ശ്രീമദ്വാല്മീകീയ രാമായണേ സുംദരകാംഡമ് ।
അഥ ഷട്പംചാശസ്സര്ഗഃ ।
തതസ്തു ശിംശുപാമൂലേ ജാനകീം പര്യുപസ്ഥിതാമ് ।
അഭിവാദ്യാബ്രവീദ്ദിഷ്ട്യാ പശ്യാമി ത്വാമിഹാക്ഷതാമ് ॥ 1 ॥
തതസ്തം പ്രസ്ഥിതം സീതാ വീക്ഷമാണാ പുനഃ പുനഃ ।
ഭര്തൃസ്നേഹാന്വിതം വാക്യം ഹനുമംതമഭാഷത ॥ 2 ॥
കാമമസ്യ ത്വമേവൈകഃ കാര്യസ്യ പരിസാധനേ ।
പര്യാപ്തഃ പരവീരഘ്ന യശസ്യസ്തേ ബലോദയഃ ॥ 3 ॥
ശരൈസ്തു സംകുലാം കൃത്വാ ലംകാം പരബലാര്ദനഃ ।
മാം നയേദ്യദി കാകുത്സ്ഥസ്തത്തസ്യ സദൃശം ഭവേത് ॥ 4 ॥
തദ്യഥാ തസ്യ വിക്രാംതമനുരൂപം മഹാത്മനഃ ।
ഭവത്യാഹവശൂരസ്യ തഥാ ത്വമുപപാദയ ॥ 5 ॥
തദര്ഥോപഹിതം വാക്യം പ്രശ്രിതം ഹേതുസംഹിതമ് ।
നിശമ്യ ഹനുമാംസ്തസ്യാ വാക്യമുത്തരമബ്രവീത് ॥ 6 ॥
ക്ഷിപ്രമേഷ്യതി കാകുത്സ്ഥഃ ഹര്യൃക്ഷപ്രവരൈർവൃതഃ ।
യസ്തേ യുധി വിജിത്യാരീന് ശോകം വ്യപനയിഷ്യതി ॥ 7 ॥
ഏവമാശ്വാസ്യ വൈദേഹീം ഹനുമാന് മാരുതാത്മജഃ ।
ഗമനായ മതിം കൃത്വാ വൈദേഹീമഭ്യവാദയത് ॥ 8 ॥
തതസ്സ കപിശാര്ദൂലഃ സ്വാമിസംദര്ശനോത്സുകഃ ।
ആരുരോഹ ഗിരിശ്രേഷ്ഠമരിഷ്ടമരിമര്ദനഃ ॥ 9 ॥
തുംഗപദ്മകജുഷ്ടാഭിര്നീലാഭിർവനരാജിഭിഃ ।
സോത്തരീയമിവാംഭോദൈഃ ശൃംഗാംതരവിലംബിഭിഃ ॥ 10 ॥
ബോധ്യമാനമിവ പ്രീത്യാ ദിവാകരകരൈശ്ശുഭൈഃ ।
ഉന്മിഷംതമിവോദ്ധൂതൈര്ലോചനൈരിവ ധാതുഭിഃ ॥ 11 ॥
തോയൌഘനനിസ്സ്വനൈര്മംദ്രൈഃ പ്രാധീതമിവ പർവതമ് ।
പ്രഗീതമിവ വിസ്പഷ്ടൈര്നാനാപ്രസ്രവണസ്വനൈഃ ॥ 12 ॥
ദേവദാരുഭിരത്യുച്ചൈരൂര്ധ്വബാഹുമിവ സ്ഥിതമ് ।
പ്രപാതജലനിര്ഘോഷൈഃ പ്രാക്രുഷ്ടമിവ സർവതഃ ॥ 13 ॥
വേപമാനമിവ ശ്യാമൈഃ കംപമാനൈശ്ശരദ്വനൈഃ ।
വേണുഭിര്മാരുതോദ്ധൂതൈഃ കൂജംതമിവ കീചകൈഃ ॥ 14 ॥
നിശ്ശ്വസംതമിവാമര്ഷാദ്ഘോരൈരാശീവിഷോത്തമൈഃ ।
നീഹാരകൃതഗംഭീരൈര്ധ്യായംതമിവ ഗഹ്വരൈഃ ॥ 15 ॥
മേഘപാദനിഭൈഃ പാദൈഃ പ്രക്രാംതമിവ സർവതഃ ।
ജൃംംഭമാണമിവാഽകാശേ ശിഖരൈരഭ്രമാലിഭിഃ ॥ 16 ॥
കൂടൈശ്ച ബഹുധാ കീര്ണൈശ്ശോഭിതം ബഹുകംദരൈഃ ।
സാലതാലാശ്വകര്ണൈശ്ച വംശൈശ്ച ബഹുഭിർവൃതമ് ॥ 17 ॥
ലതാവിതാനൈർവിതതൈഃ പുഷ്പവദ്ഭിരലംകൃതമ് ।
നാനാമൃഗഗണാകീര്ണം ധാതുനിഷ്യംദഭൂഷിതമ് ॥ 18 ॥
ബഹുപ്രസ്രവണോപേതം ശിലാസംചയസംകടമ് ।
മഹര്ഷിയക്ഷഗംധർവകിന്നരോരഗസേവിതമ് ॥ 19 ॥
ലതാപാദപസംഘാതം സിംഹാധ്യുഷിതകംദരമ് ।
വ്യാഘ്രസംഘസമാകീര്ണം സ്വാദുമൂലഫലദ്രുമമ് ॥ 20 ॥
തമാരുരോഹ ഹനുമാന് പർവതം പവനാത്മജഃ ।
രാമദര്ശനശീഘ്രേണ പ്രഹര്ഷേണാഭിചോദിതഃ ॥ 21 ॥
തേന പാദതലാക്രാംതാ രമ്യേഷു ഗിരിസാനുഷു ।
സഘോഷാസ്സമശീര്യംത ശിലാശ്ചൂര്ണീകൃതാസ്തതഃ ॥ 22 ॥
സ തമാരുഹ്യ ശൈലേംദ്രം വ്യവര്ധത മഹാകപിഃ ।
ദക്ഷിണാദുത്തരം പാരം പ്രാര്ഥയന് ലവണാംഭസഃ ॥ 23 ॥
അധിരുഹ്യ തതോ വീരഃ പർവതം പവനാത്മജഃ ।
ദദര്ശ സാഗരം ഭീമം മീനോരഗനിഷേവിതമ് ॥ 24 ॥
സ മാരുത ഇവാഽകാശം മാരുതസ്യാത്മസംഭവഃ ।
പ്രപേദേ ഹരിശാര്ദൂലോ ദക്ഷിണാദുത്തരാം ദിശമ് ॥ 25 ॥
സ തദാ പീഡിതസ്തേന കപിനാ പർവതോത്തമഃ ।
രരാസ സഹ തൈര്ഭൂതൈഃ പ്രവിശന്വസുധാതലമ് ॥ 26 ॥
കംപമാനൈശ്ച ശിഖരൈഃ പതദ്ഭിരപി ച ദ്രുമൈഃ ।
തസ്യോരുവേഗോന്മഥിതാഃ പാദപാഃ പുഷ്പശാലിനഃ ॥ 27 ॥
നിപേതുര്ഭൂതലേ രുഗ്ണാശ്ശക്രായുധഹതാ ഇവ ।
കംദരാംതരസംസ്ഥാനാം പീഡിതാനാം മഹൌജസാമ് ॥ 28 ॥
സിംഹാനാം നിനദോ ഭീമോ നഭോ ഭിംദന് സ ശുശ്രുവേ ।
ത്രസ്തവ്യാവൃത്തവസനാ വ്യാകുലീകൃതഭൂഷണാഃ ॥ 29 ॥
വിദ്യാധര്യഃ സമുത്പേതുസ്സഹസാ ധരണീധരാത് ।
അതിപ്രമാണാ ബലിനോ ദീപ്തജിഹ്വാ മഹാവിഷാഃ ॥ 30 ॥
നിപീഡിതശിരോഗ്രീവാ വ്യചേഷ്ടംത മഹാഹയഃ ।
കിന്നരോരഗംധർവയക്ഷവിദ്യാധരാസ്തദാ ॥ 31 ॥
പീഡിതം തം നഗവരം ത്യക്ത്വാ ഗഗനമാസ്ഥിതാഃ ।
സ ച ഭൂമിധരഃ ശ്രീമാന്ബലിനാ തേന പീഡിതഃ ॥ 32 ॥
സവൃക്ഷശിഖരോദഗ്രഃ പ്രവിവേശ രസാതലമ് ।
ദശയോജനവിസ്താരസ്ത്രിംശദ്യോജനമുച്ഛ്രിതഃ ॥ 33 ॥
ധരണ്യാം സമതാം യാതഃ സ ബഭൂവ ധരാധരഃ ।
സ ലിലംഘയിഷുര്ഭീമം സലീലം ലവണാര്ണവമ് ॥ 34 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുംദരകാംഡേ ഷട്പംചാശസ്സര്ഗഃ ॥
