ශ්රීමද්වාල්මීකීය රාමායණේ සුංදරකාංඩම් ।
අථ ෂට්පංචාශස්සර්ගඃ ।
තතස්තු ශිංශුපාමූලේ ජානකීං පර්යුපස්ථිතාම් ।
අභිවාද්යාබ්රවීද්දිෂ්ට්යා පශ්යාමි ත්වාමිහාක්ෂතාම් ॥ 1 ॥
තතස්තං ප්රස්ථිතං සීතා වීක්ෂමාණා පුනඃ පුනඃ ।
භර්තෘස්නේහාන්විතං වාක්යං හනුමංතමභාෂත ॥ 2 ॥
කාමමස්ය ත්වමේවෛකඃ කාර්යස්ය පරිසාධනේ ।
පර්යාප්තඃ පරවීරඝ්න යශස්යස්තේ බලෝදයඃ ॥ 3 ॥
ශරෛස්තු සංකුලාං කෘත්වා ලංකාං පරබලාර්දනඃ ।
මාං නයේද්යදි කාකුත්ස්ථස්තත්තස්ය සදෘශං භවේත් ॥ 4 ॥
තද්යථා තස්ය වික්රාංතමනුරූපං මහාත්මනඃ ।
භවත්යාහවශූරස්ය තථා ත්වමුපපාදය ॥ 5 ॥
තදර්ථෝපහිතං වාක්යං ප්රශ්රිතං හේතුසංහිතම් ।
නිශම්ය හනුමාංස්තස්යා වාක්යමුත්තරමබ්රවීත් ॥ 6 ॥
ක්ෂිප්රමේෂ්යති කාකුත්ස්ථඃ හර්යෘක්ෂප්රවරෛර්වෘතඃ ।
යස්තේ යුධි විජිත්යාරීන් ශෝකං ව්යපනයිෂ්යති ॥ 7 ॥
ඒවමාශ්වාස්ය වෛදේහීං හනුමාන් මාරුතාත්මජඃ ।
ගමනාය මතිං කෘත්වා වෛදේහීමභ්යවාදයත් ॥ 8 ॥
තතස්ස කපිශාර්දූලඃ ස්වාමිසංදර්ශනෝත්සුකඃ ।
ආරුරෝහ ගිරිශ්රේෂ්ඨමරිෂ්ටමරිමර්දනඃ ॥ 9 ॥
තුංගපද්මකජුෂ්ටාභිර්නීලාභිර්වනරාජිභිඃ ।
සෝත්තරීයමිවාංභෝදෛඃ ශෘංගාංතරවිලංබිභිඃ ॥ 10 ॥
බෝධ්යමානමිව ප්රීත්යා දිවාකරකරෛශ්ශුභෛඃ ।
උන්මිෂංතමිවෝද්ධූතෛර්ලෝචනෛරිව ධාතුභිඃ ॥ 11 ॥
තෝයෞඝනනිස්ස්වනෛර්මංද්රෛඃ ප්රාධීතමිව පර්වතම් ।
ප්රගීතමිව විස්පෂ්ටෛර්නානාප්රස්රවණස්වනෛඃ ॥ 12 ॥
දේවදාරුභිරත්යුච්චෛරූර්ධ්වබාහුමිව ස්ථිතම් ।
ප්රපාතජලනිර්ඝෝෂෛඃ ප්රාක්රුෂ්ටමිව සර්වතඃ ॥ 13 ॥
වේපමානමිව ශ්යාමෛඃ කංපමානෛශ්ශරද්වනෛඃ ।
වේණුභිර්මාරුතෝද්ධූතෛඃ කූජංතමිව කීචකෛඃ ॥ 14 ॥
නිශ්ශ්වසංතමිවාමර්ෂාද්ඝෝරෛරාශීවිෂෝත්තමෛඃ ।
නීහාරකෘතගංභීරෛර්ධ්යායංතමිව ගහ්වරෛඃ ॥ 15 ॥
මේඝපාදනිභෛඃ පාදෛඃ ප්රක්රාංතමිව සර්වතඃ ।
ජෘංංභමාණමිවාऽකාශේ ශිඛරෛරභ්රමාලිභිඃ ॥ 16 ॥
කූටෛශ්ච බහුධා කීර්ණෛශ්ශෝභිතං බහුකංදරෛඃ ।
සාලතාලාශ්වකර්ණෛශ්ච වංශෛශ්ච බහුභිර්වෘතම් ॥ 17 ॥
ලතාවිතානෛර්විතතෛඃ පුෂ්පවද්භිරලංකෘතම් ।
නානාමෘගගණාකීර්ණං ධාතුනිෂ්යංදභූෂිතම් ॥ 18 ॥
බහුප්රස්රවණෝපේතං ශිලාසංචයසංකටම් ।
මහර්ෂියක්ෂගංධර්වකින්නරෝරගසේවිතම් ॥ 19 ॥
ලතාපාදපසංඝාතං සිංහාධ්යුෂිතකංදරම් ।
ව්යාඝ්රසංඝසමාකීර්ණං ස්වාදුමූලඵලද්රුමම් ॥ 20 ॥
තමාරුරෝහ හනුමාන් පර්වතං පවනාත්මජඃ ।
රාමදර්ශනශීඝ්රේණ ප්රහර්ෂේණාභිචෝදිතඃ ॥ 21 ॥
තේන පාදතලාක්රාංතා රම්යේෂු ගිරිසානුෂු ।
සඝෝෂාස්සමශීර්යංත ශිලාශ්චූර්ණීකෘතාස්තතඃ ॥ 22 ॥
ස තමාරුහ්ය ශෛලේංද්රං ව්යවර්ධත මහාකපිඃ ।
දක්ෂිණාදුත්තරං පාරං ප්රාර්ථයන් ලවණාංභසඃ ॥ 23 ॥
අධිරුහ්ය තතෝ වීරඃ පර්වතං පවනාත්මජඃ ।
දදර්ශ සාගරං භීමං මීනෝරගනිෂේවිතම් ॥ 24 ॥
ස මාරුත ඉවාऽකාශං මාරුතස්යාත්මසංභවඃ ।
ප්රපේදේ හරිශාර්දූලෝ දක්ෂිණාදුත්තරාං දිශම් ॥ 25 ॥
ස තදා පීඩිතස්තේන කපිනා පර්වතෝත්තමඃ ।
රරාස සහ තෛර්භූතෛඃ ප්රවිශන්වසුධාතලම් ॥ 26 ॥
කංපමානෛශ්ච ශිඛරෛඃ පතද්භිරපි ච ද්රුමෛඃ ।
තස්යෝරුවේගෝන්මථිතාඃ පාදපාඃ පුෂ්පශාලිනඃ ॥ 27 ॥
නිපේතුර්භූතලේ රුග්ණාශ්ශක්රායුධහතා ඉව ।
කංදරාංතරසංස්ථානාං පීඩිතානාං මහෞජසාම් ॥ 28 ॥
සිංහානාං නිනදෝ භීමෝ නභෝ භිංදන් ස ශුශ්රුවේ ।
ත්රස්තව්යාවෘත්තවසනා ව්යාකුලීකෘතභූෂණාඃ ॥ 29 ॥
විද්යාධර්යඃ සමුත්පේතුස්සහසා ධරණීධරාත් ।
අතිප්රමාණා බලිනෝ දීප්තජිහ්වා මහාවිෂාඃ ॥ 30 ॥
නිපීඩිතශිරෝග්රීවා ව්යචේෂ්ටංත මහාහයඃ ।
කින්නරෝරගංධර්වයක්ෂවිද්යාධරාස්තදා ॥ 31 ॥
පීඩිතං තං නගවරං ත්යක්ත්වා ගගනමාස්ථිතාඃ ।
ස ච භූමිධරඃ ශ්රීමාන්බලිනා තේන පීඩිතඃ ॥ 32 ॥
සවෘක්ෂශිඛරෝදග්රඃ ප්රවිවේශ රසාතලම් ।
දශයෝජනවිස්තාරස්ත්රිංශද්යෝජනමුච්ඡ්රිතඃ ॥ 33 ॥
ධරණ්යාං සමතාං යාතඃ ස බභූව ධරාධරඃ ।
ස ලිලංඝයිෂුර්භීමං සලීලං ලවණාර්ණවම් ॥ 34 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ෂට්පංචාශස්සර්ගඃ ॥
