ଵାହିତଚକ୍ରଵାକା ସ୍ତଟାନି ଶୀର୍ଣାନ୍ୟପଵାହୟିତ୍ଵା ।
ଦୃପ୍ତା ନଵପ୍ରାଭୃତପୂର୍ଣଭୋଗାଃ ଦ୍ରୁତଂ ସ୍ଵଭର୍ତାରମୁପୋପୟାଂତି ॥ 39 ॥
ନୀଲେଷୁ ନୀଲାଃ ପ୍ରଵିଭାଂତି ସକ୍ତାଃ ମେଘେଷୁ ମେଘା ନଵଵାରିପୂର୍ଣାଃ ।
ଦଵାଗ୍ନିଦଗ୍ଧେଷୁ ଦଵାଗ୍ନିଦଗ୍ଧା ଶ୍ଶୈଲେଷୁ ଶୈଲା ଇଵ ବଦ୍ଧମୂଲାଃ ॥ 40 ॥
ପ୍ରହୃଷ୍ଟସନ୍ନାଦିତବର୍ହିଣାନି ସଶକ୍ରଗୋପାକୁଲଶାଦ୍ଵଲାନି ।
ଚରଂତି ନୀପାର୍ଜୁନଵାସିତାନି ଗଜାସ୍ସୁରମ୍ୟାଣି ଵନାଂତରାଣି ॥ 41 ॥
ନଵାଂବୁଧାରାହତକେସରାଣି ଦ୍ରୁତଂ ପରିତ୍ୟଜ୍ୟ ସରୋରୁହାଣି ।
କଦଂବପୁଷ୍ପାଣି ସକେସରାଣି ନଵାନି ହୃଷ୍ଟା ଭ୍ରମରାଃ ପତଂତିଃ ॥ 42 ॥
ମତ୍ତା ଗଜେଂଦ୍ରା ମୁଦିତା ଗଵେଂଦ୍ରା ଵନେଷୁ ଵିଶ୍ରାଂତତରା ମୃଗେଂଦ୍ରା ।
ରମ୍ୟା ନଗେଂଦ୍ରା ନିଭୃତା ନରେଂଦ୍ରାଃ ପ୍ରକ୍ରୀଡିତୋ ଵାରିଧରୈସ୍ସୁରେଂଦ୍ରଃ ॥ 43 ॥
ମେଘାସ୍ସମୁଦ୍ଧୂତସମୁଦ୍ରନାଦାଃ ମହାଜଲୌଘୈର୍ଗଗନାଵଲଂବାଃ ।
ନଦୀସ୍ତଟାକାନି ସରାଂସି ଵାପୀ ର୍ମହୀଂ ଚ କୃତ୍ସ୍ନାମପଵାହୟଂତି ॥ 44 ॥
ଵର୍ଷପ୍ରଵେଗା ଵିପୁଲାଃ ପତଂତି ପ୍ରଵାଂତି ଵାତାସ୍ସମୁଦୀର୍ଣଘୋଷାଃ ।
ପ୍ରଣଷ୍ଟକୂଲାଃ ପ୍ରଵହଂତି ଶୀଘ୍ରଂ ନଦ୍ୟୋଜଲୈର୍ଵିପ୍ରତିପନ୍ନମାର୍ଗାଃ ॥ 45 ॥
ନରୈର୍ନରେଂଦ୍ରା ଇଵ ପର୍ଵତେଂଦ୍ରା ସ୍ସୁରେଂଦ୍ରଦତ୍ତୈଃ ପଵନୋପନୀତୈଃ ।
ଘନାଂବୁକୁଂଭୈରଭିଷିଚ୍ୟମାନା ରୂପଂ ଶ୍ରିୟଂ ସ୍ଵାମିଵ ଦର୍ଶୟଂତି ॥ 46 ॥
ଘନୋପଗୂଢଂ ଗଗନଂ ସତାରଂ ନ ଭାସ୍କରୋ ଦର୍ଶନମଭ୍ୟୁପୈତି ।
ନଵୈର୍ଜଲୌଘୈର୍ଧରଣୀ ଵିସୃପ୍ତା ତମୋ ଵିଲିପ୍ତା ନ ଦିଶଃ ପ୍ରକାଶାଃ ॥ 47 ॥
ମହାଂତି କୂଟାନି ମହୀଧରାଣାଂ ଧାରାଭିଧୌତାନ୍ୟଧିକଂ ଵିଭାଂତି ।
ମହାପ୍ରମାଣୈର୍ଵିପୁଲୈଃ ପ୍ରପାତୈ ର୍ମୁକ୍ତାକଲାପୈରିଵ ଲଂବମାନୈଃ ॥ 48 ॥
ଶୈଲୋପଲପ୍ରସ୍ଖଲମାନଵେଗା ଶ୍ଶୈଲୋତ୍ତମାନାଂ ଵିପୁଲାଃ ପ୍ରପାତାଃ ।
ଗୁହାସୁ ସନ୍ନାଦିତବର୍ହିଣାସୁ ହାରା ଵିକୀର୍ୟଂତ ଇଵାଵଭାଂତି ॥ 49 ॥
ଶୀଘ୍ରପ୍ରଵେଗା ଵିପୁଲାଃ ପ୍ରପାତାଃ ନିର୍ଧୌତଶୃଂଗୋପତଲା ଗିରୀଣାମ୍ ।
ମୁକ୍ତାକଲାପପ୍ରତିମାଃ ପତଂତୋ ମହାଗୁହୋତ୍ସଂଗତଲୈର୍ଧ୍ରିୟଂତେ ॥ 50 ॥
ସୁରତାମର୍ଦଵିଚ୍ଛିନ୍ନାସ୍ସ୍ଵର୍ଗସ୍ତ୍ରୀହାରମୌକ୍ତିକାଃ ।
ପତଂତି ଚାତୁଲା ଦିକ୍ଷୁ ତୋୟଧାରାସ୍ସମଂତତଃ ॥ 51 ॥
ନିଲୀୟମାନୈର୍ଵିହଗୈର୍ନିମୀଲଦ୍ଭିଶ୍ଚ ପଂକଜୈଃ ।
ଵିକସଂତ୍ୟା ଚ ମାଲତ୍ୟା ଗତୋଽସ୍ତଂ ଜ୍ଞାୟତେ ରଵିଃ ॥ 52 ॥
ଵୃତ୍ତା ୟାତ୍ରା ନରେଂଦ୍ରାଣାଂ ସେନା ପ୍ରତିନିଵର୍ତତେ ।
ଵୈରାଣି ଚୈଵ ମାର୍ଗାଶ୍ଚ ସଲିଲେନ ସମୀକୃତାଃ ॥ 53 ॥
ମାସି ପ୍ରୋଷ୍ଠପଦେ ବ୍ରହ୍ମ ବ୍ରାହ୍ମଣାନାଂ ଵିଵକ୍ଷତାମ୍ ।
ଅୟମଧ୍ୟାୟସମୟସ୍ସାମଗାନାମୁପସ୍ଥିତଃ ॥ 54 ॥
ନିଵୃତ୍ତକର୍ମାୟତନୋ ନୂନଂ ସଂଚିତସଂଚୟଃ ।
ଆଷାଢୀମଭ୍ୟୁପଗତୋ ଭରତଃ କୋସଲାଧିପଃ ॥ 55 ॥
ନୂନମାପୂର୍ୟମାଣାୟାସ୍ସର୍ଵଵ୍ୟା ଵର୍ଧତେ ରୟଃ ।
ମାଂ ସମୀକ୍ଷ୍ୟ ସମାୟାଂତମୟୋଧ୍ୟାୟା ଇଵ ସ୍ଵନଃ ॥ 56 ॥
ଇମାସ୍ଫୀତଗୁଣା ଵର୍ଷାସ୍ସୁଗ୍ରୀଵସ୍ସୁଖମଶ୍ନୁତେ ।
ଵିଜିତାରିଃ ସଦାରଶ୍ଚ ରାଜ୍ୟେ ମହତି ଚ ସ୍ଥିତଃ ॥ 57 ॥
ଅହଂ ତୁ ହୃତଦାରଶ୍ଚ ରାଜ୍ୟାଚ୍ୟ ମହତଶ୍ଚ୍ୟୁତଃ ।
ନଦୀକୂଲମିଵ କ୍ଲିନ୍ନମଵସୀଦାମି ଲକ୍ଷ୍ମଣ ॥ 58 ॥
ଶୋକଶ୍ଚ ମମ ଵିସ୍ତୀର୍ଣୋ ଵର୍ଷାଶ୍ଚ ଭୃଶଦୁର୍ଗମାଃ ।
ରାଵଣଶ୍ଚ ମହାନ୍ ଶତ୍ରୁରପାରଂ ପ୍ରତିଭାତି ମେ ॥ 59 ॥
ଅୟାତ୍ରାଂ ଚୈଵ ଦୃଷ୍ଟ୍ଵେମାଂ ମାର୍ଗାଂଶ୍ଚ ଭୃଶଦୁର୍ଗମାନ୍ ।
ପ୍ରଣତେ ଚୈଵ ସୁଗ୍ରୀଵେ ନ ମୟା କିଂଚିଦୀରିତମ୍ ॥ 60 ॥
ଅପି ଚାତିପରିକ୍ଲିଷ୍ଟଂ ଚିରାଦ୍ଦାରୈସ୍ସମାଗତମ୍ ।
ଆତ୍ମକାର୍ୟଗରୀୟସ୍ତ୍ଵାଦ୍ଵକ୍ତୁଂ ନେଚ୍ଛାମି ଵାନରମ୍ ॥ 61 ॥
ସ୍ଵୟମେଵ ହି ଵିଶ୍ରମ୍ୟ ଜ୍ଞାତ୍ଵା କାଲମୁପାଗତମ୍ ।
ଉପକାରଂ ଚ ସୁଗ୍ରୀଵୋ ଵେତ୍ସ୍ୟତେ ନାତ୍ର ସଂଶୟଃ ॥ 62 ॥
ତସ୍ମାତ୍କାଲପ୍ରତୀକ୍ଷୋଽହଂ ସ୍ଥିତୋଽସ୍ମି ଶୁଭଲକ୍ଷଣ ।
ସୁଗ୍ରୀଵସ୍ୟ ନଦୀନାଂ ଚ ପ୍ରସାଦମମନୁପାଲୟନ୍ ॥ 63 ॥
ଉପକାରେଣ ଵୀରସ୍ତୁ ପ୍ରତୀକାରେଣ ୟୁଜ୍ୟତେ ।
ଅକୃତଜ୍ଞୋଽପ୍ରତିକୃତୋ ହଂତି ସତ୍ତ୍ଵଵତାଂ ମନଃ ॥ 64 ॥
ଅଥୈଵମୁକ୍ତଃ ପ୍ରଣିଧାୟ ଲକ୍ଷ୍ମଣଃ କୃତାଂଜଲିସ୍ତତ୍ପ୍ରତିପୂଜ୍ୟ ଭାଷିତମ୍ ।
ଉଵାଚ ରାମଂ ସ୍ଵଭିରାମଦର୍ଶନଂ ପ୍ରଦର୍ଶୟଂଦର୍ଶନମାତ୍ମନଶ୍ଶୁଭମ୍ ॥ 65 ॥
ୟଥୋକ୍ତମେତତ୍ତଵ ସର୍ଵମୀପ୍ସିତଂ ନରେଂଦ୍ର କର୍ତା ନଚିରାଦ୍ଧରୀଶ୍ଵରଃ ।
ଶରତ୍ପ୍ରତୀକ୍ଷଃ କ୍ଷମତାମିମଂ ଭଵାନ୍ ଜଲପ୍ରପାତଂ ରିପୁନିଗ୍ରହେ ଧୃତଃ ॥ 66 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ଅଷ୍ଟାଵିଂଶସ୍ସର୍ଗଃ ॥
