শ্রীমদ্বাল্মীকীয় রামাযণে অরণ্যকাংডম্ ।
অথ ত্রিসপ্ততিতমস্সর্গঃ ।
নিদর্শয়িত্বা রামায় সীতায়াঃ প্রতিপাদনে ।
বাক্যমন্বর্থমর্থজ্ঞঃ কবংধঃ পুনরব্রবীত্ ॥ 1 ॥
এষ রাম শিবঃ পংথা যত্রৈতে পুষ্পিতা দ্রুমাঃ ।
প্রতীচীং দিশমাশ্রিত্য় প্রকাশংতে মনোরমাঃ ॥ 2 ॥
জংবূপ্রিয়ালপনসপ্লক্ষন্যগ্রোধতিংধুকাঃ ।
অশ্বত্থাঃ কর্ণিকারাশ্চ চূতাশ্চান্য়ে চ পাদাপাঃ ॥ 3 ॥
ধন্বনা নাগবৃক্ষাশ্চ তিলকা নক্তমালকাঃ ।
নীলাশোকাঃ কদংবাশ্চ করবীরাশ্চ পুষ্পিতাঃ ॥ 4 ॥
অগ্নিমুখ্য়া অশোকাশ্চ সুরক্তাঃ পারিভদ্রকাঃ ।
তানারুহ্য়াথবা ভূমৌ পাতয়িত্বা চ তান্বলাত্ ॥ 5 ॥
ফলান্যমৃতকল্পানি ভক্ষয়ংতৌ গমিষ্যথঃ ।
তদতিক্রম্য় কাকুত্স্থ বনং পুষ্পিতপাদপম্ ॥ 6 ॥
নংদনপ্রতিমং চান্যত্কুরবো হ্য়ুত্তরা ইব ।
সর্বকালফলা যত্র পাদপাস্তু মধুস্রবাঃ ॥ 7 ॥
সর্বে চ ঋতবস্তত্র বনে চৈত্ররথে যথা ।
ফলভারানতাস্তত্র মহাবিটপধারিণঃ ॥ 8 ॥
শোভংতে সর্বতস্তত্র মেঘপর্বতসন্নিভাঃ ।
তানারুহ্য়াথবা ভূমৌ পাতয়িত্বা যথাসুখম্ ॥ 9 ॥
ফলান্যমৃতকল্পানি লক্ষ্মণস্তে প্রদাস্যতি ।
চংক্রমংতৌ বরাংদেশান্শৈলাচ্ছৈলং বনাদ্বনম্ ॥ 10 ॥
ততঃ পুষ্করিণীং বীরৌ পংপাং নাম গমিষ্যথঃ ।
অশর্করামবিভ্রংশাং সমতীর্থামশৈবলাম্ ॥ 11 ॥
রাম সংজাতবালূকাং কমলোত্পলশালিনীম্ ।
তত্র হংসাঃ প্লবাঃ ক্রৌংচাঃ কুররাশ্চৈব রাঘব ॥ 12 ॥
বল্গুস্বনা বিকূজংতি পংপাসলিলগোচরাঃ ।
নোদ্বিজংতে নরাংদৃষ্ট্বা বধস্য়াকোবিদাশ্শুভাঃ ॥ 13 ॥
ঘৃতপিংডোপমান্ স্থূলাংস্তাংদ্বিজান্ভক্ষয়িষ্যথঃ ।
রোহিতান্বক্রতুংডাংশ্চ নডমীনাংশ্চ রাঘব ॥ 14 ॥
পংপায়ামিষুভির্মত্স্য়াংস্তত্র রাম বরান্হতান্ ।
নিস্ত্বক্পক্ষানযস্তপ্তানকৃশানেককংটকান্ ॥ 15 ॥
তব ভক্ত্য়া সমায়ুক্তো লক্ষ্মণস্সংপ্রদাস্যতি ।
ভৃশতে খাদতো মত্স্য়ান্পংপায়াঃ পুষ্পসংচয়ে ॥ 16 ॥
পদ্মগংধি শিবং বারি সুখশীতমনামযম্ ।
উদ্ধৃত্য় সততাক্লিষ্টং রৌপ্যস্ফাটিকসন্নিভম্ ॥ 17 ॥
অসৌ পুষ্করপর্ণেন লক্ষ্মণঃ পাযয়িষ্যতি ।
স্থূলান্গিরিগুহাশয়্য়ান্বরাহান্বনচারিণঃ ॥ 18 ॥
অপাং লোভাদুপাবৃত্তান্বৃষভানিব নর্দতঃ ।
রূপাবনিতাংশ্চ পংপায়াংদ্রক্ষ্যসি ত্বং নরোত্তম ॥ 19 ॥
সায়াহ্নে বিচরন্রাম বিটপীন্মাল্যধারিণঃ ।
শীতোদকং চ পংপায়া দৃষ্ট্বা শোকং বিহাস্যসি ॥ 20 ॥
সুমনোভিশ্চিতাংস্তত্র তিলকান্নক্তমালকান্ ।
উত্পলানি চ ফুল্লানি পংকজানি চ রাঘব ॥ 21 ॥
ন তানি কশ্চিন্মাল্য়ানি তত্রারোপয়িতা নরঃ ।
ন চ বৈ ম্লানতাং যাংতি ন চ শীর্য়ংতি রাঘব ॥ 22 ॥
মতংগশিষ্য়াস্তত্রাঽসন্নৃষযস্সুসমাহিতাঃ ।
তেষাং ভারাভিতপ্তানাং বন্যমাহরতাং গুরোঃ ॥ 23 ॥
যে প্রপেতুর্মহীং তূর্ণং শরীরাত্স্বেদবিংদবঃ ।
তানি জাতানি মাল্য়ানি মুনীনাং তপসা তদা ॥ 24 ॥
স্বেদবিংদুসমুত্থানি ন বিনশ্য়ংতি রাঘব ।
তেষাং গতানামদ্য়াপি দৃশ্যতে পরিচারিণী ॥ 25 ॥
শ্রমণী শবরী নাম কাকুত্স্থ চিরজীবিনী ।
ত্বাং তু ধর্মে স্থিতা নিত্য়ং সর্বভূতনমস্কৃতম্ ॥ 26 ॥
দৃষ্ট্বা দেবোপমং রাম স্বর্গলোকং গমিষ্যতি ।
ততস্তদ্রাম পংপায়াস্তীরমাসাদ্য় পশ্চিমম্ ॥ 27 ॥
আশ্রমস্থানমতুলং গুহ্য়ং কাকুত্স্থ পশ্যসি ।
ন তত্রাক্রমিতুং নাগাশ্শক্নুবংতি তমাশ্রমম্ ॥ 28 ॥
বিবিধাস্তত্র বৈ নাগা বনে তস্মিংশ্চ পর্বতে ।
ঋষেস্তত্র মতংগস্য় বিধানাত্তচ্চ কাননম্ ॥ 29 ॥
তস্মিন্নংদনসংকাশে দেবারণ্য়োপমে বনে ।
নানাবিহগসংকীর্ণে রংস্যসে রাম নির্বৃতঃ ॥ 30 ॥
ঋষ্যমূকশ্চ পংপায়াঃ পুরস্তাত্পুষ্পিতদ্রুমঃ ।
সুদুঃখারোহণো নাম শিশুনাগাভিরক্ষিতঃ ॥ 31 ॥
উদারো ব্রহ্মণা চৈব পূর্বকালে বিনির্মিতঃ ।
শয়ানঃ পুরুষো রাম তস্য় শৈলস্য় মূর্ধনি ॥ 32 ॥
যত্স্বপ্নে লভতে বিত্তং তত্প্রবুদ্ধোঽধিগচ্ছতি ।
নত্বেনং বিষমাচার পাপকর্মাঽধিরোহতি ॥ 33 ॥
যস্তু তং বিষমাচারঃ পাপকর্মাঽধিরোহতি ।
তত্রৈব প্রহংত্য়েনং সুপ্তমাদায় রাক্ষসাঃ ॥ 34 ॥
তত্রাপি শিশুনাগানামাক্রংধশ্শ্রূযতে মহান্ ।
ক্রীডতাং রাম পংপায়াং মতংগারণ্যবাসিনাম্ ॥ 35 ॥
সিক্তা রুধিরধারাভিস্সংহৃত্য় পরমদ্বিপাঃ ।
প্রচরংতি পৃথক্কীর্ণা মেঘবর্ণাস্তরস্বিনঃ ॥ 36 ॥
তে তত্র পীত্বা পানীয়ং বিমলং শীতমব্যযম্ ।
নির্বৃতাস্সংবিগাহংতে বনানি বনগোচরাঃ ॥ 37 ॥
ঋক্ষাংশ্চ দ্বীপিনশ্চৈব নীলকোমলকপ্রভান্ ।
রুরূনপেতাপজয়ান্ দৃষ্ট্বা শোকং জয়িষ্যসি ॥ 38 ॥
রাম তস্য় তু শৈলস্য় মহতী শোভতে গুহা ।
শিলাপিধানা কাকুত্স্থ দুঃখং চাস্য়াঃ প্রবেশনম্ ॥ 39 ॥
তস্য়া গুহায়াঃ প্রাগ্দ্বারে মহান্শীতোদকো হ্রদঃ ।
ফলমূলান্বিতো রম্য়ো নানামৃগসমাবৃতঃ ॥ 40 ॥
তস্য়াং বসতি সুগ্রীবশ্চতুর্ভিস্সহ বানরৈঃ ।
কদাচিচ্ছিখরে তস্য় পর্বতস্য়াবতিষ্ঠতে ॥ 41 ॥
কবংধস্ত্বনুশাস্য়ৈবং তাবুভৌ রামলক্ষ্মণৌ ।
স্রগ্বী ভাস্করবর্ণাভঃ খে ব্যরোচত বীর্যবান্ ॥ 42 ॥
তং তু খস্থং মহাভাগং কবংধং রামলক্ষ্মণৌ ।
প্রস্থিতৌ ত্বং ব্রজস্বেতি বাক্যমূচতুরংতিকে ॥ 43 ॥
গম্যতাং কার্যসিদ্ধ্যর্থমিতি তাবব্রবীত্স চ ।
সুপ্রীতৌ তাবনুজ্ঞাপ্য় কবংধঃ প্রস্থিতস্তদা ॥ 44 ॥
স তত্কবংধঃ প্রতিপদ্য় রূপং বৃতশ্শ্রিয়া ভাস্করতুল্যদেহঃ ।
নিদর্শযন্রামমবেক্ষ্য় খস্থঃ সখ্য়ং কুরুষ্বেতি তদাভ্য়ুবাচ ॥ 45 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে ত্রিসপ্ততিতমস্সর্গঃ ॥
