శ్రీమద్వాల్మీకీయ రామాయణే సుందరకాండమ్ ।
అథ షట్పంచాశస్సర్గః ।
తతస్తు శింశుపామూలే జానకీం పర్యుపస్థితామ్ ।
అభివాద్యాబ్రవీద్దిష్ట్యా పశ్యామి త్వామిహాక్షతామ్ ॥ 1 ॥
తతస్తం ప్రస్థితం సీతా వీక్షమాణా పునః పునః ।
భర్తృస్నేహాన్వితం వాక్యం హనుమంతమభాషత ॥ 2 ॥
కామమస్య త్వమేవైకః కార్యస్య పరిసాధనే ।
పర్యాప్తః పరవీరఘ్న యశస్యస్తే బలోదయః ॥ 3 ॥
శరైస్తు సంకులాం కృత్వా లంకాం పరబలార్దనః ।
మాం నయేద్యది కాకుత్స్థస్తత్తస్య సదృశం భవేత్ ॥ 4 ॥
తద్యథా తస్య విక్రాంతమనురూపం మహాత్మనః ।
భవత్యాహవశూరస్య తథా త్వముపపాదయ ॥ 5 ॥
తదర్థోపహితం వాక్యం ప్రశ్రితం హేతుసంహితమ్ ।
నిశమ్య హనుమాంస్తస్యా వాక్యముత్తరమబ్రవీత్ ॥ 6 ॥
క్షిప్రమేష్యతి కాకుత్స్థః హర్యృక్షప్రవరైర్వృతః ।
యస్తే యుధి విజిత్యారీన్ శోకం వ్యపనయిష్యతి ॥ 7 ॥
ఏవమాశ్వాస్య వైదేహీం హనుమాన్ మారుతాత్మజః ।
గమనాయ మతిం కృత్వా వైదేహీమభ్యవాదయత్ ॥ 8 ॥
తతస్స కపిశార్దూలః స్వామిసందర్శనోత్సుకః ।
ఆరురోహ గిరిశ్రేష్ఠమరిష్టమరిమర్దనః ॥ 9 ॥
తుంగపద్మకజుష్టాభిర్నీలాభిర్వనరాజిభిః ।
సోత్తరీయమివాంభోదైః శృంగాంతరవిలంబిభిః ॥ 10 ॥
బోధ్యమానమివ ప్రీత్యా దివాకరకరైశ్శుభైః ।
ఉన్మిషంతమివోద్ధూతైర్లోచనైరివ ధాతుభిః ॥ 11 ॥
తోయౌఘననిస్స్వనైర్మంద్రైః ప్రాధీతమివ పర్వతమ్ ।
ప్రగీతమివ విస్పష్టైర్నానాప్రస్రవణస్వనైః ॥ 12 ॥
దేవదారుభిరత్యుచ్చైరూర్ధ్వబాహుమివ స్థితమ్ ।
ప్రపాతజలనిర్ఘోషైః ప్రాక్రుష్టమివ సర్వతః ॥ 13 ॥
వేపమానమివ శ్యామైః కంపమానైశ్శరద్వనైః ।
వేణుభిర్మారుతోద్ధూతైః కూజంతమివ కీచకైః ॥ 14 ॥
నిశ్శ్వసంతమివామర్షాద్ఘోరైరాశీవిషోత్తమైః ।
నీహారకృతగంభీరైర్ధ్యాయంతమివ గహ్వరైః ॥ 15 ॥
మేఘపాదనిభైః పాదైః ప్రక్రాంతమివ సర్వతః ।
జృంంభమాణమివాఽకాశే శిఖరైరభ్రమాలిభిః ॥ 16 ॥
కూటైశ్చ బహుధా కీర్ణైశ్శోభితం బహుకందరైః ।
సాలతాలాశ్వకర్ణైశ్చ వంశైశ్చ బహుభిర్వృతమ్ ॥ 17 ॥
లతావితానైర్వితతైః పుష్పవద్భిరలంకృతమ్ ।
నానామృగగణాకీర్ణం ధాతునిష్యందభూషితమ్ ॥ 18 ॥
బహుప్రస్రవణోపేతం శిలాసంచయసంకటమ్ ।
మహర్షియక్షగంధర్వకిన్నరోరగసేవితమ్ ॥ 19 ॥
లతాపాదపసంఘాతం సింహాధ్యుషితకందరమ్ ।
వ్యాఘ్రసంఘసమాకీర్ణం స్వాదుమూలఫలద్రుమమ్ ॥ 20 ॥
తమారురోహ హనుమాన్ పర్వతం పవనాత్మజః ।
రామదర్శనశీఘ్రేణ ప్రహర్షేణాభిచోదితః ॥ 21 ॥
తేన పాదతలాక్రాంతా రమ్యేషు గిరిసానుషు ।
సఘోషాస్సమశీర్యంత శిలాశ్చూర్ణీకృతాస్తతః ॥ 22 ॥
స తమారుహ్య శైలేంద్రం వ్యవర్ధత మహాకపిః ।
దక్షిణాదుత్తరం పారం ప్రార్థయన్ లవణాంభసః ॥ 23 ॥
అధిరుహ్య తతో వీరః పర్వతం పవనాత్మజః ।
దదర్శ సాగరం భీమం మీనోరగనిషేవితమ్ ॥ 24 ॥
స మారుత ఇవాఽకాశం మారుతస్యాత్మసంభవః ।
ప్రపేదే హరిశార్దూలో దక్షిణాదుత్తరాం దిశమ్ ॥ 25 ॥
స తదా పీడితస్తేన కపినా పర్వతోత్తమః ।
రరాస సహ తైర్భూతైః ప్రవిశన్వసుధాతలమ్ ॥ 26 ॥
కంపమానైశ్చ శిఖరైః పతద్భిరపి చ ద్రుమైః ।
తస్యోరువేగోన్మథితాః పాదపాః పుష్పశాలినః ॥ 27 ॥
నిపేతుర్భూతలే రుగ్ణాశ్శక్రాయుధహతా ఇవ ।
కందరాంతరసంస్థానాం పీడితానాం మహౌజసామ్ ॥ 28 ॥
సింహానాం నినదో భీమో నభో భిందన్ స శుశ్రువే ।
త్రస్తవ్యావృత్తవసనా వ్యాకులీకృతభూషణాః ॥ 29 ॥
విద్యాధర్యః సముత్పేతుస్సహసా ధరణీధరాత్ ।
అతిప్రమాణా బలినో దీప్తజిహ్వా మహావిషాః ॥ 30 ॥
నిపీడితశిరోగ్రీవా వ్యచేష్టంత మహాహయః ।
కిన్నరోరగంధర్వయక్షవిద్యాధరాస్తదా ॥ 31 ॥
పీడితం తం నగవరం త్యక్త్వా గగనమాస్థితాః ।
స చ భూమిధరః శ్రీమాన్బలినా తేన పీడితః ॥ 32 ॥
సవృక్షశిఖరోదగ్రః ప్రవివేశ రసాతలమ్ ।
దశయోజనవిస్తారస్త్రింశద్యోజనముచ్ఛ్రితః ॥ 33 ॥
ధరణ్యాం సమతాం యాతః స బభూవ ధరాధరః ।
స లిలంఘయిషుర్భీమం సలీలం లవణార్ణవమ్ ॥ 34 ॥
ఇత్యార్షే శ్రీమద్రామాయణే వాల్మీకీయ ఆదికావ్యే సుందరకాండే షట్పంచాశస్సర్గః ॥
