ශ්රීමද්වාල්මීකීය රාමායණේ කිෂ්කිංධාකාංඩම් ।
අථ අෂ්ටත්රිංශස්සර්ගඃ ।
ප්රතිගෘහ්ය ච තත්සර්වමුපායනමුපාහෘතම් ।
වානරාන්සාංත්වයිත්වා ච සර්වානේව ව්යසර්ජයත් ॥ 1 ॥
විසර්ජයිත්වා ස හරීන් ශූරාංස්තාන්කෘතකර්මණඃ ।
මේනේ කෘතාර්ථමාත්මානං රාඝවං ච මහාබලම් ॥ 2 ॥
ස ලක්ෂ්මණෝ භීමබලං සර්වවානරසත්තමම් ।
අබ්රවීත්ප්රශ්රිතං වාක්යං සුග්රීවං සංප්රහර්ෂයන් ॥ 3 ॥
කිෂ්කිංධායා විනිෂ්ක්රාම යදි තේ සෞම්ය රෝචතේ ।
තස්ය තද්වචනං ශ්රුත්වා ලක්ෂ්මණස්ය සුභාෂිතම් ॥ 4 ॥
සුග්රීවඃ පරමප්රීතෝ වාක්යමේතදුවාච හ ।
ඒවං භවතු ගච්ඡාවඃ ස්ථේයං ත්වච්ඡාසනේ මයා ॥ 5 ॥
තමේවමුක්ත්වා සුග්රීවෝ ලක්ෂ්මණං ශුභලක්ෂණම් ।
විසර්ජයාමාස තදා තාරාමන්යාශ්ච යෝෂිතඃ ॥ 6 ॥
ඒතේත්යුච්චෛර්හරිවරාන්සුග්රීවස්සමුදාහරත් ।
තස්ය තද්වචනං ශ්රුත්වා හරයශ්ශීඝ්රමායයුඃ ॥ 7 ॥
බද්ධාංජලිපුටාස්සර්වේ යේ ස්යුඃ ස්ත්රීදර්ශනක්ෂමාඃ ।
තානුවාච තතඃ ප්රාප්තාන්රාජාऽර්කසදෘශප්රභඃ ॥ 8 ॥
උපස්ථාපයත ක්ෂිප්රං ශිබිකාං මම වානරාඃ ।
ශ්රුත්වා තු වචනං තස්ය හරයශ්ශීඝ්රවික්රමාඃ ॥ 9 ॥
සමුපස්ථාපයාමාසුශ්ශිබිකාං ප්රියදර්ශනාම් ।
තාමුපස්ථාපිතාං දෘෂ්ට්වා ශිබිකාං වානරාධිපඃ ॥ 10 ॥
ලක්ෂ්මණාऽරුහ්යතාං ශීඝ්රමිති සෞමිත්රිමබ්රවීත් ।
ඉත්යුක්ත්වා කාංචනං යානං සුග්රීවස්සූර්යසන්නිභම් ॥ 11 ॥
බෘහද්භිර්හරිභිර්යුක්තමාරුරෝහ සලක්ෂ්මණඃ ।
පාංඩුරේණාතපත්රේණ ම්රියමාණේන මූර්ධනි ॥ 12 ॥
ශුක්ලෛශ්ච වාලව්යජනෛර්ධූයමානෛස්සමංතතඃ ।
ශංඛභේරීනිනාදෛශ්ච හරිභිශ්චාභිවංදිතඃ ॥ 13 ॥
නිර්යයෞ ප්රාප්ය සුග්රීවෝ රාජ්යශ්රියමනුත්තමාම් ।
ස වානරශතෛස්තීක්ෂ්ණෛර්බහුභි ශ්ශස්ත්රපාණිභිඃ ॥ 14 ॥
පරිකීර්ණෝ යයෞ තත්ර යත්ර රාමෝ ව්යවස්ථිතඃ ।
ස තං දේශමනුප්රාප්ය ශ්රේෂ්ඨං රාමනිෂේවිතම් ॥ 15 ॥
අවාතරන්මහාතේජා ශ්ශිබිකායාස්සලක්ෂ්මණඃ ।
ආසාද්ය ච තතෝ රාමං කෘතාංජලිපුටෝऽභවත් ॥ 16 ॥
කෘතාංජලෞ ස්ථිතේ තස්මින්වානරාශ්චාභවංස්තථා ।
තටාකමිව තං දෘෂ්ට්වා රාමඃ කුඩ්මලපංකජම් ॥ 17 ॥
වානරාණාං මහත්සෛන්යං සුග්රීවේ ප්රීතිමානභූත් ।
පාදයෝඃ පතිතං මූර්ධ්නා තමුත්ථාප්ය හරීශ්වරම් ॥ 18 ॥
ප්රේම්ණා ච බහුමානාච්ච රාඝවඃ පරිෂස්වජේ ।
පරිෂ්වජ්ය ච ධර්මාත්මා නිෂීදේති තතෝऽබ්රවීත් ॥ 19 ॥
නිෂණ්ණං තං තතෝ දෘෂ්ට්වා ක්ෂිතෞ රාමෝऽබ්රවීද්වචඃ ।
ධර්මමර්ථං ච කාමං ච යස්තු කාලේ නිෂේවතේ ॥ 20 ॥
විභජ්ය සතතං වීර ස්ස රාජා හරිසත්තම ।
හිත්වා ධර්මං තථාऽර්ථං ච කාමං යස්තු නිෂේවතේ ॥ 21 ॥
ස වෘක්ෂාග්රේ යථා සුප්තඃ පතිතඃ ප්රතිබුධ්යතේ ।
අමිත්රාණාං වධේ යුක්තෝ මිත්රාණාං සංග්රහේ රතඃ ॥ 22 ॥
ත්රිවර්ගඵලභෝක්තා තු රාජා ධර්මේණ යුජ්යතේ ।
උද්යෝගසමයස්ත්වේෂප්රාප්තශ්ශත්රුවිනාශන ॥ 23 ॥
සංචිංත්යතාං හි පිංගේශ හරිභිස්සහ මංත්රිභිඃ ।
ඒවමුක්තස්තු සුග්රීවෝ රාමං වචනමබ්රවීත් ॥ 24 ॥
ප්රණෂ්ටා ශ්රීශ්ච කීර්තිශ්ච කපිරාජ්යං ච ශාශ්වතම් ।
ත්වත්ප්රසාදාන්මහාබාහෝ පුනඃප්රාප්තමිදං මයා ॥ 25 ॥
තව දේව ප්රසාදාච්ච භ්රාතුශ්ච ජයතාං වර ।
කෘතං න ප්රතිකුර්යාද්යඃ පුරුෂාණාං ස දූෂකඃ ॥ 26 ॥
ඒතේ වානරමූඛ්යාශ්ච ශතශශ්ශත්රුසූදන ।
ප්රාප්තාශ්චාදාය බලිනඃ පෘථිව්යාං සර්වවානරාන් ॥ 27 ॥
ඍක්ෂාශ්චාවහිතාශ්ශූරා ගෝලාංගූලාශ්ච රාඝව ।
කාංතාරවනදුර්ගාණාමභිජ්ඤා ඝෝරදර්ශනාඃ ॥ 28 ॥
දේවගංධර්වපුත්රාශ්ච වානරාඃ කාමරූපිණඃ ।
ස්වෛස්ස්වෛඃ පරිවෘතාස්සෛන්යෛර්වර්තංතේ පථි රාඝව ॥ 29 ॥
ශතෛශ්ශතසහස්රෛශ්ච වර්තංතේ කෝටිභිශ්ච ප්ලවංගමාඃ ।
අයුතෛශ්චාවෘතා වීරාශ්ශංකුභිශ්ච පරංතප ॥ 30 ॥
අර්බුදෛරර්බුදශතෛර්මධ්යෛශ්චාංත්යෛශ්ච වානරාඃ ।
සමුද්රෛශ්ච පරාර්ධෛශ්ච හරයෝ හරියූථපාඃ ॥ 31 ॥
ආගමිෂ්යංති තේ රාජන්මහේංද්රසමවික්රමාඃ ।
මේරුමංදරසංකාශා විංධ්ය මේරුකෘතාලයාඃ ॥ 32 ॥
තේ ත්වාමභිගමිෂ්යංති රාක්ෂසං යේ සබාංධවම් ।
නිහත්ය රාවණං සඛ්යේ හ්යානයිෂ්යංති මෛථිලීම් ॥ 33 ॥
තතස්තමුද්යෝගමවේක්ෂ්ය බුද්ධිමා න්හරිප්රවීරස්ය නිදේශවර්තිනඃ ।
බභූව හර්ෂාද්වසුධාධිපාත්මජඃ ප්රබුද්ධනීලෝත්පලතුල්යදර්ශනඃ ॥ 34 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ අෂ්ටත්රිංශස්සර්ගඃ ॥
