শ্রীমদ্বাল্মীকীয় রামাযণে সুংদরকাংডম্ ।
অথ সপ্তচত্বারিংশস্সর্গঃ ।
সেনাপতীন্পংচ স তু প্রমাপিতান্ হনূমতা সানুচরান্সবাহনান্ ।
সমীক্ষ্য় রাজা সমরোদ্ধতোন্মুখং কুমারমক্ষং প্রসমৈক্ষতাগ্রতঃ ॥ 1 ॥
স তস্য় দৃষ্ট্যর্পণসংপ্রচোদিতঃ প্রতাপবান্কাংচনচিত্রকার্মুকঃ ।
সমুত্পপাতাথ সদস্য়ুদীরিতো দ্বিজাতিমুখ্য়ৈর্হবিষেব পাবকঃ ॥ 2 ॥
ততো মহদ্বালদিবাকরপ্রভং প্রতপ্তজাংবূনদজালসংততম্ ।
রথং সমাস্থায় যয়ৌ স বীর্যবান্মহাহরিং তং প্রতি নৈরৃতর্ষভঃ ॥ 3 ॥
ততস্তপস্সংগ্রহসংচয়ার্জিতং প্রতপ্তজাংবূনদজালশোভিতম্ ।
পতাকিনং রত্নবিভূষিতধ্বজং মনোজবাষ্টাশ্ববরৈঃ সুয়োজিতম্ ॥ 4 ॥
সুরাসুরাধৃষ্যমসংগচারিণং রবিপ্রভং ব্য়োমচরং সমাহিতম্ ।
সতূণমষ্টাসিনিবদ্ধবংধুরং যথাক্রমাবেশিতশক্তিতোমরম্ ॥ 5 ॥
বিরাজমানং প্রতিপূর্ণবস্তুনা সহেমদাম্না শশিসূর্যবর্চসা ।
দিবাকরাভং রথমাস্থিতস্ততস্স নির্জগামামরতুল্যবিক্রমঃ ॥ 6 ॥
স পূরযন্খং চ মহীং চ সাচলাং তুরংগমাতংগমহারথস্বনৈঃ ।
বলৈস্সমেতৈস্সহি তোরণস্থিতং সমর্থমাসীনমুপাগমত্কপিম্ ॥ 7 ॥
স তং সমাসাদ্য় হরিং হরীক্ষণো যুগাংতকালাগ্নিমিব প্রজাক্ষয়ে ।
অবস্থিতং বিস্মিতজাতসংভ্রম স্সমৈক্ষতাক্ষো বহুমানচক্ষুষা ॥ 8 ॥
স তস্য় বেগং চ কপের্মহাত্মনঃ পরাক্রমং চারিষু পার্থিবাত্মজঃ ।
বিচারযন্স্বং চ বলং মহাবলো হিমক্ষয়ে সূর্য় ইবাভিবর্ধতে ॥ 9 ॥
স জাতমন্য়ুঃ প্রসমীক্ষ্য় বিক্রমং স্থিরং স্থিরস্সম্যতি দুর্নিবারণম্ ।
সমাহিতাত্মা হনুমংতমাহবে প্রচোদয়ামাস শরৈস্ত্রিভি শ্শিতৈঃ ॥ 10 ॥
ততঃ কপিং তং প্রসমীক্ষ্য় গর্বিতং জিতশ্রমং শত্রুপরাজয়োর্জিতম্ ।
অবৈক্ষতাক্ষস্সমুদীর্ণমানসস্সবাণপাণিঃ প্রগৃহীতকার্মুকঃ ॥ 11 ॥
স হেমনিষ্কাংগদচারুকুংডল স্সমাসসাদাঽশুপরাক্রমঃ কপিম্ ।
তয়োর্বভূবাপ্রতিমস্সমাগম স্সুরাসুরাণামপি সংভ্রমপ্রদঃ ॥ 12 ॥
ররাস ভূমির্ন ততাপ ভানুমা ন্বনৌ ন বায়ুঃ প্রচাচল চাচলঃ ।
কপেঃ কুমারস্য় চ বীক্ষ্য় সংয়ুগং ননাদ চ দ্য়ৌরুদধিশ্চ চুক্ষুভে ॥ 13 ॥
ততস্স বীরস্সুমুখান্ পতত্রিণস্সুবর্ণপুংখান্সবিষানিবোরগান্ ।
সমাধিসম্য়োগবিমোক্ষতত্ত্ববিচ্ছরানথ ত্রীন্কপিমূর্ধ্ন্যপাতযত্ ॥ 14 ॥
স তৈ শ্শরৈর্মূর্ধ্নি সমং নিপাতিতৈঃ ক্ষরন্নসৃগ্দিগ্ধবিবৃত্তলোচনঃ ।
নবোদিতাদিত্যনিভ শ্শরাংশুমান্ ব্যরাজতাদিত্য় ইবাংশুমালিকঃ ॥ 15 ॥
ততস্স পিংগাধিপমংত্রিসত্তমঃ সমীক্ষ্য় তং রাজবরাত্মজং রণে ।
উদগ্রচিত্রায়ুধচিত্রকার্মুকং জহর্ষ চাপূর্যত চাহবোন্মুখঃ ॥ 16 ॥
স মংদরাগ্রস্থ ইবাংশুমালিকো বিবৃদ্ধকোপো বলবীর্যসংয়ুতঃ ।
কুমারমক্ষং সবলং সবাহনং দদাহ নেত্রাগ্নিমরীচিভিস্তদা ॥ 17 ॥
ততস্স বাণাসনচিত্রকার্মুক শ্শরপ্রবর্ষো যুধি রাক্ষসাংবুদঃ ।
শরান্মুমোচাশু হরীশ্বরাচলে বলাহকো বৃষ্টিমিবাচলোত্তমে ॥ 18 ॥
ততঃ কপিস্তং রণচংডবিক্রমং বিবৃদ্ধতেজোবলবীর্যসংয়ুতম্ ।
কুমারমক্ষং প্রসমীক্ষ্য় সংয়ুগে ননাদ হর্ষাদ্ ঘনতুল্যবিক্রমম্ ॥ 19 ॥
স বালভাবাদ্য়ুধি বীর্যদর্পিতঃ প্রবৃদ্ধমন্য়ুঃ ক্ষতজোপমেক্ষণঃ ।
সমাসসাদাপ্রতিমং কপিং রণে গজো মহাকূপমিবাবৃতং তৃণৈঃ ॥ 20 ॥
স তেন বাণৈঃ প্রসভং নিপাতিতৈশ্চকার নাদং ঘননাদনিস্স্বনঃ ।
সমুত্পপাতাশু নভস্স মারুতির্ভুজোরুবিক্ষেপণঘোরদর্শনঃ ॥ 21 ॥
সমুত্পতংতং সমভিদ্রবদ্বলী স রাক্ষসানাং প্রবরঃ প্রতাপবান্ ।
রথী রথিশ্রেষ্ঠতমঃ কিরন্শরৈঃ পয়োধরশ্শৈলমিবাশ্মবৃষ্টিভিঃ ॥ 22 ॥
স তান্শরাংস্তস্য় হরির্বিমোক্ষয়ংশ্চচার বীরঃ পথি বায়ুসেবিতে ।
শরাংতরে মারুতবদ্বিনিষ্পতন্মনোজবস্সংযতি চংডবিক্রমঃ ॥ 23 ॥
তমাত্তবাণাসনমাহবোন্মুখং খমাস্তৃণংতং বিশিখৈশ্শরোত্তমৈঃ ।
অবৈক্ষতাক্ষং বহুমানচক্ষুষা জগাম চিংতাং চ স মারুতাত্মজঃ ॥ 24 ॥
ততশ্শরৈর্ভিন্নভুজাংতরঃ কপিঃ কুমারবীরেণ মহাত্মনা নদন্ ।
মহাভুজঃ কর্মবিশেষতত্ত্ববি দ্বিচিংতয়ামাস রণে পরাক্রমম্ ॥ 25 ॥
অবালবদ্বালদিবাকরপ্রভঃ করোত্যয়ং কর্ম মহন্মহাবলঃ ।
ন চাস্য় সর্বাহবকর্মশোভিনঃ প্রমাপণে মে মতিরত্র জাযতে ॥ 26 ॥
অয়ং মহাত্মা চ মহাংশ্চ বীর্যত স্সমাহিতশ্চাতিসহশ্চ সংয়ুগে ।
অসংশয়ং কর্মগুণোদয়াদয়ং সনাগযক্ষৈর্মুনিভিশ্চ পূজিতঃ ॥ 27 ॥
পরাক্রমোত্সাহবিবৃদ্ধমানস স্সমীক্ষতে মাং প্রমুখাগ্রতঃস্থিতঃ ।
পরাক্রমো হ্যস্য় মনাংসি কংপয়েত্সুরাসুরাণামপি শীঘ্রগামিনঃ ॥ 28 ॥
ন খল্বয়ং নাভিভবেদুপেক্ষিতঃ পরাক্রমো হ্যস্য় রণে বিবর্ধতে ।
প্রমাপণং ত্বেব মমাদ্য় রোচতে ন বর্ধমানোঽগ্নিরুপেক্ষিতুং ক্ষমঃ ॥ 29 ॥
ইতি প্রবেগং তু পরস্য় চিংতযন্স্বকর্ময়োগং চ বিধায় বীর্যবান্ ।
চকার বেগং তু মহাবলস্তদা মতিং চ চক্রেঽস্য় বধে মহাকপিঃ ॥ 30 ॥
স তস্য় তানষ্টহয়ান্মহাজবান্ সমাহিতান্ভারসহান্বিবর্তনে ।
জঘান বীরঃ পথি বায়ুসেবিতে তলপ্রহারৈঃ পবনাত্মজঃ কপিঃ ॥ 31 ॥
ততস্তলেনাভিহতো মহারথ স্স তস্য় পিংগাধিপমংত্রিনির্জিতঃ ।
প্রভগ্ননীডঃ পরিমুক্তকূবরঃ পপাত ভূমৌ হতবাজিরংবরাত্ ॥ 32 ॥
স তং পরিত্যজ্য় মহারথো রথং সকার্মুকঃ খংগধরঃ খমুত্পতন্ ।
তপোঽভিয়োগাদৃষিরুগ্রবীর্যবান্বিহায় দেহং মরুতামিবালযম্ ॥ 33 ॥
ততঃ কপিস্তং বিচরংতমংবরে পতত্রিরাজানিলসিদ্ধসেবিতে ।
সমেত্য় তং মারুততুল্যবিক্রমঃ ক্রমেণ জগ্রাহ স পাদয়োর্দৃঢম্ ॥ 34 ॥
স তং সমাবিধ্য় সহস্রশঃ কপির্মহোরগং গৃহ্য় ইবাংডজেশ্বরঃ ।
মুমোচ বেগাত্পিতৃতুল্যবিক্রমো মহীতলে সংযতি বানরোত্তমঃ ॥ 35 ॥
স ভগ্নবাহূরুকটীশিরোধরঃ ক্ষরন্নসৃঙিনর্মথিতাস্থিলোচনঃ ।
সংভগ্নসংধিঃ প্রবিকীর্ণবংধনো হতঃ ক্ষিতৌ বায়ুসুতেন রাক্ষসঃ ॥ 36 ॥
মহাকপির্ভূমিতলে নিপীড্য় তং চকার রক্ষোধিপতের্মহদ্ভযম্ ।
মহর্ষিভিশ্চক্রচরৈর্মহাব্রতৈ স্সমেত্য় ভূতৈশ্চ সযক্ষপন্নগৈঃ ॥ 37 ॥
সুরৈশ্চ সেংদ্রৈর্ভৃশজাতবিস্ময়ৈ র্হতে কুমারে স কপির্নিরীক্ষিতঃ ।
নিহত্য় তং বজ্রিসুতোপমপ্রভং কুমারমক্ষং ক্ষতজোপমেক্ষণম্ ।
তমেব বীরোঽভিজগাম তোরণং কৃতক্ষণঃ কাল ইব প্রজাক্ষয়ে ॥ 38 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে সুংদরকাংডে সপ্তচত্বারিংশস্সর্গঃ ॥
