ശ്രീമദ്വാല്മീകീയ രാമായണേ അരണ്യകാംഡമ് ।
അഥ ചതുഃസപ്തതിതമസ്സര്ഗഃ ।
തൌ കബംധേന തം മാര്ഗം പംപായാ ദര്ശിതം വനേ ।
പ്രതസ്ഥതുര്ദിശം ഗൃഹ്യ പ്രതീചീം നൃവരാത്മജൌ ॥ 1 ॥
തൌ ശൈലേഷ്വാചിതാനേകാന് ക്ഷൌദ്രകല്പഫലാംദ്രുമാന് ।
വീക്ഷംതൌ ജഗ്മതുര്ധ്രഷ്ടും സുഗ്രീവം രാമലക്ഷ്മണൌ ॥ 2 ॥
കൃത്വാ ച ശൈലപൃഷ്ഠേ തു തൌ വാസം രാമലക്ഷ്മണൌ ।
പംപായാഃ പശ്ചിമം തീരം രാഘവാവുപതസ്ഥതുഃ ॥ 3 ॥
തൌ പുഷ്കരിണ്യാഃ പംപായാസ്തീരമാസാദ്യ പശ്ചിമമ് ।
അപശ്യതാം തതസ്തത്ര ശബര്യാ രമ്യമാശ്രമമ് ॥ 4 ॥
തൌ തമാശ്രമമാസാദ്യ ദ്രുമൈര്ബഹുഭീരാവൃതമ് ।
സുരമ്യമഭിവീക്ഷംതൌ ശബരീമഭ്യുപേയതുഃ ॥ 5 ॥
തൌ ച ദൃഷ്ട്വാ തദാ സിദ്ധാ സമുത്ഥായ കൃതാംജലിഃ ।
രാമസ്യ പാദൌ ജഗ്രാഹ ലക്ഷ്മണസ്യ ച ധീമതഃ ॥ 6 ॥
പാദ്യമാചമനീയം ച സർവം പ്രാദാദ്യഥാവിധി ।
താമുവാച തതോ രാമശ്ശ്രമണീം സംശിതവ്രതാമ് ॥ 7 ॥
കച്ചിത്തേ നിര്ജിതാ വിഘ്നാഃ കച്ചിത്തേ വര്ധതേ തപഃ ।
കച്ചിത്തേ നിയതഃ ക്രോധ ആഹാരശ്ച തപോധനേ ॥ 8 ॥
കച്ചിത്തേ നിയമാഃ പ്രാപ്താഃ കച്ചിത്തേ മനസഃ സുഖമ് ।
കച്ചിത്തേ ഗുരുശുശ്രൂഷാ സഫലാ ചാരുഭാഷിണി ॥ 9 ॥
രാമേണ താപസീ പൃഷ്ടാ സാ സിദ്ധാ സിദ്ധസമ്മതാ ।
ശശംസ ശബരീ വൃദ്ധാ രാമായ പ്രത്യുപസ്ഥിതാ ॥ 10 ॥
അദ്യ പ്രാപ്താ തപസ്സിദ്ധിസ്തവ സംദര്ശനാന്മയാ ।
അദ്യ മേ സഫലം തപ്തം ഗുരവശ്ച സുപൂജിതാഃ ॥ 11 ॥
അദ്യ മേ സഫലം ജന്മ സ്വര്ഗശ്ചൈവ ഭവിഷ്യതി ।
ത്വയി ദേവവരേ രാമ പൂജിതേ പുരുഷര്ഷഭ ॥ 12 ॥
ചക്ഷുഷാ തവ സൌമ്യേന പൂതാസ്മി രഘുനംദന ।
ഗമിഷ്യാമ്യക്ഷയാന്ലോകാംസ്ത്വത്പ്രസാദാദരിംദമ ॥ 13 ॥
ചിത്രകൂടം ത്വയി പ്രാപ്തേ വിമാനൈരതുലപ്രഭൈഃ ।
ഇതസ്തേ ദിവമാരൂഢാ യാനഹം പര്യചാരിഷമ് ॥ 14 ॥
തൈശ്ചാഹമുക്താ ധര്മജ്ഞൈര്മഹാഭാഗൈര്മഹര്ഷിഭിഃ ।
ആഗമിഷ്യതി തേ രാമസ്സുപുണ്യമിമമാശ്രമമ് ॥ 15 ॥
സ തേ പ്രതിഗ്രഹീതവ്യസ്സൌമിത്രിസഹിതോതിഥിഃ ।
തം ച ദൃഷ്ട്വാ വരാന്ലോകാനക്ഷയാംസ്ത്വം ഗമിഷ്യസി ॥ 16 ॥
മയാ തു വിവിധം വന്യം സംചിതം പുരുഷര്ഷഭ ।
തവാര്ഥേ പുരുഷവ്യാഘ്ര പംപായാസ്തീരസംഭവമ് ॥ 17 ॥
ഏവമുക്തസ്സ ധര്മാത്മാ ശബര്യാ ശബരീമിദമ് ।
രാഘവഃ പ്രാഹ വിജ്ഞാനേ താം നിത്യമബഹിഷ്കൃതാമ് ॥ 18 ॥
ദനോസ്സകാശാത്തത്ത്വേന പ്രഭാവം തേ മഹാത്മനഃ ।
ശ്രുതം പ്രത്യക്ഷമിച്ഛാമി സംദ്രഷ്ടും യദി മന്യസേ ॥ 19 ॥
ഏതത്തു വചനം ശ്രുത്താ രാമവക്ത്രാദ്വിനിസ്സൃതമ് ।
ശബരീ ദര്ശയാമാസ താവുഭൌ തദ്വനം മഹത് ॥ 20 ॥
പശ്യ മേഘഘനപ്രഖ്യം മൃഗപക്ഷിസമാകുലമ് ।
മതംഗവനമിത്യേവ വിശ്രുതം രഘുനംദന ॥ 21 ॥
ഇഹ തേ ഭാവിതാത്മാനോ ഗുരവോ മേ മഹാവനേ ।
ജുഹവാംചക്രിരേ തീര്ഥം മംത്രവന്മംത്രപൂജിതമ് ॥ 22 ॥
ഇയം പ്രത്യക്ഥ്സലീ വേദിര്യത്ര തേ മേ സുസത്കൃതാഃ ।
പുഷ്പോപഹാരം കുർവംതി ശ്രമാദുദ്വേപിഭിഃ കരൈഃ ॥ 23 ॥
തേഷാം തപഃപ്രഭാവേണ പശ്യാദ്യാപി രഘൂദ്വഹ ।
ദ്യോതയംതി ദിശസ്സർവാശ്ശ്രിയാ വേദ്യോഽതുലപ്രഭാഃ ॥ 24 ॥
അശക്നുവദ്ഭിസ്തൈര്ഗംതുമുപവാസശ്രമാലസൈഃ ।
ചിംതിതേഽഭ്യാഗതാന്പശ്യ സഹിതാന്സപ്തസാഗരാന് ॥ 25 ॥
കൃതാഭിഷേകൈസ്തൈര്ന്യസ്താ വല്കലാഃ പാദപേഷ്വിഹ ।
അദ്യാപി നാവശുഷ്യംതി പ്രദേശേ രഘുനംദന ॥ 26 ॥
ദേവകാര്യാണി കുർവദ്ഭിര്യാനീമാനി കൃതാനി വൈ ।
പുഷ്പൈഃകുവലയൈസ്സാര്ധം മ്ലാനത്വം നോപയാംതിവൈ ॥ 27 ॥
കൃത്സ്നം വനമിദം ദൃഷ്ടം ശ്രോതവ്യം ച ശ്രുതം ത്വയാ ।
തദിച്ഛാമ്യഭ്യനുജ്ഞാതാ ത്യക്തുമേതത്കലേബരമ് ॥ 28 ॥
തേഷാമിച്ഛാമ്യഹം ഗംതും സമീപം ഭാവിതാത്മനാമ് ।
മുനീനാമാശ്രമോ യേഷാമഹം ച പരിചാരിണീ ॥ 29 ॥
ധര്മിഷ്ഠം തു വചശ്ശ്രുത്വാ രാഘവസ്സഹലക്ഷ്മണഃ ।
പ്രഹര്ഷമതുലം ലേഭേ ആശ്ചര്യമിതി തത്ത്വതഃ ॥ 30 ॥
താമുവാച തതോ രാമശ്ശ്രമണീം സംശിതവ്രതാമ് ।
അര്ചിതോഽഹം ത്വയാ ഭക്ത്യാ ഗച്ഛകാമം യഥാസുഖമ് ॥ 31 ॥
ഇത്യുക്താ ജടിലാ വൃദ്ധാ ചീരകൃഷ്ണാജിനാംബരാ ।
തസ്മിന്മുഹൂര്തേ ശബരീ ദേഹം ജീര്ണം ജിഹാസതീ ॥ 32 ॥
അനുജ്ഞാതാ തു രാമേണ ഹുത്വാത്മാനം ഹുതാശനേ ।
ജ്വലത്പാവകസംകാശാ സ്വര്ഗമേവ ജഗാമ സാ ॥ 33 ॥
ദിവ്യാഭരണസംയുക്താ ദിവ്യമാല്യാനുലേപനാ ।
ദിവ്യാംബരധരാ തത്ര ബഭൂവ പ്രിയദര്ശനാ ॥ 34 ॥
വിരാജയംതീ തം ദേശം വിദ്യുത്സൌദാമിനീ യഥാ ।
യത്ര തേ സുകൃതാത്മാനോ വിഹരംതി മഹര്ഷയഃ ॥ 35 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ചതുഃസപ്തതിതമസ്സര്ഗഃ ॥
