śrīmadvālmīkīya rāmāyaṇē sundarakāṇḍam ।
atha trayastriṃśassargaḥ ।
sō'vatīrya drumāttasmādvidrumapratimānanaḥ ।
vinītavēṣaḥ kṛpaṇaḥ praṇipatyōpasṛtya cha ॥ 1 ॥
tāmabravīnmahātējā hanūmānmārutātmajaḥ ।
śirasyañjalimādhāya sītāṃ madhurayā girā ॥ 2 ॥
kā nu padmapalāśākṣi kliṣṭakauśēyavāsini ।
drumasya śākhāmālambya tiṣṭhasi tvamaninditē ॥ 3 ॥
kimarthaṃ tava nētrābhyāṃ vāri sravati śōkajam ।
puṇḍarīkapalāśābhyāṃ viprakīrṇamivōdakam ॥ 4 ॥
surāṇāmasurāṇāṃ vā nāgagandharvarakṣasām ।
yakṣāṇāṃ kinnarāṇāṃ vā kā tvaṃ bhavasi śōbhanē ॥ 5 ॥
kā tvaṃ bhavasi rudrāṇāṃ marutāṃ vā varānanē ।
vasūnāṃ hi varārōhē dēvatā pratibhāsi mē ॥ 6 ॥
ki nu chandramasā hīnā patitā vibudhālayāt ।
rōhiṇī jyōtiṣāṃ śrēṣṭhā śrēṣṭhasarvaguṇānvitā ॥ 7 ॥
kā tvaṃ bhavasi kalyāṇi tvamaninditalōchanē ।
kōpādvā yadi vā mōhādbhartāramasitēkṣaṇē ॥ 8 ॥
vasiṣṭhaṃ kōpayitvā tvaṃ nāsi kalyāṇyarundhatī ।
kō nu putraḥ pitā bhrātā bhartā vā tē sumadhyamē ॥ 9 ॥
asmāllōkādamuṃ lōkaṃ gataṃ tvamanuśōchasi ।
rōdanādatiniśśvāsādbhūmisaṃsparśanādapi ॥ 10 ॥
na tvāṃ dēvīmahaṃ manyē rājña ssarvajñāvadhāraṇāt ।
vyañjanāni cha tē yāni lakṣaṇāni cha lakṣayē ॥ 11 ॥
mahiṣī bhūmipālasya rājakanyā cha mē matā ।
rāvaṇēna janasthānādbalādapadahṛtā yadi ॥ 12 ॥
sītā tvamasi bhadraṃ tē tanmamāchakṣva pṛchChataḥ ।
yathā hi tava vai dainyaṃ rūpaṃ chāpyatimānuṣam ॥ 13 ॥
tapasā chānvitō vēṣastvaṃ rāmamahiṣī dhruvam ।
sā tasya vachanaṃ śrutvā rāmakīrtanaharṣitā ॥ 14 ॥
uvācha vākyaṃ vaidēhī hanumantaṃ drumāśritam ।
pṛthivyāṃ rājasiṃhānāṃ mukhyasya viditātmanaḥ ॥ 15 ॥
snuṣā daśarathasyāhaṃ śatrusainyapratāpinaḥ ।
duhitā janakasyāhaṃ vaidēhasya mahātmanaḥ ॥ 16 ॥
sītēti nāma nāmnā'haṃ bhāryā rāmasya dhīmataḥ ।
samā dvādaśa tatrāhaṃ rāghavasya nivēśanē ॥ 17 ॥
bhuñjānā mānuṣānbhōgānsarvakāmasamṛddhinī ।
tatra trayōdaśē varṣē rājyēnēkṣvākunandanam ॥ 18 ॥
abhiṣēchayituṃ rājā sōpādhyāyaḥ prachakramē ।
tasminsambhriyamāṇē tu rāghavasyābhiṣēchanē ॥ 19 ॥
kaikayī nāma bhartāraṃ dēvī vachanamabravīt ।
na pibēyaṃ na khādēyaṃ pratyahaṃ mama bhōjanam ॥ 20 ॥
ēṣa mē jīvitasyāntō rāmō yadyabhiṣichyatē ।
yattaduktaṃ tvayā vākyaṃ prītyā nṛpatisattama ॥ 21 ॥
tachChēnna vitathaṃ kāryaṃ vanaṃ gachChatu rāghavaḥ ।
sa rājā satyavāgdēvyā varadānamanusmaran ॥ 22 ॥
mumōha vachanaṃ śrutvā kaikēyyāḥ krūramapriyam ।
tatastu sthavirō rājā satyē dharmē vyavasthitaḥ ॥ 23 ॥
jyēṣṭhaṃ yaśasvinaṃ putraṃ rudanrājyamayāchata ।
sa piturvachanaṃ śrīmānabhiṣēkātparaṃ priyam ॥ 24 ॥
manasā pūrvamāsādya vāchā pratigṛhītavān ।
dadyānna pratigṛhṇīyānna brūyātkiñchidapriyam ॥ 25 ॥
api jīvitahētōrvā rāmassatyaparākramaḥ ।
sa vihāyōttarīyāṇi mahārhāṇi mahāyaśāḥ ॥ 26 ॥
visṛjya manasā rājyaṃ jananyai māṃ samādiśat ।
sāhaṃ tasyāgratastūrṇaṃ prasthitā vanachāriṇī ॥ 27 ॥
na hi mē tēna hīnāyā vāsassvargē'pi rōchatē ।
prāgēva tu mahābhāgassaumitrirmitranandanaḥ ॥ 28 ॥
pūrvajasyānuyātrārthē drumachīrairalaṅkṛtaḥ ।
tē vayaṃ bharturādēśaṃ bahumānya dṛḍhavratāḥ ॥ 29 ॥
praviṣṭāssma purādṛṣṭaṃ vanaṃ gambhīradarśanam ।
vasatō daṇḍakāraṇyē tasyāhamamitaujasaḥ ॥ 30 ॥
rakṣasā'pahṛtā bhāryā rāvaṇēna durātmanā ।
dvau māsau tēna mē kālō jīvitānugrahaḥ kṛtaḥ ॥ 31 ॥
ityārṣē śrīmadrāmāyaṇē vālmīkīya ādikāvyē sundarakāṇḍē trayastriṃśassargaḥ ॥
