শ্রীমদ্বাল্মীকীয় রামাযণে কিষ্কিংধাকাংডম্ ।
অথ অষ্টত্রিংশস্সর্গঃ ।
প্রতিগৃহ্য় চ তত্সর্বমুপাযনমুপাহৃতম্ ।
বানরান্সাংত্বয়িত্বা চ সর্বানেব ব্যসর্জযত্ ॥ 1 ॥
বিসর্জয়িত্বা স হরীন্ শূরাংস্তান্কৃতকর্মণঃ ।
মেনে কৃতার্থমাত্মানং রাঘবং চ মহাবলম্ ॥ 2 ॥
স লক্ষ্মণো ভীমবলং সর্ববানরসত্তমম্ ।
অব্রবীত্প্রশ্রিতং বাক্য়ং সুগ্রীবং সংপ্রহর্ষযন্ ॥ 3 ॥
কিষ্কিংধায়া বিনিষ্ক্রাম যদি তে সৌম্য় রোচতে ।
তস্য় তদ্বচনং শ্রুত্বা লক্ষ্মণস্য় সুভাষিতম্ ॥ 4 ॥
সুগ্রীবঃ পরমপ্রীতো বাক্যমেতদুবাচ হ ।
এবং ভবতু গচ্ছাবঃ স্থেয়ং ত্বচ্ছাসনে ময়া ॥ 5 ॥
তমেবমুক্ত্বা সুগ্রীবো লক্ষ্মণং শুভলক্ষণম্ ।
বিসর্জয়ামাস তদা তারামন্য়াশ্চ যোষিতঃ ॥ 6 ॥
এতেত্য়ুচ্চৈর্হরিবরান্সুগ্রীবস্সমুদাহরত্ ।
তস্য় তদ্বচনং শ্রুত্বা হরযশ্শীঘ্রমাযয়ুঃ ॥ 7 ॥
বদ্ধাংজলিপুটাস্সর্বে যে স্য়ুঃ স্ত্রীদর্শনক্ষমাঃ ।
তানুবাচ ততঃ প্রাপ্তান্রাজাঽর্কসদৃশপ্রভঃ ॥ 8 ॥
উপস্থাপযত ক্ষিপ্রং শিবিকাং মম বানরাঃ ।
শ্রুত্বা তু বচনং তস্য় হরযশ্শীঘ্রবিক্রমাঃ ॥ 9 ॥
সমুপস্থাপয়ামাসুশ্শিবিকাং প্রিযদর্শনাম্ ।
তামুপস্থাপিতাং দৃষ্ট্বা শিবিকাং বানরাধিপঃ ॥ 10 ॥
লক্ষ্মণাঽরুহ্যতাং শীঘ্রমিতি সৌমিত্রিমব্রবীত্ ।
ইত্য়ুক্ত্বা কাংচনং যানং সুগ্রীবস্সূর্যসন্নিভম্ ॥ 11 ॥
বৃহদ্ভির্হরিভির্য়ুক্তমারুরোহ সলক্ষ্মণঃ ।
পাংডুরেণাতপত্রেণ ম্রিযমাণেন মূর্ধনি ॥ 12 ॥
শুক্লৈশ্চ বালব্যজনৈর্ধূযমানৈস্সমংততঃ ।
শংখভেরীনিনাদৈশ্চ হরিভিশ্চাভিবংদিতঃ ॥ 13 ॥
নির্যয়ৌ প্রাপ্য় সুগ্রীবো রাজ্যশ্রিযমনুত্তমাম্ ।
স বানরশতৈস্তীক্ষ্ণৈর্বহুভি শ্শস্ত্রপাণিভিঃ ॥ 14 ॥
পরিকীর্ণো যয়ৌ তত্র যত্র রামো ব্যবস্থিতঃ ।
স তং দেশমনুপ্রাপ্য় শ্রেষ্ঠং রামনিষেবিতম্ ॥ 15 ॥
অবাতরন্মহাতেজা শ্শিবিকায়াস্সলক্ষ্মণঃ ।
আসাদ্য় চ ততো রামং কৃতাংজলিপুটোঽভবত্ ॥ 16 ॥
কৃতাংজলৌ স্থিতে তস্মিন্বানরাশ্চাভবংস্তথা ।
তটাকমিব তং দৃষ্ট্বা রামঃ কুড্মলপংকজম্ ॥ 17 ॥
বানরাণাং মহত্সৈন্য়ং সুগ্রীবে প্রীতিমানভূত্ ।
পাদয়োঃ পতিতং মূর্ধ্না তমুত্থাপ্য় হরীশ্বরম্ ॥ 18 ॥
প্রেম্ণা চ বহুমানাচ্চ রাঘবঃ পরিষস্বজে ।
পরিষ্বজ্য় চ ধর্মাত্মা নিষীদেতি ততোঽব্রবীত্ ॥ 19 ॥
নিষণ্ণং তং ততো দৃষ্ট্বা ক্ষিতৌ রামোঽব্রবীদ্বচঃ ।
ধর্মমর্থং চ কামং চ যস্তু কালে নিষেবতে ॥ 20 ॥
বিভজ্য় সততং বীর স্স রাজা হরিসত্তম ।
হিত্বা ধর্মং তথাঽর্থং চ কামং যস্তু নিষেবতে ॥ 21 ॥
স বৃক্ষাগ্রে যথা সুপ্তঃ পতিতঃ প্রতিবুধ্যতে ।
অমিত্রাণাং বধে যুক্তো মিত্রাণাং সংগ্রহে রতঃ ॥ 22 ॥
ত্রিবর্গফলভোক্তা তু রাজা ধর্মেণ যুজ্যতে ।
উদ্য়োগসমযস্ত্বেষপ্রাপ্তশ্শত্রুবিনাশন ॥ 23 ॥
সংচিংত্যতাং হি পিংগেশ হরিভিস্সহ মংত্রিভিঃ ।
এবমুক্তস্তু সুগ্রীবো রামং বচনমব্রবীত্ ॥ 24 ॥
প্রণষ্টা শ্রীশ্চ কীর্তিশ্চ কপিরাজ্য়ং চ শাশ্বতম্ ।
ত্বত্প্রসাদান্মহাবাহো পুনঃপ্রাপ্তমিদং ময়া ॥ 25 ॥
তব দেব প্রসাদাচ্চ ভ্রাতুশ্চ জযতাং বর ।
কৃতং ন প্রতিকুর্য়াদ্য়ঃ পুরুষাণাং স দূষকঃ ॥ 26 ॥
এতে বানরমূখ্য়াশ্চ শতশশ্শত্রুসূদন ।
প্রাপ্তাশ্চাদায় বলিনঃ পৃথিব্য়াং সর্ববানরান্ ॥ 27 ॥
ঋক্ষাশ্চাবহিতাশ্শূরা গোলাংগূলাশ্চ রাঘব ।
কাংতারবনদুর্গাণামভিজ্ঞা ঘোরদর্শনাঃ ॥ 28 ॥
দেবগংধর্বপুত্রাশ্চ বানরাঃ কামরূপিণঃ ।
স্বৈস্স্বৈঃ পরিবৃতাস্সৈন্য়ৈর্বর্তংতে পথি রাঘব ॥ 29 ॥
শতৈশ্শতসহস্রৈশ্চ বর্তংতে কোটিভিশ্চ প্লবংগমাঃ ।
অয়ুতৈশ্চাবৃতা বীরাশ্শংকুভিশ্চ পরংতপ ॥ 30 ॥
অর্বুদৈরর্বুদশতৈর্মধ্য়ৈশ্চাংত্য়ৈশ্চ বানরাঃ ।
সমুদ্রৈশ্চ পরার্ধৈশ্চ হরয়ো হরিয়ূথপাঃ ॥ 31 ॥
আগমিষ্য়ংতি তে রাজন্মহেংদ্রসমবিক্রমাঃ ।
মেরুমংদরসংকাশা বিংধ্য় মেরুকৃতালয়াঃ ॥ 32 ॥
তে ত্বামভিগমিষ্য়ংতি রাক্ষসং যে সবাংধবম্ ।
নিহত্য় রাবণং সখ্য়ে হ্য়ানয়িষ্য়ংতি মৈথিলীম্ ॥ 33 ॥
ততস্তমুদ্য়োগমবেক্ষ্য় বুদ্ধিমা ন্হরিপ্রবীরস্য় নিদেশবর্তিনঃ ।
বভূব হর্ষাদ্বসুধাধিপাত্মজঃ প্রবুদ্ধনীলোত্পলতুল্যদর্শনঃ ॥ 34 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে কিষ্কিংধাকাংডে অষ্টত্রিংশস্সর্গঃ ॥
