শ্রীমদ্বাল্মীকীয় রামাযণে অরণ্যকাংডম্ ।
অথ চতুঃসপ্ততিতমস্সর্গঃ ।
তৌ কবংধেন তং মার্গং পংপায়া দর্শিতং বনে ।
প্রতস্থতুর্দিশং গৃহ্য় প্রতীচীং নৃবরাত্মজৌ ॥ 1 ॥
তৌ শৈলেষ্বাচিতানেকান্ ক্ষৌদ্রকল্পফলাংদ্রুমান্ ।
বীক্ষংতৌ জগ্মতুর্ধ্রষ্টুং সুগ্রীবং রামলক্ষ্মণৌ ॥ 2 ॥
কৃত্বা চ শৈলপৃষ্ঠে তু তৌ বাসং রামলক্ষ্মণৌ ।
পংপায়াঃ পশ্চিমং তীরং রাঘবাবুপতস্থতুঃ ॥ 3 ॥
তৌ পুষ্করিণ্য়াঃ পংপায়াস্তীরমাসাদ্য় পশ্চিমম্ ।
অপশ্যতাং ততস্তত্র শবর্য়া রম্যমাশ্রমম্ ॥ 4 ॥
তৌ তমাশ্রমমাসাদ্য় দ্রুমৈর্বহুভীরাবৃতম্ ।
সুরম্যমভিবীক্ষংতৌ শবরীমভ্য়ুপেযতুঃ ॥ 5 ॥
তৌ চ দৃষ্ট্বা তদা সিদ্ধা সমুত্থায় কৃতাংজলিঃ ।
রামস্য় পাদৌ জগ্রাহ লক্ষ্মণস্য় চ ধীমতঃ ॥ 6 ॥
পাদ্যমাচমনীয়ং চ সর্বং প্রাদাদ্যথাবিধি ।
তামুবাচ ততো রামশ্শ্রমণীং সংশিতব্রতাম্ ॥ 7 ॥
কচ্চিত্তে নির্জিতা বিঘ্নাঃ কচ্চিত্তে বর্ধতে তপঃ ।
কচ্চিত্তে নিযতঃ ক্রোধ আহারশ্চ তপোধনে ॥ 8 ॥
কচ্চিত্তে নিযমাঃ প্রাপ্তাঃ কচ্চিত্তে মনসঃ সুখম্ ।
কচ্চিত্তে গুরুশুশ্রূষা সফলা চারুভাষিণি ॥ 9 ॥
রামেণ তাপসী পৃষ্টা সা সিদ্ধা সিদ্ধসম্মতা ।
শশংস শবরী বৃদ্ধা রামায় প্রত্য়ুপস্থিতা ॥ 10 ॥
অদ্য় প্রাপ্তা তপস্সিদ্ধিস্তব সংদর্শনান্ময়া ।
অদ্য় মে সফলং তপ্তং গুরবশ্চ সুপূজিতাঃ ॥ 11 ॥
অদ্য় মে সফলং জন্ম স্বর্গশ্চৈব ভবিষ্যতি ।
ত্বয়ি দেববরে রাম পূজিতে পুরুষর্ষভ ॥ 12 ॥
চক্ষুষা তব সৌম্য়েন পূতাস্মি রঘুনংদন ।
গমিষ্য়াম্যক্ষয়ান্লোকাংস্ত্বত্প্রসাদাদরিংদম ॥ 13 ॥
চিত্রকূটং ত্বয়ি প্রাপ্তে বিমানৈরতুলপ্রভৈঃ ।
ইতস্তে দিবমারূঢা যানহং পর্যচারিষম্ ॥ 14 ॥
তৈশ্চাহমুক্তা ধর্মজ্ঞৈর্মহাভাগৈর্মহর্ষিভিঃ ।
আগমিষ্যতি তে রামস্সুপুণ্যমিমমাশ্রমম্ ॥ 15 ॥
স তে প্রতিগ্রহীতব্যস্সৌমিত্রিসহিতোতিথিঃ ।
তং চ দৃষ্ট্বা বরান্লোকানক্ষয়াংস্ত্বং গমিষ্যসি ॥ 16 ॥
ময়া তু বিবিধং বন্য়ং সংচিতং পুরুষর্ষভ ।
তবার্থে পুরুষব্য়াঘ্র পংপায়াস্তীরসংভবম্ ॥ 17 ॥
এবমুক্তস্স ধর্মাত্মা শবর্য়া শবরীমিদম্ ।
রাঘবঃ প্রাহ বিজ্ঞানে তাং নিত্যমবহিষ্কৃতাম্ ॥ 18 ॥
দনোস্সকাশাত্তত্ত্বেন প্রভাবং তে মহাত্মনঃ ।
শ্রুতং প্রত্যক্ষমিচ্ছামি সংদ্রষ্টুং যদি মন্যসে ॥ 19 ॥
এতত্তু বচনং শ্রুত্তা রামবক্ত্রাদ্বিনিস্সৃতম্ ।
শবরী দর্শয়ামাস তাবুভৌ তদ্বনং মহত্ ॥ 20 ॥
পশ্য় মেঘঘনপ্রখ্য়ং মৃগপক্ষিসমাকুলম্ ।
মতংগবনমিত্য়েব বিশ্রুতং রঘুনংদন ॥ 21 ॥
ইহ তে ভাবিতাত্মানো গুরবো মে মহাবনে ।
জুহবাংচক্রিরে তীর্থং মংত্রবন্মংত্রপূজিতম্ ॥ 22 ॥
ইয়ং প্রত্যক্থ্সলী বেদির্যত্র তে মে সুসত্কৃতাঃ ।
পুষ্পোপহারং কুর্বংতি শ্রমাদুদ্বেপিভিঃ করৈঃ ॥ 23 ॥
তেষাং তপঃপ্রভাবেণ পশ্য়াদ্য়াপি রঘূদ্বহ ।
দ্য়োতয়ংতি দিশস্সর্বাশ্শ্রিয়া বেদ্য়োঽতুলপ্রভাঃ ॥ 24 ॥
অশক্নুবদ্ভিস্তৈর্গংতুমুপবাসশ্রমালসৈঃ ।
চিংতিতেঽভ্য়াগতান্পশ্য় সহিতান্সপ্তসাগরান্ ॥ 25 ॥
কৃতাভিষেকৈস্তৈর্ন্যস্তা বল্কলাঃ পাদপেষ্বিহ ।
অদ্য়াপি নাবশুষ্য়ংতি প্রদেশে রঘুনংদন ॥ 26 ॥
দেবকার্য়াণি কুর্বদ্ভির্য়ানীমানি কৃতানি বৈ ।
পুষ্পৈঃকুবলয়ৈস্সার্ধং ম্লানত্বং নোপয়াংতিবৈ ॥ 27 ॥
কৃত্স্নং বনমিদং দৃষ্টং শ্রোতব্য়ং চ শ্রুতং ত্বয়া ।
তদিচ্ছাম্যভ্যনুজ্ঞাতা ত্যক্তুমেতত্কলেবরম্ ॥ 28 ॥
তেষামিচ্ছাম্যহং গংতুং সমীপং ভাবিতাত্মনাম্ ।
মুনীনামাশ্রমো যেষামহং চ পরিচারিণী ॥ 29 ॥
ধর্মিষ্ঠং তু বচশ্শ্রুত্বা রাঘবস্সহলক্ষ্মণঃ ।
প্রহর্ষমতুলং লেভে আশ্চর্যমিতি তত্ত্বতঃ ॥ 30 ॥
তামুবাচ ততো রামশ্শ্রমণীং সংশিতব্রতাম্ ।
অর্চিতোঽহং ত্বয়া ভক্ত্য়া গচ্ছকামং যথাসুখম্ ॥ 31 ॥
ইত্য়ুক্তা জটিলা বৃদ্ধা চীরকৃষ্ণাজিনাংবরা ।
তস্মিন্মুহূর্তে শবরী দেহং জীর্ণং জিহাসতী ॥ 32 ॥
অনুজ্ঞাতা তু রামেণ হুত্বাত্মানং হুতাশনে ।
জ্বলত্পাবকসংকাশা স্বর্গমেব জগাম সা ॥ 33 ॥
দিব্য়াভরণসংয়ুক্তা দিব্যমাল্য়ানুলেপনা ।
দিব্য়াংবরধরা তত্র বভূব প্রিযদর্শনা ॥ 34 ॥
বিরাজয়ংতী তং দেশং বিদ্য়ুত্সৌদামিনী যথা ।
যত্র তে সুকৃতাত্মানো বিহরংতি মহর্ষয়ঃ ॥ 35 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে চতুঃসপ্ততিতমস্সর্গঃ ॥
