ஶ்ரீமத்³வால்மீகீய ராமாயணே கிஷ்கிந்தா⁴காண்ட³ம் ।
அத² அஷ்டத்ரிம்ஶஸ்ஸர்க:³ ।
ப்ரதிக்³ருஹ்ய ச தத்ஸர்வமுபாயனமுபாஹ்ருதம் ।
வானரான்ஸாந்த்வயித்வா ச ஸர்வானேவ வ்யஸர்ஜயத் ॥ 1 ॥
விஸர்ஜயித்வா ஸ ஹரீன் ஶூராம்ஸ்தான்க்ருதகர்மண: ।
மேனே க்ருதார்த²மாத்மானம் ராக⁴வம் ச மஹாப³லம் ॥ 2 ॥
ஸ லக்ஷ்மணோ பீ⁴மப³லம் ஸர்வவானரஸத்தமம் ।
அப்³ரவீத்ப்ரஶ்ரிதம் வாக்யம் ஸுக்³ரீவம் ஸம்ப்ரஹர்ஷயன் ॥ 3 ॥
கிஷ்கிந்தா⁴யா வினிஷ்க்ராம யதி³ தே ஸௌம்ய ரோசதே ।
தஸ்ய தத்³வசனம் ஶ்ருத்வா லக்ஷ்மணஸ்ய ஸுபா⁴ஷிதம் ॥ 4 ॥
ஸுக்³ரீவ: பரமப்ரீதோ வாக்யமேதது³வாச ஹ ।
ஏவம் ப⁴வது க³ச்சா²வ: ஸ்தே²யம் த்வச்சா²ஸனே மயா ॥ 5 ॥
தமேவமுக்த்வா ஸுக்³ரீவோ லக்ஷ்மணம் ஶுப⁴லக்ஷணம் ।
விஸர்ஜயாமாஸ ததா³ தாராமன்யாஶ்ச யோஷித: ॥ 6 ॥
ஏதேத்யுச்சைர்ஹரிவரான்ஸுக்³ரீவஸ்ஸமுதா³ஹரத் ।
தஸ்ய தத்³வசனம் ஶ்ருத்வா ஹரயஶ்ஶீக்⁴ரமாயயு: ॥ 7 ॥
ப³த்³தா⁴ஞ்ஜலிபுடாஸ்ஸர்வே யே ஸ்யு: ஸ்த்ரீத³ர்ஶனக்ஷமா: ।
தானுவாச தத: ப்ராப்தான்ராஜார்கஸத்³ருஶப்ரப:⁴ ॥ 8 ॥
உபஸ்தா²பயத க்ஷிப்ரம் ஶிபி³காம் மம வானரா: ।
ஶ்ருத்வா து வசனம் தஸ்ய ஹரயஶ்ஶீக்⁴ரவிக்ரமா: ॥ 9 ॥
ஸமுபஸ்தா²பயாமாஸுஶ்ஶிபி³காம் ப்ரியத³ர்ஶனாம் ।
தாமுபஸ்தா²பிதாம் த்³ருஷ்ட்வா ஶிபி³காம் வானராதி⁴ப: ॥ 1௦ ॥
லக்ஷ்மணாருஹ்யதாம் ஶீக்⁴ரமிதி ஸௌமித்ரிமப்³ரவீத் ।
இத்யுக்த்வா காஞ்சனம் யானம் ஸுக்³ரீவஸ்ஸூர்யஸன்னிப⁴ம் ॥ 11 ॥
ப்³ருஹத்³பி⁴ர்ஹரிபி⁴ர்யுக்தமாருரோஹ ஸலக்ஷ்மண: ।
பாண்டு³ரேணாதபத்ரேண ம்ரியமாணேன மூர்த⁴னி ॥ 12 ॥
ஶுக்லைஶ்ச வாலவ்யஜனைர்தூ⁴யமானைஸ்ஸமந்தத: ।
ஶங்க²பே⁴ரீனினாதை³ஶ்ச ஹரிபி⁴ஶ்சாபி⁴வந்தி³த: ॥ 13 ॥
நிர்யயௌ ப்ராப்ய ஸுக்³ரீவோ ராஜ்யஶ்ரியமனுத்தமாம் ।
ஸ வானரஶதைஸ்தீக்ஷ்ணைர்ப³ஹுபி⁴ ஶ்ஶஸ்த்ரபாணிபி⁴: ॥ 14 ॥
பரிகீர்ணோ யயௌ தத்ர யத்ர ராமோ வ்யவஸ்தி²த: ।
ஸ தம் தே³ஶமனுப்ராப்ய ஶ்ரேஷ்ட²ம் ராமனிஷேவிதம் ॥ 15 ॥
அவாதரன்மஹாதேஜா ஶ்ஶிபி³காயாஸ்ஸலக்ஷ்மண: ।
ஆஸாத்³ய ச ததோ ராமம் க்ருதாஞ்ஜலிபுடோப⁴வத் ॥ 16 ॥
க்ருதாஞ்ஜலௌ ஸ்தி²தே தஸ்மின்வானராஶ்சாப⁴வம்ஸ்ததா² ।
தடாகமிவ தம் த்³ருஷ்ட்வா ராம: குட்³மலபங்கஜம் ॥ 17 ॥
வானராணாம் மஹத்ஸைன்யம் ஸுக்³ரீவே ப்ரீதிமானபூ⁴த் ।
பாத³யோ: பதிதம் மூர்த்⁴னா தமுத்தா²ப்ய ஹரீஶ்வரம் ॥ 18 ॥
ப்ரேம்ணா ச ப³ஹுமானாச்ச ராக⁴வ: பரிஷஸ்வஜே ।
பரிஷ்வஜ்ய ச த⁴ர்மாத்மா நிஷீதே³தி ததோப்³ரவீத் ॥ 19 ॥
நிஷண்ணம் தம் ததோ த்³ருஷ்ட்வா க்ஷிதௌ ராமோப்³ரவீத்³வச: ।
த⁴ர்மமர்த²ம் ச காமம் ச யஸ்து காலே நிஷேவதே ॥ 2௦ ॥
விபஜ⁴்ய ஸததம் வீர ஸ்ஸ ராஜா ஹரிஸத்தம ।
ஹித்வா த⁴ர்மம் ததா²ர்த²ம் ச காமம் யஸ்து நிஷேவதே ॥ 21 ॥
ஸ வ்ருக்ஷாக்³ரே யதா² ஸுப்த: பதித: ப்ரதிபு³த்⁴யதே ।
அமித்ராணாம் வதே⁴ யுக்தோ மித்ராணாம் ஸங்க்³ரஹே ரத: ॥ 22 ॥
த்ரிவர்க³ப²லபோ⁴க்தா து ராஜா த⁴ர்மேண யுஜ்யதே ।
உத்³யோக³ஸமயஸ்த்வேஷப்ராப்தஶ்ஶத்ருவினாஶன ॥ 23 ॥
ஸஞ்சிந்த்யதாம் ஹி பிங்கே³ஶ ஹரிபி⁴ஸ்ஸஹ மந்த்ரிபி⁴: ।
ஏவமுக்தஸ்து ஸுக்³ரீவோ ராமம் வசனமப்³ரவீத் ॥ 24 ॥
ப்ரணஷ்டா ஶ்ரீஶ்ச கீர்திஶ்ச கபிராஜ்யம் ச ஶாஶ்வதம் ।
த்வத்ப்ரஸாதா³ன்மஹாபா³ஹோ புன:ப்ராப்தமித³ம் மயா ॥ 25 ॥
தவ தே³வ ப்ரஸாதா³ச்ச ப்⁴ராதுஶ்ச ஜயதாம் வர ।
க்ருதம் ந ப்ரதிகுர்யாத்³ய: புருஷாணாம் ஸ தூ³ஷக: ॥ 26 ॥
ஏதே வானரமூக்²யாஶ்ச ஶதஶஶ்ஶத்ருஸூத³ன ।
ப்ராப்தாஶ்சாதா³ய ப³லின: ப்ருதி²வ்யாம் ஸர்வவானரான் ॥ 27 ॥
ருக்ஷாஶ்சாவஹிதாஶ்ஶூரா கோ³லாங்கூ³லாஶ்ச ராக⁴வ ।
காந்தாரவனது³ர்கா³ணாமபி⁴ஜ்ஞா கோ⁴ரத³ர்ஶனா: ॥ 28 ॥
தே³வக³ந்த⁴ர்வபுத்ராஶ்ச வானரா: காமரூபிண: ।
ஸ்வைஸ்ஸ்வை: பரிவ்ருதாஸ்ஸைன்யைர்வர்தந்தே பதி² ராக⁴வ ॥ 29 ॥
ஶதைஶ்ஶதஸஹஸ்ரைஶ்ச வர்தந்தே கோடிபி⁴ஶ்ச ப்லவங்க³மா: ।
அயுதைஶ்சாவ்ருதா வீராஶ்ஶங்குபி⁴ஶ்ச பரந்தப ॥ 3௦ ॥
அர்பு³தை³ரர்பு³த³ஶதைர்மத்⁴யைஶ்சாந்த்யைஶ்ச வானரா: ।
ஸமுத்³ரைஶ்ச பரார்தை⁴ஶ்ச ஹரயோ ஹரியூத²பா: ॥ 31 ॥
ஆக³மிஷ்யந்தி தே ராஜன்மஹேந்த்³ரஸமவிக்ரமா: ।
மேருமந்த³ரஸங்காஶா விந்த்⁴ய மேருக்ருதாலயா: ॥ 32 ॥
தே த்வாமபி⁴க³மிஷ்யந்தி ராக்ஷஸம் யே ஸபா³ந்த⁴வம் ।
நிஹத்ய ராவணம் ஸக்²யே ஹ்யானயிஷ்யந்தி மைதி²லீம் ॥ 33 ॥
ததஸ்தமுத்³யோக³மவேக்ஷ்ய பு³த்³தி⁴மா ந்ஹரிப்ரவீரஸ்ய நிதே³ஶவர்தின: ।
ப³பூ⁴வ ஹர்ஷாத்³வஸுதா⁴தி⁴பாத்மஜ: ப்ரபு³த்³த⁴னீலோத்பலதுல்யத³ர்ஶன: ॥ 34 ॥
இத்யார்ஷே ஶ்ரீமத்³ராமாயணே வால்மீகீய ஆதி³காவ்யே கிஷ்கிந்தா⁴காண்டே³ அஷ்டத்ரிம்ஶஸ்ஸர்க:³ ॥
