ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ଷଟ୍ପଂଚାଶସ୍ସର୍ଗଃ ।
ତତସ୍ତୁ ଶିଂଶୁପାମୂଲେ ଜାନକୀଂ ପର୍ୟୁପସ୍ଥିତାମ୍ ।
ଅଭିଵାଦ୍ୟାବ୍ରଵୀଦ୍ଦିଷ୍ଟ୍ୟା ପଶ୍ୟାମି ତ୍ଵାମିହାକ୍ଷତାମ୍ ॥ 1 ॥
ତତସ୍ତଂ ପ୍ରସ୍ଥିତଂ ସୀତା ଵୀକ୍ଷମାଣା ପୁନଃ ପୁନଃ ।
ଭର୍ତୃସ୍ନେହାନ୍ଵିତଂ ଵାକ୍ୟଂ ହନୁମଂତମଭାଷତ ॥ 2 ॥
କାମମସ୍ୟ ତ୍ଵମେଵୈକଃ କାର୍ୟସ୍ୟ ପରିସାଧନେ ।
ପର୍ୟାପ୍ତଃ ପରଵୀରଘ୍ନ ୟଶସ୍ୟସ୍ତେ ବଲୋଦୟଃ ॥ 3 ॥
ଶରୈସ୍ତୁ ସଂକୁଲାଂ କୃତ୍ଵା ଲଂକାଂ ପରବଲାର୍ଦନଃ ।
ମାଂ ନୟେଦ୍ୟଦି କାକୁତ୍ସ୍ଥସ୍ତତ୍ତସ୍ୟ ସଦୃଶଂ ଭଵେତ୍ ॥ 4 ॥
ତଦ୍ୟଥା ତସ୍ୟ ଵିକ୍ରାଂତମନୁରୂପଂ ମହାତ୍ମନଃ ।
ଭଵତ୍ୟାହଵଶୂରସ୍ୟ ତଥା ତ୍ଵମୁପପାଦୟ ॥ 5 ॥
ତଦର୍ଥୋପହିତଂ ଵାକ୍ୟଂ ପ୍ରଶ୍ରିତଂ ହେତୁସଂହିତମ୍ ।
ନିଶମ୍ୟ ହନୁମାଂସ୍ତସ୍ୟା ଵାକ୍ୟମୁତ୍ତରମବ୍ରଵୀତ୍ ॥ 6 ॥
କ୍ଷିପ୍ରମେଷ୍ୟତି କାକୁତ୍ସ୍ଥଃ ହର୍ୟୃକ୍ଷପ୍ରଵରୈର୍ଵୃତଃ ।
ୟସ୍ତେ ୟୁଧି ଵିଜିତ୍ୟାରୀନ୍ ଶୋକଂ ଵ୍ୟପନୟିଷ୍ୟତି ॥ 7 ॥
ଏଵମାଶ୍ଵାସ୍ୟ ଵୈଦେହୀଂ ହନୁମାନ୍ ମାରୁତାତ୍ମଜଃ ।
ଗମନାୟ ମତିଂ କୃତ୍ଵା ଵୈଦେହୀମଭ୍ୟଵାଦୟତ୍ ॥ 8 ॥
ତତସ୍ସ କପିଶାର୍ଦୂଲଃ ସ୍ଵାମିସଂଦର୍ଶନୋତ୍ସୁକଃ ।
ଆରୁରୋହ ଗିରିଶ୍ରେଷ୍ଠମରିଷ୍ଟମରିମର୍ଦନଃ ॥ 9 ॥
ତୁଂଗପଦ୍ମକଜୁଷ୍ଟାଭିର୍ନୀଲାଭିର୍ଵନରାଜିଭିଃ ।
ସୋତ୍ତରୀୟମିଵାଂଭୋଦୈଃ ଶୃଂଗାଂତରଵିଲଂବିଭିଃ ॥ 10 ॥
ବୋଧ୍ୟମାନମିଵ ପ୍ରୀତ୍ୟା ଦିଵାକରକରୈଶ୍ଶୁଭୈଃ ।
ଉନ୍ମିଷଂତମିଵୋଦ୍ଧୂତୈର୍ଲୋଚନୈରିଵ ଧାତୁଭିଃ ॥ 11 ॥
ତୋୟୌଘନନିସ୍ସ୍ଵନୈର୍ମଂଦ୍ରୈଃ ପ୍ରାଧୀତମିଵ ପର୍ଵତମ୍ ।
ପ୍ରଗୀତମିଵ ଵିସ୍ପଷ୍ଟୈର୍ନାନାପ୍ରସ୍ରଵଣସ୍ଵନୈଃ ॥ 12 ॥
ଦେଵଦାରୁଭିରତ୍ୟୁଚ୍ଚୈରୂର୍ଧ୍ଵବାହୁମିଵ ସ୍ଥିତମ୍ ।
ପ୍ରପାତଜଲନିର୍ଘୋଷୈଃ ପ୍ରାକ୍ରୁଷ୍ଟମିଵ ସର୍ଵତଃ ॥ 13 ॥
ଵେପମାନମିଵ ଶ୍ୟାମୈଃ କଂପମାନୈଶ୍ଶରଦ୍ଵନୈଃ ।
ଵେଣୁଭିର୍ମାରୁତୋଦ୍ଧୂତୈଃ କୂଜଂତମିଵ କୀଚକୈଃ ॥ 14 ॥
ନିଶ୍ଶ୍ଵସଂତମିଵାମର୍ଷାଦ୍ଘୋରୈରାଶୀଵିଷୋତ୍ତମୈଃ ।
ନୀହାରକୃତଗଂଭୀରୈର୍ଧ୍ୟାୟଂତମିଵ ଗହ୍ଵରୈଃ ॥ 15 ॥
ମେଘପାଦନିଭୈଃ ପାଦୈଃ ପ୍ରକ୍ରାଂତମିଵ ସର୍ଵତଃ ।
ଜୃଂଂଭମାଣମିଵାଽକାଶେ ଶିଖରୈରଭ୍ରମାଲିଭିଃ ॥ 16 ॥
କୂଟୈଶ୍ଚ ବହୁଧା କୀର୍ଣୈଶ୍ଶୋଭିତଂ ବହୁକଂଦରୈଃ ।
ସାଲତାଲାଶ୍ଵକର୍ଣୈଶ୍ଚ ଵଂଶୈଶ୍ଚ ବହୁଭିର୍ଵୃତମ୍ ॥ 17 ॥
ଲତାଵିତାନୈର୍ଵିତତୈଃ ପୁଷ୍ପଵଦ୍ଭିରଲଂକୃତମ୍ ।
ନାନାମୃଗଗଣାକୀର୍ଣଂ ଧାତୁନିଷ୍ୟଂଦଭୂଷିତମ୍ ॥ 18 ॥
ବହୁପ୍ରସ୍ରଵଣୋପେତଂ ଶିଲାସଂଚୟସଂକଟମ୍ ।
ମହର୍ଷିୟକ୍ଷଗଂଧର୍ଵକିନ୍ନରୋରଗସେଵିତମ୍ ॥ 19 ॥
ଲତାପାଦପସଂଘାତଂ ସିଂହାଧ୍ୟୁଷିତକଂଦରମ୍ ।
ଵ୍ୟାଘ୍ରସଂଘସମାକୀର୍ଣଂ ସ୍ଵାଦୁମୂଲଫଲଦ୍ରୁମମ୍ ॥ 20 ॥
ତମାରୁରୋହ ହନୁମାନ୍ ପର୍ଵତଂ ପଵନାତ୍ମଜଃ ।
ରାମଦର୍ଶନଶୀଘ୍ରେଣ ପ୍ରହର୍ଷେଣାଭିଚୋଦିତଃ ॥ 21 ॥
ତେନ ପାଦତଲାକ୍ରାଂତା ରମ୍ୟେଷୁ ଗିରିସାନୁଷୁ ।
ସଘୋଷାସ୍ସମଶୀର୍ୟଂତ ଶିଲାଶ୍ଚୂର୍ଣୀକୃତାସ୍ତତଃ ॥ 22 ॥
ସ ତମାରୁହ୍ୟ ଶୈଲେଂଦ୍ରଂ ଵ୍ୟଵର୍ଧତ ମହାକପିଃ ।
ଦକ୍ଷିଣାଦୁତ୍ତରଂ ପାରଂ ପ୍ରାର୍ଥୟନ୍ ଲଵଣାଂଭସଃ ॥ 23 ॥
ଅଧିରୁହ୍ୟ ତତୋ ଵୀରଃ ପର୍ଵତଂ ପଵନାତ୍ମଜଃ ।
ଦଦର୍ଶ ସାଗରଂ ଭୀମଂ ମୀନୋରଗନିଷେଵିତମ୍ ॥ 24 ॥
ସ ମାରୁତ ଇଵାଽକାଶଂ ମାରୁତସ୍ୟାତ୍ମସଂଭଵଃ ।
ପ୍ରପେଦେ ହରିଶାର୍ଦୂଲୋ ଦକ୍ଷିଣାଦୁତ୍ତରାଂ ଦିଶମ୍ ॥ 25 ॥
ସ ତଦା ପୀଡିତସ୍ତେନ କପିନା ପର୍ଵତୋତ୍ତମଃ ।
ରରାସ ସହ ତୈର୍ଭୂତୈଃ ପ୍ରଵିଶନ୍ଵସୁଧାତଲମ୍ ॥ 26 ॥
କଂପମାନୈଶ୍ଚ ଶିଖରୈଃ ପତଦ୍ଭିରପି ଚ ଦ୍ରୁମୈଃ ।
ତସ୍ୟୋରୁଵେଗୋନ୍ମଥିତାଃ ପାଦପାଃ ପୁଷ୍ପଶାଲିନଃ ॥ 27 ॥
ନିପେତୁର୍ଭୂତଲେ ରୁଗ୍ଣାଶ୍ଶକ୍ରାୟୁଧହତା ଇଵ ।
କଂଦରାଂତରସଂସ୍ଥାନାଂ ପୀଡିତାନାଂ ମହୌଜସାମ୍ ॥ 28 ॥
ସିଂହାନାଂ ନିନଦୋ ଭୀମୋ ନଭୋ ଭିଂଦନ୍ ସ ଶୁଶ୍ରୁଵେ ।
ତ୍ରସ୍ତଵ୍ୟାଵୃତ୍ତଵସନା ଵ୍ୟାକୁଲୀକୃତଭୂଷଣାଃ ॥ 29 ॥
ଵିଦ୍ୟାଧର୍ୟଃ ସମୁତ୍ପେତୁସ୍ସହସା ଧରଣୀଧରାତ୍ ।
ଅତିପ୍ରମାଣା ବଲିନୋ ଦୀପ୍ତଜିହ୍ଵା ମହାଵିଷାଃ ॥ 30 ॥
ନିପୀଡିତଶିରୋଗ୍ରୀଵା ଵ୍ୟଚେଷ୍ଟଂତ ମହାହୟଃ ।
କିନ୍ନରୋରଗଂଧର୍ଵୟକ୍ଷଵିଦ୍ୟାଧରାସ୍ତଦା ॥ 31 ॥
ପୀଡିତଂ ତଂ ନଗଵରଂ ତ୍ୟକ୍ତ୍ଵା ଗଗନମାସ୍ଥିତାଃ ।
ସ ଚ ଭୂମିଧରଃ ଶ୍ରୀମାନ୍ବଲିନା ତେନ ପୀଡିତଃ ॥ 32 ॥
ସଵୃକ୍ଷଶିଖରୋଦଗ୍ରଃ ପ୍ରଵିଵେଶ ରସାତଲମ୍ ।
ଦଶୟୋଜନଵିସ୍ତାରସ୍ତ୍ରିଂଶଦ୍ୟୋଜନମୁଚ୍ଛ୍ରିତଃ ॥ 33 ॥
ଧରଣ୍ୟାଂ ସମତାଂ ୟାତଃ ସ ବଭୂଵ ଧରାଧରଃ ।
ସ ଲିଲଂଘୟିଷୁର୍ଭୀମଂ ସଲୀଲଂ ଲଵଣାର୍ଣଵମ୍ ॥ 34 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ଷଟ୍ପଂଚାଶସ୍ସର୍ଗଃ ॥
