ஶ்ரீமத்³வால்மீகீய ராமாயணே கிஷ்கிந்தா⁴காண்ட³ம் ।
அத² த்ரிசத்வாரிம்ஶஸ்ஸர்க:³ ।
ததஸ்ஸந்தி³ஶ்ய ஸுக்³ரீவஶ்ஶ்வஶுரம் பஶ்சிமாம் தி³ஶம் ।
வீரம் ஶதவலிம் நாம வானரம் வானரர்ஷப:⁴ ॥ 1 ॥
உவாச ராஜா த⁴ர்மஜ்ஞஸ்ஸர்வவானரஸத்தமம் ।
வாக்யமாத்ம ஹிதம் சைவ ராமஸ்ய ச ஹிதம் ததா² ॥ 2 ॥
வ்ருதஶ்ஶதஸஹஸ்ரேண த்வத்³விதா⁴னாம் வனௌகஸாம் ।
வைவஸ்வதஸுதைஸ்ஸார்த⁴ம் ப்ரதிஷ்ட²ஸ்வ ஸ்வமந்த்ரிபி⁴: ॥ 3 ॥
தி³ஶம் ஹ்யுதீ³சீம் விக்ராந்தாம் ஹிமஶைலாவதம்ஸகாம் ।
ஸர்வத: பரிமார்க³த்⁴வம் ராமபத்னீமனிந்தி³தாம் ॥ 4 ॥
அஸ்மின்கார்யேவினிர்வ்ருத்தே க்ருதே தா³ஶரதே²: ப்ரியே ।
ருணான்முக்தா ப⁴விஷ்யாம: க்ருதார்தா²ர்த²விதா³ம் வரா: ॥ 5 ॥
க்ருதம் ஹி ப்ரியமஸ்மாகம் ராக⁴வேண மஹாத்மனா ।
தஸ்ய சேத்ப்ரதிகாரோஸ்தி ஸப²லம் ஜீவிதம் ப⁴வேத் ॥ 6 ॥
அர்தி²ன: கார்யனிர்வ்ருத்திமகர்துரபி யஶ்சரேத் ।
தஸ்ய ஸ்யாத்ஸப²லம் ஜன்ம கிம் புன: பூர்வகாரிண: ॥ 7 ॥
ஏதாம் பு³த்³தி⁴மவஸ்தா²ய த்³ருஶ்யதே ஜானகீ யதா² ।
ததா² ப⁴வத்³பி⁴: கர்தவ்யமஸ்மத்ப்ரியஹிதைஷிபி⁴: ॥ 8 ॥
அயம் ஹி ஸர்வபூ⁴தானாம் மான்யஸ்து நரஸத்தம: ।
அஸ்மாஸு சாக³த: ப்ரீதீ ராம: பரபுரஞ்ஜய: ॥ 9 ॥
இமானி வனது³ர்கா³ணி நத்³யஶ்ஶைலாந்தராணி ச ।
ப⁴வந்த: பரிமார்க³ந்து பு³த்³தி⁴விக்ரமஸம்பதா³ ॥ 1௦ ॥
தத்ர ம்லேச்சா²ன்புலிந்தா³ம்ஶ்ச ஶூரஸேனாம்ஸ்ததை²வ ச ।
ப்ரஸ்த²லான்ப⁴ரதாம்ஶ்சைவ குரூம்ஶ்ச ஸஹ மத்³ரகை: ॥ 11 ॥
காம்போ³ஜான்யவனாம் ஶ்சைவ ஶகானாரட்டகானபி ।
பா³ஹ்லீகான்ருஷிகாம் ஶ்சைவ பௌரவானத² டங்கணான் ॥ 12 ॥
சீனான்பரமசீனாம்ஶ்ச நீஹாராம்ஶ்ச புன: புன: ।
அன்விஷ்யத³ரதா³ம்ஶ்சைவ ஹிமவந்தம் ததை²வ ச ॥ 13 ॥
லோத்⁴ரபத்³மகஷண்டே³ஷு தே³வதா³ருவனேஷு ச ।
ராவணஸ்ஸஹ வைதே³ஹ்யா மார்கி³தவ்யஸ்ததஸ்தத: ॥ 14 ॥
ததஸ்ஸோமாஶ்ரமம் க³த்வா தே³வக³ந்த⁴ர்வஸேவிதம் ।
காலம் நாம மஹாஸானும் பர்வதம் து க³மிஷ்யத² ॥ 15 ॥
மஹத்ஸு தஸ்ய ஶைலஸ்ய நிர்த³ரேஷு கு³ஹாஸு ச ।
விசினுத்⁴வம் மஹாபா⁴கா³ம் ராமபத்னீந்ததஸ்தத: ॥ 16 ॥
தமதிக்ரம்ய ஶைலேந்த்³ரம் ஹேமக³ர்ப⁴ம் மஹாகி³ரிம் ।
ததஸ்ஸுத³ர்ஶனம் நாம க³ந்துமர்ஹத² பர்வதம் ॥ 17 ॥
ததோ தே³வஸகோ² நாம பர்வத: பதகா³லய: ।
நானாபக்ஷிக³ணாகீர்ணோ விவித⁴த்³ருமபூ⁴ஷித: ॥ 18 ॥
தஸ்ய கானநஷண்டே³ஷு நிர்க⁴ரேஷு கு³ஹாஸு ச ।
ராவணஸ்ஸஹ வைதே³ஹ்யா மார்கி³தவ்யஸ்ததஸ்தத: ॥ 19 ॥
தமதிக்ரம்ய சாகாஶம் ஸர்வதஶ்ஶதயோஜனம் ।
அபர்வதனதீ³வ்ருக்ஷம் ஸர்வஸத்த்வவிவர்ஜிதம் ॥ 2௦ ॥
தம் து ஶீக்⁴ரமதிக்ரம்ய காந்தாரம் ரோமஹர்ஷணம் ।
கைலாஸம் பாண்டு³ரம் ஶைலம் ப்ராப்ய ஹ்ருஷ்டா ப⁴விஷ்யத² ॥ 21 ॥
தத்ர பாண்டு³ரமேகா⁴ப⁴ம் ஜாம்பூ³னத³பரிஷ்க்ருதம் ।
குபே³ரப⁴வனம் ரம்யம் நிர்மிதம் விஶ்வகர்மணா ॥ 22 ॥
விஶாலா நலினீ யத்ர ப்ரபூ⁴தகமலோத்பலா ।
ஹம்ஸகாரண்ட³வாகீர்ணாப்ஸரோக³ணஸேவிதா ॥ 23 ॥
தத்ர வைஶ்ரவணோ ராஜா ஸர்வபூ⁴தனமஸ்க்ருத: ।
த⁴னதோ³ ரமதே ஶ்ரீமான்கு³ஹ்யகைஸ்ஸஹ யக்ஷராட் ॥ 24 ॥
தஸ்ய சந்த்³ரனிகாஶேஷு பர்வதேஷு கு³ஹாஸு ச ।
ராவண: ஸஹ வைதே³ஹ்யா மார்கி³தவ்யஸ்ததஸ்தத: ॥ 25 ॥
க்ரௌஞ்சம் து கி³ரிமாஸாத்³ய பி³லம் தஸ்ய ஸுது³ர்க³மம் ।
அப்ரமத்தை: ப்ரவேஷ்டவ்யம் து³ஷ்ப்ரவேஶம் ஹி தத்ஸ்ம்ருதம் ॥ 26 ॥
வஸந்தி ஹி மஹாத்மானஸ்தத்ர ஸூர்யஸமப்ரபா⁴: ।
தே³வைரப்யர்சிதா ஸ்ஸம்யக்³தே³வரூபா மஹர்ஷய: ॥ 27 ॥
க்ரௌஞ்சஸ்ய து கு³ஹாஶ்சான்யா ஸ்ஸானூனிஶிக²ராணி ச ।
நிர்த³ராஶ்ச நிதம்பா³ஶ்ச விசேதவ்யா ஸ்ததஸ்தத: ॥ 28 ॥
கௌஞ்சஸ்ய ஶிக²ரம் சாபி நிரீக்ஷ்ய ச ததஸ்தத: ।
அவ்ருக்ஷம் காமஶைலம் ச மானஸம் விஹகா³லயம் ।
ந க³திஸ்தத்ர பூ⁴தானாம் தே³வதா³னவ ரக்ஷஸாம் ॥ 29 ॥
ஸ ச ஸர்வைர்விசேதவ்யஸ்ஸஸானுப்ரஸ்த²பூ⁴த⁴ர: ।
க்ரௌஞ்சம் கி³ரிமதிக்ரம்ய மைனாகோ நாம பர்வத: ॥ 3௦ ॥
மயஸ்ய ப⁴வனம் யத்ர தா³னவஸ்ய ஸ்வயம் க்ருதம் ॥ 31 ॥
மைனாகஸ்து விசேதவ்ய ஸ்ஸஸானுப்ரஸ்த²கந்த³ர: ।
ஸ்த்ரீணாமஶ்வமுகீ²னாம் து நிகேதாஸ்தத்ர தத்ர து ॥ 32 ॥
தம் தே³ஶம் ஸமதிக்ரம்ய ஆஶ்ரமம் ஸித்³த⁴ஸேவிதம் ।
ஸித்³தா⁴ வைகா²னஸாஸ்தத்ர வாலகி²ல்யாஶ்ச தாபஸா: ॥ 33 ॥
வந்த்³யாஸ்தே து தபஸ்ஸித்³தா⁴ஸ்தபஸா வீதகல்மஷா: ।
ப்ரஷ்டவ்யா சாபி ஸீதாயா: ப்ரவ்ருத்திர்வினயான்விதை: ॥ 34 ॥
ஹேமபுஷ்கரஸஞ்ச²ன்னம் தஸ்மின் வைகா²னஸம் ஸர: ।
தருணாதி³த்யஸங்காஶைர்ஹம்ஸைர்விசரிதம் ஶுபை⁴: ॥ 35 ॥
ஔபவாஹ்ய: குபே³ரஸ்ய ஸார்வபௌ⁴ம இதி ஸ்ம்ருத: ।
கஜ³: பர்யேதி தம் தே³ஶம் ஸதா³ ஸஹ கரேணுபி⁴: ॥ 36 ॥
தத்ஸரஸ்ஸமதிக்ரம்ய நஷ்டசந்த்³ரதி³வாகரம் ।
அனக்ஷத்ரக³ணம் வ்யோம நிஷ்பயோத³மனாதி³தம் ॥ 37 ॥
க³ப⁴ஸ்திபி⁴ரிவார்கஸ்ய ஸ து தே³ஶ: ப்ரகாஶதே ।
விஶ்ராம்யத்³பி⁴ஸ்தபஸ்ஸித்³தை⁴ர்தே³வகல்பை: ஸ்வயம்ப்ரபை⁴: ॥ 38 ॥
தம் து தே³ஶமதிக்ரம்ய ஶைலோதா³ நாம நிம்னகா³ ।
உப⁴யோஸ்தீரயோஸ்தஸ்யா: கீசகா நாம வேணவ: ॥ 39 ॥
தே நயந்தி பரம் தீரம் ஸித்³தா⁴ன்ப்ரத்யானயந்தி ச ।
உத்தரா: குரவஸ்தத்ர க்ருதபுண்யப்ரதிஶ்ரயா: ॥ 4௦ ॥
தத: காஞ்சனபத்³மாபி⁴: பத்³பி⁴னீபி⁴: க்ருதோத³கா: ।
நீலவைடூ³ர்யபத்ராபி⁴ர்னத்³யஸ்தத்ர ஸஹஸ்ரஶ: ॥ 41 ॥
ரக்தோத்பலவனைஶ்சாத்ர மண்டி³தாஶ்ச ஹிரண்மயை: ।
தருணாதி³த்யஸங்காஶைர்பா⁴ந்தி தத்ர ஜலாஶயா: ॥ 42 ॥
மஹார்ஹமணிரத்னைஶ்ச காஞ்சனப்ரப⁴கேஸரை: ।
நிலோத்பலவனைஶ்சித்ரை ஸ்ஸ தே³ஶ ஸ்ஸர்வதோ வ்ருத: ॥ 43 ॥
நிஸ்துலாபி⁴ஶ்ச முக்தாபி⁴ர்மணிபி⁴ஶ்ச மஹாத⁴னை: ।
உத்³பூ⁴தபுலினாஸ்தத்ர ஜாதரூபைஶ்ச நிம்னகா³: ।
ஸர்வரத்னமயைஶ்சித்ரைரவகா³டா⁴ நகோ³த்தமை: ॥ 44 ॥
ஜாதரூபமயைஶ்சாபி ஹுதாஶனஸமப்ரபை⁴: ।
நித்யபுஷ்பப²லாஸ்தத்ர நகா³: பத்த்ரரதா²குலா: ॥ 45 ॥
தி³வ்யக³ந்த⁴ரஸஸ்பர்ஶா: ஸர்வான்காமான் ஸ்ரவந்தி ச ।
நானாகாராணி வாஸாம்ஸி ப²லந்த்யன்யே நகோ³த்தமா: ॥ 46 ॥
முக்தா வைடூ⁴ர்யசித்ராணி பூ⁴ஷணானி ததை²வ ச ।
ஸ்த்ரீணாம் சாப்யனுரூபாணி புருஷாணாம் ததை²வ ச ॥ 47 ॥
ஸர்வர்துஸுக² ஸேவ்யானி ப²லந்த்யன்யே நகோ³த்தமா: ।
மஹார்ஹாணி விசித்ராணி ஹைமான்யன்யே நகோ³த்தமா: ॥ 48 ॥
ஶயனானி ப்ரஸூயந்தே சித்ராஸ்தரணவந்தி ச ।
மன:காந்தானி மால்யானி ப²லந்த்யத்ராபரே த்³ருமா: ॥ 49 ॥
பானானி ச மஹார்ஹாணி ப⁴க்ஷ்யாணி விவிதா⁴னி ச ।
ஸ்த்ரியஶ்ச கு³ணஸம்பன்னா ரூபயௌவனலக்ஷிதா: ॥ 5௦ ॥
க³ந்த⁴ர்வா: கின்னராஸ்ஸித்³தா⁴ நாகா³ வித்³யாத⁴ராஸ்ததா² ।
ரமந்தே ஸததம் ஸ்தத்ர நாரீபி⁴ர்பா⁴ஸ்கரப்ரபா⁴: ॥ 51 ॥
ஸர்வே ஸுக்ருதகர்மாண ஸ்ஸர்வே ரதிபராயணா: ।
ஸர்வே காமார்த²ஸஹிதா வஸந்தி ஸஹயோஷித: ॥ 52 ॥
கீ³தவாதி³த்ரனிர்கோ⁴ஷ ஸ்ஸோத்க்ருஷ்டஹஸிதஸ்வன: ।
ஶ்ரூயதே ஸததம் தத்ர ஸர்வபூ⁴தமனோஹர: ॥ 53 ॥
தத்ர நாமுதி³த: கஶ்சின்னாஸ்தி கஶ்சித³ஸத்ப்ரிய: ।
அஹன்யஹனி வர்த⁴ந்தே கு³ணாஸ்தத்ர மனோரமா: ॥ 54 ॥
ஸமதிக்ரம்ய தம் தே³ஶமுத்தர: பயஸாம் நிதி⁴: ।
தத்ர ஸோமகி³ரிர்னாம மத்⁴யே ஹேமமயோ மஹான் ॥ 55 ॥
இந்த்³ரலோகக³தா யே ச ப்³ரஹ்மலோகக³தாஶ்ச யே ।
தே³வாஸ்தம் ஸமவேக்ஷந்தே கி³ரிராஜம் தி³வம் க³தா: ॥ 56 ॥
ஸ து தே³ஶோ விஸூர்யோபி தஸ்ய பா⁴ஸா ப்ரகாஶதே ।
ஸூர்யலக்ஷ்ம்யாபி⁴விஜ்ஞேயஸ்தபதேவ விவஸ்வதா ॥ 57 ॥
ப⁴க³வானபி விஶ்வாத்மா ஶம்பு⁴ரேகாத³ஶாத்மக: ।
ப்³ரஹ்மா வஸதி தே³வேஶோ ப்³ரஹ்மர்ஷிபரிவாரித: ॥ 58 ॥
ந கத²ஞ்சன க³ந்தவ்யம் குரூணாமுத்தரேண வ: ।
அன்யேஷாமபி பூ⁴தானாம் நாதிக்ராமதி வை க³தி: ॥ 59 ॥
ஸ ஹி ஸோமகி³ரிர்னாம தே³வானாமபி து³ர்க³ம: ।
தமாலோக்ய தத: க்ஷிப்ரமுபாவர்திதுமர்ஹத² ॥ 6௦ ॥
ஏதாவத்³வானரைஶ்ஶக்யம் க³ந்தும் வானரபுங்க³வா: ।
அபா⁴ஸ்கரமமர்யாத³ம் ந ஜானீமஸ்தத: பரம் ॥ 61 ॥
ஸர்வமேதத்³விசேதவ்யம் யன்மயா பரிகீர்திதம் ।
யத³ன்யத³பி நோக்தம் ச தத்ராபி க்ரியதாம் மதி: ॥ 62 ॥
தத: க்ருதம் தா³ஶரதே²ர்மஹத்ப்ரியம் மஹத்தரம் சாபி ததோ மம ப்ரியம் ।
க்ருதம் ப⁴விஷ்யத்யனிலானலோபமா விதே³ஹஜாத³ர்ஶனஜேன கர்மணா ॥ 63 ॥
தத: க்ருதார்தா²: ஸஹிதாஸ்ஸபா³ந்த⁴வா: மயார்சிதாஸ்ஸர்வகு³ணைர்மனோரமை: ।
சரிஷ்யதோ²ர்வீம் ப்ரதி ஶாந்தஶத்ரவ ஸ்ஸஹப்ரியா பூ⁴தத⁴ரா: ப்லவங்க³மா: ॥ 64 ॥
இத்யார்ஷே ஶ்ரீமத்³ராமாயணே வால்மீகீய ஆதி³காவ்யே கிஷ்கிந்தா⁴காண்டே³ த்ரிசத்வாரிம்ஶஸ்ஸர்க:³ ॥
