ශ්රීමද්වාල්මීකීය රාමායණේ සුංදරකාංඩම් ।
අථ ත්රයස්ත්රිංශස්සර්ගඃ ।
සෝऽවතීර්ය ද්රුමාත්තස්මාද්විද්රුමප්රතිමානනඃ ।
විනීතවේෂඃ කෘපණඃ ප්රණිපත්යෝපසෘත්ය ච ॥ 1 ॥
තාමබ්රවීන්මහාතේජා හනූමාන්මාරුතාත්මජඃ ।
ශිරස්යංජලිමාධාය සීතාං මධුරයා ගිරා ॥ 2 ॥
කා නු පද්මපලාශාක්ෂි ක්ලිෂ්ටකෞශේයවාසිනි ।
ද්රුමස්ය ශාඛාමාලංබ්ය තිෂ්ඨසි ත්වමනිංදිතේ ॥ 3 ॥
කිමර්ථං තව නේත්රාභ්යාං වාරි ස්රවති ශෝකජම් ।
පුංඩරීකපලාශාභ්යාං විප්රකීර්ණමිවෝදකම් ॥ 4 ॥
සුරාණාමසුරාණාං වා නාගගංධර්වරක්ෂසාම් ।
යක්ෂාණාං කින්නරාණාං වා කා ත්වං භවසි ශෝභනේ ॥ 5 ॥
කා ත්වං භවසි රුද්රාණාං මරුතාං වා වරානනේ ।
වසූනාං හි වරාරෝහේ දේවතා ප්රතිභාසි මේ ॥ 6 ॥
කි නු චංද්රමසා හීනා පතිතා විබුධාලයාත් ।
රෝහිණී ජ්යෝතිෂාං ශ්රේෂ්ඨා ශ්රේෂ්ඨසර්වගුණාන්විතා ॥ 7 ॥
කා ත්වං භවසි කල්යාණි ත්වමනිංදිතලෝචනේ ।
කෝපාද්වා යදි වා මෝහාද්භර්තාරමසිතේක්ෂණේ ॥ 8 ॥
වසිෂ්ඨං කෝපයිත්වා ත්වං නාසි කල්යාණ්යරුංධතී ।
කෝ නු පුත්රඃ පිතා භ්රාතා භර්තා වා තේ සුමධ්යමේ ॥ 9 ॥
අස්මාල්ලෝකාදමුං ලෝකං ගතං ත්වමනුශෝචසි ।
රෝදනාදතිනිශ්ශ්වාසාද්භූමිසංස්පර්ශනාදපි ॥ 10 ॥
න ත්වාං දේවීමහං මන්යේ රාජ්ඤ ස්සර්වජ්ඤාවධාරණාත් ।
ව්යංජනානි ච තේ යානි ලක්ෂණානි ච ලක්ෂයේ ॥ 11 ॥
මහිෂී භූමිපාලස්ය රාජකන්යා ච මේ මතා ।
රාවණේන ජනස්ථානාද්බලාදපදහෘතා යදි ॥ 12 ॥
සීතා ත්වමසි භද්රං තේ තන්මමාචක්ෂ්ව පෘච්ඡතඃ ।
යථා හි තව වෛ දෛන්යං රූපං චාප්යතිමානුෂම් ॥ 13 ॥
තපසා චාන්විතෝ වේෂස්ත්වං රාමමහිෂී ධ්රුවම් ।
සා තස්ය වචනං ශ්රුත්වා රාමකීර්තනහර්ෂිතා ॥ 14 ॥
උවාච වාක්යං වෛදේහී හනුමංතං ද්රුමාශ්රිතම් ।
පෘථිව්යාං රාජසිංහානාං මුඛ්යස්ය විදිතාත්මනඃ ॥ 15 ॥
ස්නුෂා දශරථස්යාහං ශත්රුසෛන්යප්රතාපිනඃ ।
දුහිතා ජනකස්යාහං වෛදේහස්ය මහාත්මනඃ ॥ 16 ॥
සීතේති නාම නාම්නාऽහං භාර්යා රාමස්ය ධීමතඃ ।
සමා ද්වාදශ තත්රාහං රාඝවස්ය නිවේශනේ ॥ 17 ॥
භුංජානා මානුෂාන්භෝගාන්සර්වකාමසමෘද්ධිනී ।
තත්ර ත්රයෝදශේ වර්ෂේ රාජ්යේනේක්ෂ්වාකුනංදනම් ॥ 18 ॥
අභිෂේචයිතුං රාජා සෝපාධ්යායඃ ප්රචක්රමේ ।
තස්මින්සංභ්රියමාණේ තු රාඝවස්යාභිෂේචනේ ॥ 19 ॥
කෛකයී නාම භර්තාරං දේවී වචනමබ්රවීත් ।
න පිබේයං න ඛාදේයං ප්රත්යහං මම භෝජනම් ॥ 20 ॥
ඒෂ මේ ජීවිතස්යාංතෝ රාමෝ යද්යභිෂිච්යතේ ।
යත්තදුක්තං ත්වයා වාක්යං ප්රීත්යා නෘපතිසත්තම ॥ 21 ॥
තච්ඡේන්න විතථං කාර්යං වනං ගච්ඡතු රාඝවඃ ।
ස රාජා සත්යවාග්දේව්යා වරදානමනුස්මරන් ॥ 22 ॥
මුමෝහ වචනං ශ්රුත්වා කෛකේය්යාඃ ක්රූරමප්රියම් ।
තතස්තු ස්ථවිරෝ රාජා සත්යේ ධර්මේ ව්යවස්ථිතඃ ॥ 23 ॥
ජ්යේෂ්ඨං යශස්විනං පුත්රං රුදන්රාජ්යමයාචත ।
ස පිතුර්වචනං ශ්රීමානභිෂේකාත්පරං ප්රියම් ॥ 24 ॥
මනසා පූර්වමාසාද්ය වාචා ප්රතිගෘහීතවාන් ।
දද්යාන්න ප්රතිගෘහ්ණීයාන්න බ්රූයාත්කිංචිදප්රියම් ॥ 25 ॥
අපි ජීවිතහේතෝර්වා රාමස්සත්යපරාක්රමඃ ।
ස විහායෝත්තරීයාණි මහාර්හාණි මහායශාඃ ॥ 26 ॥
විසෘජ්ය මනසා රාජ්යං ජනන්යෛ මාං සමාදිශත් ।
සාහං තස්යාග්රතස්තූර්ණං ප්රස්ථිතා වනචාරිණී ॥ 27 ॥
න හි මේ තේන හීනායා වාසස්ස්වර්ගේऽපි රෝචතේ ।
ප්රාගේව තු මහාභාගස්සෞමිත්රිර්මිත්රනංදනඃ ॥ 28 ॥
පූර්වජස්යානුයාත්රාර්ථේ ද්රුමචීරෛරලංකෘතඃ ।
තේ වයං භර්තුරාදේශං බහුමාන්ය දෘඪව්රතාඃ ॥ 29 ॥
ප්රවිෂ්ටාස්ස්ම පුරාදෘෂ්ටං වනං ගංභීරදර්ශනම් ।
වසතෝ දංඩකාරණ්යේ තස්යාහමමිතෞජසඃ ॥ 30 ॥
රක්ෂසාऽපහෘතා භාර්යා රාවණේන දුරාත්මනා ।
ද්වෞ මාසෞ තේන මේ කාලෝ ජීවිතානුග්රහඃ කෘතඃ ॥ 31 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ත්රයස්ත්රිංශස්සර්ගඃ ॥
