ශ්රීමද්වාල්මීකීය රාමායණේ සුංදරකාංඩම් ।
අථ ත්රිපංචාශස්සර්ගඃ ।
තස්ය තද්වචනං ශ්රුත්වා දශග්රීවෝ මහාත්මනඃ ।
දේශකාලහිතං වාක්යං භ්රාතුරුත්තරමබ්රවීත් ॥ 1 ॥
සම්යගුක්තං හි භවතා දූතවධ්යා විගර්හිතා ।
අවශ්යං තු වධාදන්යඃ ක්රියතාමස්ය නිග්රහඃ ॥ 2 ॥
කපීනාං කිල ලාංගූලමිෂ්ටං භවති භූෂණම් ।
තදස්ය දීප්යතාං ශීඝ්රං තේන දග්ධේන ගච්ඡතු ॥ 3 ॥
තතඃ පශ්යංත්විමං දීනමංගවෛරූප්යකර්ශිතම් ।
සමිත්රජ්ඤාතයස්සර්වේ බාංධවාඃ සසුහෘජ්ජනාඃ ॥ 4 ॥
ආජ්ඤාපයද්රාක්ෂසේංද්රඃ පුරං සර්වං සචත්වරම් ।
ලාංගූලේන ප්රදීප්තේන රක්ෂෝභිඃ පරිණීයතාම් ॥ 5 ॥
තස්ය තද්වචනං ශ්රුත්වා රාක්ෂසාඃ කෝපකර්ශිතාඃ ।
වේෂ්ටයංති ස්ම ලාංගූලං ජීර්ණෛඃ කාර්පාසකෛඃ පටෛඃ ॥ 6 ॥
සංවේෂ්ට්යමානේ ලාංගූලේ ව්යවර්ධත මහාකපිඃ ।
ශුෂ්කමිංධනමාසාද්ය වනේෂ්විව හුතාශනඃ ॥ 7 ॥
තෛලේන පරිෂිච්යාථ තේऽග්නිං තත්රාභ්යපාතයන් ।
ලාංගූලේන ප්රදීප්තේන රාක්ෂසාංස්තානපාතයත් ॥ 8 ॥
රෝෂාමර්ෂපරීතාත්මා බාලසූර්යසමානනඃ ।
ලාංගූලං සංප්රදීප්තං තු ද්රෂ්ටුං තස්ය හනූමතඃ ॥ 9 ॥
සහස්ත්රීබාලවෘද්ධාශ්ච ජග්මුඃ ප්රීතා නිශාචරාඃ ।
ස භූයඃ සංගතෛඃ ක්රූරෛර්රාක්ෂසෛර්හරිසත්තමඃ ॥ 10 ॥
නිබද්ධඃ කෘතවාන්වීරස්තත්කාලසදෘශීං මතිම් ।
කාමං ඛලු න මේ ශක්තා නිබද්ධස්යාපි රාක්ෂසාඃ ॥ 11 ॥
ඡිත්ත්වා පාශාන් සමුත්පත්ය හන්යාමහමිමාන්පුනඃ ।
යදි භර්තුර්හිතාර්ථාය චරංතං භර්තෘශාසනාත් ॥ 12 ॥
බධ්නංත්යේතේ දුරාත්මනෝ න තු මේ නිෂ්කෘතිඃ කෘතා ।
සර්වේෂාමේව පර්යාප්තෝ රාක්ෂසානාමහං යුධි ॥ 13 ॥
කිංතු රාමස්ය ප්රීත්යර්ථං විෂහිෂ්යේऽහමීදෘශම් ।
ලංකා චාරයිතව්යා වෛ පුනරේව භවේදිති ॥ 14 ॥
රාත්රෞ න හි සුදෘෂ්ටා මේ දුර්ගකර්මවිධානතඃ ।
අවශ්යමේව ද්රෂ්ටව්යා මයා ලංකා නිශාක්ෂයේ ॥ 15 ॥
කාමං බද්ධස්ය මේ භූයඃ පුච්ඡස්යෝද්දීපනේන ච ।
පීඩාං කුර්වංතු රක්ෂාංසි න මේऽස්ති මනසශ්ශ්රමඃ ॥ 16 ॥
තතස්තේ සංවෘතාකාරං සත්ත්වවංතං මහාකපිම් ।
පරිගෘහ්ය යයුර්හෘෂ්ටා රාක්ෂසාඃ කපිකුංජරම් ॥ 17 ॥
ශංඛභේරීනිනාදෛස්තං ඝෝෂයංතඃ ස්වකර්මභිඃ ।
රාක්ෂසාඃ ක්රූරකර්මාණශ්චාරයංති ස්ම තාං පුරීම් ॥ 18 ॥
අන්වීයමානෝ රක්ෂෝභිර්යයෞ සුඛමරිංදමඃ ।
හනුමාංශ්චාරයාමාස රාක්ෂසානාං මහාපුරීම් ॥ 19 ॥
අථාපශ්යද්විමානානි විචිත්රාණි මහාකපිඃ ।
සංවෘතාන් භූමිභාගාංශ්ච සුවිභක්තාංශ්ච චත්වරාන් ॥ 20 ॥
වීථීශ්ච ගෘහසංබාධාඃ කපිශ්ශෘංගාටකානි ච ।
තථා රථ්යෝපරථ්යාශ්ච තථෛව ගෘහකාංතරාන් ॥ 21 ॥
ගෘහාංශ්ච මේඝසංකාශාන් දදර්ශ පවනාත්මජඃ ।
චත්වරේෂු චතුෂ්කේෂු රාජමාර්ගේ තථෛව ච ॥ 22 ॥
ඝෝෂයංති කපිං සර්වේ චාරීක ඉති රාක්ෂසාඃ ।
ස්ත්රීබාලවෘද්ධාඃ නිර්ජග්මුස්තත්ර තත්ර කුතූහලාත් ॥ 23 ॥
තං ප්රදීපිතලාංගූලං හනුමංතං දිදෘක්ෂවඃ ।
දීප්යමානේ තතස්තත්ර ලාංගූලාග්රේ හනූමතඃ ॥ 24 ॥
රාක්ෂස්යස්තා විරූපාක්ෂ්ය ශ්ශංසුර්දේව්යාස්තදප්රියම් ।
යස්ත්වයා කෘතසංවාද ස්සීතේ තාම්රමුඛඃ කපිඃ ॥ 25 ॥
ලාංගූලේන ප්රදීප්තේන ස ඒෂ පරිණීයතේ ।
ශ්රුත්වා තද්වචනං ක්රූරමාත්මාපහරණෝපමම් ॥ 26 ॥
වෛදේහී ශෝකසංතප්තා හුතාශනමුපාගමත් ।
මංගලාභිමුඛී තස්ය සා තදාऽසීන්මහාකපේඃ ॥ 27 ॥
උපතස්ථේ විශාලාක්ෂී ප්රයතා හව්යවාහනම් ।
යද්යස්ති පතිශුශ්රූෂා යද්යස්ති චරිතං තපඃ ।
යදි චාස්ත්යේකපත්නීත්වං ශීතෝ භව හනූමතඃ ॥ 28 ॥
යදි කිංචිදනුක්රෝශස්තස්ය මය්යස්ති ධීමතඃ ॥ 29 ॥
යදි වා භාග්යශේෂෝ මේ ශීතෝ භව හනූමතඃ ।
යදි මාං වෘත්තසංපන්නාං තත්සමාගමලාලසාම් ॥ 30 ॥
ස විජානාති ධර්මාත්මා ශීතෝ භව හනූමතඃ ।
යදි මාං තාරයේදාර්යස්සුග්රීවඃ සත්යසංගරඃ ॥ 31 ॥
අස්මාද්ධුඃඛාංබුසංරෝධාච්ඡීතෝ භව හනූමතඃ ।
තතස්තීක්ෂ්ණාර්චිරව්යග්රඃ ප්රදක්ෂිණශිඛෝऽනලඃ ॥ 32 ॥
ජජ්වාල මෘගශාබාක්ෂ්යා ශ්ශංසන්නිව ශිවං කපේඃ ।
හනුමජ්ජනකශ්චාපි පුච්ඡානලයුතෝऽනිලඃ ॥ 33 ॥
වවෞ ස්වාස්ථ්යකරෝ දේව්යාඃ ප්රාලේයානිලශීතලඃ ।
දහ්යමානේ ච ලාංගූලේ චිංතයාමාස වානරඃ ॥ 34 ॥
ප්රදීප්තෝऽග්නිරයං කස්මාන්න මාං දහති සර්වතඃ ।
දෘශ්යතේ ච මහාජ්වාලඃ කරෝති න ච මේ රුජම් ॥ 35 ॥
ශිශිරස්යේව සංඝාතෝ ලාංගූලාග්රේ ප්රතිෂ්ඨිතඃ ।
අථවා තදිදං ව්යක්තං යද්දෘෂ්ටං ප්ලවතා මයා ॥ 36 ॥
රාමප්රභාවාදාශ්චර්යං පර්වත ස්සරිතාං පතෞ ।
යදි තාවත්සමුද්රස්ය මෛනාකස්ය ච ධීමතඃ ॥ 37 ॥
රාමාර්ථං සංභ්රමස්තාදෘක්කිමග්නිර්න කරිෂ්යති ।
සීතායාශ්චානෘශංස්යේන තේජසා රාඝවස්ය ච ॥ 38 ॥
පිතුශ්ච මම සඛ්යේන න මාං දහති පාවකඃ ।
භූයස්ස චිංතයාමාස මුහූර්තං කපිකුංජරඃ ॥ 39 ॥
උත්පපාතාථ වේගේන නනාද ච මහාකපිඃ ।
පුරද්වාරං තතශ්ශ්රීමාන් ශෛලශෘංගමිවෝන්නතම් ॥ 40 ॥
විභක්තරක්ෂස්සංබාධමාසසාදානිලාත්මජඃ ।
ස භූත්වා ශෛලසංකාශඃ ක්ෂණේන පුනරාත්මවාන් ॥ 41 ॥
හ්රස්වතාං පරමාං ප්රාප්තෝ බංධනාන්යවශාතයත් ।
විමුක්තශ්චාභවඡ්රචීමාන් පුනඃ පර්වතසන්නිභඃ ॥ 42 ॥
වීක්ෂමාණශ්ච දදෘශේ පරිඝං තෝරණාශ්රිතම් ।
ස තං ගෘහ්ය මහාබාහුඃ කාලායසපරිෂ්කෘතම් ॥ 43 ॥
රක්ෂිණස්තාන් පුනස්සර්වාන්සූදයාමාස මාරුතිඃ ।
ස තාන්නිහත්ත්වා රණචංඩවික්රම ස්සමීක්ෂමාණඃ පුනරේව ලංකාම් ।
ප්රදීප්තලාංගූලකෘතාර්චිමාලී ප්රකාශතාදිත්ය ඉවාර්චිමාලී ॥ 44 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ත්රිපංචාශස්සර්ගඃ ॥
