śrīmadvālmīkīya rāmāyaṇē sundarakāṇḍam ।
atha ṣaṭpañchāśassargaḥ ।
tatastu śiṃśupāmūlē jānakīṃ paryupasthitām ।
abhivādyābravīddiṣṭyā paśyāmi tvāmihākṣatām ॥ 1 ॥
tatastaṃ prasthitaṃ sītā vīkṣamāṇā punaḥ punaḥ ।
bhartṛsnēhānvitaṃ vākyaṃ hanumantamabhāṣata ॥ 2 ॥
kāmamasya tvamēvaikaḥ kāryasya parisādhanē ।
paryāptaḥ paravīraghna yaśasyastē balōdayaḥ ॥ 3 ॥
śaraistu saṅkulāṃ kṛtvā laṅkāṃ parabalārdanaḥ ।
māṃ nayēdyadi kākutsthastattasya sadṛśaṃ bhavēt ॥ 4 ॥
tadyathā tasya vikrāntamanurūpaṃ mahātmanaḥ ।
bhavatyāhavaśūrasya tathā tvamupapādaya ॥ 5 ॥
tadarthōpahitaṃ vākyaṃ praśritaṃ hētusaṃhitam ।
niśamya hanumāṃstasyā vākyamuttaramabravīt ॥ 6 ॥
kṣipramēṣyati kākutsthaḥ haryṛkṣapravarairvṛtaḥ ।
yastē yudhi vijityārīn śōkaṃ vyapanayiṣyati ॥ 7 ॥
ēvamāśvāsya vaidēhīṃ hanumān mārutātmajaḥ ।
gamanāya matiṃ kṛtvā vaidēhīmabhyavādayat ॥ 8 ॥
tatassa kapiśārdūlaḥ svāmisandarśanōtsukaḥ ।
ārurōha giriśrēṣṭhamariṣṭamarimardanaḥ ॥ 9 ॥
tuṅgapadmakajuṣṭābhirnīlābhirvanarājibhiḥ ।
sōttarīyamivāmbhōdaiḥ śṛṅgāntaravilambibhiḥ ॥ 10 ॥
bōdhyamānamiva prītyā divākarakaraiśśubhaiḥ ।
unmiṣantamivōddhūtairlōchanairiva dhātubhiḥ ॥ 11 ॥
tōyaughananissvanairmandraiḥ prādhītamiva parvatam ।
pragītamiva vispaṣṭairnānāprasravaṇasvanaiḥ ॥ 12 ॥
dēvadārubhiratyuchchairūrdhvabāhumiva sthitam ।
prapātajalanirghōṣaiḥ prākruṣṭamiva sarvataḥ ॥ 13 ॥
vēpamānamiva śyāmaiḥ kampamānaiśśaradvanaiḥ ।
vēṇubhirmārutōddhūtaiḥ kūjantamiva kīchakaiḥ ॥ 14 ॥
niśśvasantamivāmarṣādghōrairāśīviṣōttamaiḥ ।
nīhārakṛtagambhīrairdhyāyantamiva gahvaraiḥ ॥ 15 ॥
mēghapādanibhaiḥ pādaiḥ prakrāntamiva sarvataḥ ।
jṛmmbhamāṇamivā'kāśē śikharairabhramālibhiḥ ॥ 16 ॥
kūṭaiścha bahudhā kīrṇaiśśōbhitaṃ bahukandaraiḥ ।
sālatālāśvakarṇaiścha vaṃśaiścha bahubhirvṛtam ॥ 17 ॥
latāvitānairvitataiḥ puṣpavadbhiralaṅkṛtam ।
nānāmṛgagaṇākīrṇaṃ dhātuniṣyandabhūṣitam ॥ 18 ॥
bahuprasravaṇōpētaṃ śilāsañchayasaṅkaṭam ।
maharṣiyakṣagandharvakinnarōragasēvitam ॥ 19 ॥
latāpādapasaṅghātaṃ siṃhādhyuṣitakandaram ।
vyāghrasaṅghasamākīrṇaṃ svādumūlaphaladrumam ॥ 20 ॥
tamārurōha hanumān parvataṃ pavanātmajaḥ ।
rāmadarśanaśīghrēṇa praharṣēṇābhichōditaḥ ॥ 21 ॥
tēna pādatalākrāntā ramyēṣu girisānuṣu ।
saghōṣāssamaśīryanta śilāśchūrṇīkṛtāstataḥ ॥ 22 ॥
sa tamāruhya śailēndraṃ vyavardhata mahākapiḥ ।
dakṣiṇāduttaraṃ pāraṃ prārthayan lavaṇāmbhasaḥ ॥ 23 ॥
adhiruhya tatō vīraḥ parvataṃ pavanātmajaḥ ।
dadarśa sāgaraṃ bhīmaṃ mīnōraganiṣēvitam ॥ 24 ॥
sa māruta ivā'kāśaṃ mārutasyātmasambhavaḥ ।
prapēdē hariśārdūlō dakṣiṇāduttarāṃ diśam ॥ 25 ॥
sa tadā pīḍitastēna kapinā parvatōttamaḥ ।
rarāsa saha tairbhūtaiḥ praviśanvasudhātalam ॥ 26 ॥
kampamānaiścha śikharaiḥ patadbhirapi cha drumaiḥ ।
tasyōruvēgōnmathitāḥ pādapāḥ puṣpaśālinaḥ ॥ 27 ॥
nipēturbhūtalē rugṇāśśakrāyudhahatā iva ।
kandarāntarasaṃsthānāṃ pīḍitānāṃ mahaujasām ॥ 28 ॥
siṃhānāṃ ninadō bhīmō nabhō bhindan sa śuśruvē ।
trastavyāvṛttavasanā vyākulīkṛtabhūṣaṇāḥ ॥ 29 ॥
vidyādharyaḥ samutpētussahasā dharaṇīdharāt ।
atipramāṇā balinō dīptajihvā mahāviṣāḥ ॥ 30 ॥
nipīḍitaśirōgrīvā vyachēṣṭanta mahāhayaḥ ।
kinnarōragandharvayakṣavidyādharāstadā ॥ 31 ॥
pīḍitaṃ taṃ nagavaraṃ tyaktvā gaganamāsthitāḥ ।
sa cha bhūmidharaḥ śrīmānbalinā tēna pīḍitaḥ ॥ 32 ॥
savṛkṣaśikharōdagraḥ pravivēśa rasātalam ।
daśayōjanavistārastriṃśadyōjanamuchChritaḥ ॥ 33 ॥
dharaṇyāṃ samatāṃ yātaḥ sa babhūva dharādharaḥ ।
sa lilaṅghayiṣurbhīmaṃ salīlaṃ lavaṇārṇavam ॥ 34 ॥
ityārṣē śrīmadrāmāyaṇē vālmīkīya ādikāvyē sundarakāṇḍē ṣaṭpañchāśassargaḥ ॥
