શ્રીમદ્વાલ્મીકીય રામાયણે સુંદરકાંડમ્ ।
અથ ષટ્પંચાશસ્સર્ગઃ ।
તતસ્તુ શિંશુપામૂલે જાનકીં પર્યુપસ્થિતામ્ ।
અભિવાદ્યાબ્રવીદ્દિષ્ટ્યા પશ્યામિ ત્વામિહાક્ષતામ્ ॥ 1 ॥
તતસ્તં પ્રસ્થિતં સીતા વીક્ષમાણા પુનઃ પુનઃ ।
ભર્તૃસ્નેહાન્વિતં વાક્યં હનુમંતમભાષત ॥ 2 ॥
કામમસ્ય ત્વમેવૈકઃ કાર્યસ્ય પરિસાધને ।
પર્યાપ્તઃ પરવીરઘ્ન યશસ્યસ્તે બલોદયઃ ॥ 3 ॥
શરૈસ્તુ સંકુલાં કૃત્વા લંકાં પરબલાર્દનઃ ।
માં નયેદ્યદિ કાકુત્સ્થસ્તત્તસ્ય સદૃશં ભવેત્ ॥ 4 ॥
તદ્યથા તસ્ય વિક્રાંતમનુરૂપં મહાત્મનઃ ।
ભવત્યાહવશૂરસ્ય તથા ત્વમુપપાદય ॥ 5 ॥
તદર્થોપહિતં વાક્યં પ્રશ્રિતં હેતુસંહિતમ્ ।
નિશમ્ય હનુમાંસ્તસ્યા વાક્યમુત્તરમબ્રવીત્ ॥ 6 ॥
ક્ષિપ્રમેષ્યતિ કાકુત્સ્થઃ હર્યૃક્ષપ્રવરૈર્વૃતઃ ।
યસ્તે યુધિ વિજિત્યારીન્ શોકં વ્યપનયિષ્યતિ ॥ 7 ॥
એવમાશ્વાસ્ય વૈદેહીં હનુમાન્ મારુતાત્મજઃ ।
ગમનાય મતિં કૃત્વા વૈદેહીમભ્યવાદયત્ ॥ 8 ॥
તતસ્સ કપિશાર્દૂલઃ સ્વામિસંદર્શનોત્સુકઃ ।
આરુરોહ ગિરિશ્રેષ્ઠમરિષ્ટમરિમર્દનઃ ॥ 9 ॥
તુંગપદ્મકજુષ્ટાભિર્નીલાભિર્વનરાજિભિઃ ।
સોત્તરીયમિવાંભોદૈઃ શૃંગાંતરવિલંબિભિઃ ॥ 10 ॥
બોધ્યમાનમિવ પ્રીત્યા દિવાકરકરૈશ્શુભૈઃ ।
ઉન્મિષંતમિવોદ્ધૂતૈર્લોચનૈરિવ ધાતુભિઃ ॥ 11 ॥
તોયૌઘનનિસ્સ્વનૈર્મંદ્રૈઃ પ્રાધીતમિવ પર્વતમ્ ।
પ્રગીતમિવ વિસ્પષ્ટૈર્નાનાપ્રસ્રવણસ્વનૈઃ ॥ 12 ॥
દેવદારુભિરત્યુચ્ચૈરૂર્ધ્વબાહુમિવ સ્થિતમ્ ।
પ્રપાતજલનિર્ઘોષૈઃ પ્રાક્રુષ્ટમિવ સર્વતઃ ॥ 13 ॥
વેપમાનમિવ શ્યામૈઃ કંપમાનૈશ્શરદ્વનૈઃ ।
વેણુભિર્મારુતોદ્ધૂતૈઃ કૂજંતમિવ કીચકૈઃ ॥ 14 ॥
નિશ્શ્વસંતમિવામર્ષાદ્ઘોરૈરાશીવિષોત્તમૈઃ ।
નીહારકૃતગંભીરૈર્ધ્યાયંતમિવ ગહ્વરૈઃ ॥ 15 ॥
મેઘપાદનિભૈઃ પાદૈઃ પ્રક્રાંતમિવ સર્વતઃ ।
જૃંંભમાણમિવાઽકાશે શિખરૈરભ્રમાલિભિઃ ॥ 16 ॥
કૂટૈશ્ચ બહુધા કીર્ણૈશ્શોભિતં બહુકંદરૈઃ ।
સાલતાલાશ્વકર્ણૈશ્ચ વંશૈશ્ચ બહુભિર્વૃતમ્ ॥ 17 ॥
લતાવિતાનૈર્વિતતૈઃ પુષ્પવદ્ભિરલંકૃતમ્ ।
નાનામૃગગણાકીર્ણં ધાતુનિષ્યંદભૂષિતમ્ ॥ 18 ॥
બહુપ્રસ્રવણોપેતં શિલાસંચયસંકટમ્ ।
મહર્ષિયક્ષગંધર્વકિન્નરોરગસેવિતમ્ ॥ 19 ॥
લતાપાદપસંઘાતં સિંહાધ્યુષિતકંદરમ્ ।
વ્યાઘ્રસંઘસમાકીર્ણં સ્વાદુમૂલફલદ્રુમમ્ ॥ 20 ॥
તમારુરોહ હનુમાન્ પર્વતં પવનાત્મજઃ ।
રામદર્શનશીઘ્રેણ પ્રહર્ષેણાભિચોદિતઃ ॥ 21 ॥
તેન પાદતલાક્રાંતા રમ્યેષુ ગિરિસાનુષુ ।
સઘોષાસ્સમશીર્યંત શિલાશ્ચૂર્ણીકૃતાસ્તતઃ ॥ 22 ॥
સ તમારુહ્ય શૈલેંદ્રં વ્યવર્ધત મહાકપિઃ ।
દક્ષિણાદુત્તરં પારં પ્રાર્થયન્ લવણાંભસઃ ॥ 23 ॥
અધિરુહ્ય તતો વીરઃ પર્વતં પવનાત્મજઃ ।
દદર્શ સાગરં ભીમં મીનોરગનિષેવિતમ્ ॥ 24 ॥
સ મારુત ઇવાઽકાશં મારુતસ્યાત્મસંભવઃ ।
પ્રપેદે હરિશાર્દૂલો દક્ષિણાદુત્તરાં દિશમ્ ॥ 25 ॥
સ તદા પીડિતસ્તેન કપિના પર્વતોત્તમઃ ।
રરાસ સહ તૈર્ભૂતૈઃ પ્રવિશન્વસુધાતલમ્ ॥ 26 ॥
કંપમાનૈશ્ચ શિખરૈઃ પતદ્ભિરપિ ચ દ્રુમૈઃ ।
તસ્યોરુવેગોન્મથિતાઃ પાદપાઃ પુષ્પશાલિનઃ ॥ 27 ॥
નિપેતુર્ભૂતલે રુગ્ણાશ્શક્રાયુધહતા ઇવ ।
કંદરાંતરસંસ્થાનાં પીડિતાનાં મહૌજસામ્ ॥ 28 ॥
સિંહાનાં નિનદો ભીમો નભો ભિંદન્ સ શુશ્રુવે ।
ત્રસ્તવ્યાવૃત્તવસના વ્યાકુલીકૃતભૂષણાઃ ॥ 29 ॥
વિદ્યાધર્યઃ સમુત્પેતુસ્સહસા ધરણીધરાત્ ।
અતિપ્રમાણા બલિનો દીપ્તજિહ્વા મહાવિષાઃ ॥ 30 ॥
નિપીડિતશિરોગ્રીવા વ્યચેષ્ટંત મહાહયઃ ।
કિન્નરોરગંધર્વયક્ષવિદ્યાધરાસ્તદા ॥ 31 ॥
પીડિતં તં નગવરં ત્યક્ત્વા ગગનમાસ્થિતાઃ ।
સ ચ ભૂમિધરઃ શ્રીમાન્બલિના તેન પીડિતઃ ॥ 32 ॥
સવૃક્ષશિખરોદગ્રઃ પ્રવિવેશ રસાતલમ્ ।
દશયોજનવિસ્તારસ્ત્રિંશદ્યોજનમુચ્છ્રિતઃ ॥ 33 ॥
ધરણ્યાં સમતાં યાતઃ સ બભૂવ ધરાધરઃ ।
સ લિલંઘયિષુર્ભીમં સલીલં લવણાર્ણવમ્ ॥ 34 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે સુંદરકાંડે ષટ્પંચાશસ્સર્ગઃ ॥
