శ్రీమద్వాల్మీకీయ రామాయణే అరణ్యకాండమ్ ।
అథ చతుఃసప్తతితమస్సర్గః ।
తౌ కబంధేన తం మార్గం పంపాయా దర్శితం వనే ।
ప్రతస్థతుర్దిశం గృహ్య ప్రతీచీం నృవరాత్మజౌ ॥ 1 ॥
తౌ శైలేష్వాచితానేకాన్ క్షౌద్రకల్పఫలాంద్రుమాన్ ।
వీక్షంతౌ జగ్మతుర్ధ్రష్టుం సుగ్రీవం రామలక్ష్మణౌ ॥ 2 ॥
కృత్వా చ శైలపృష్ఠే తు తౌ వాసం రామలక్ష్మణౌ ।
పంపాయాః పశ్చిమం తీరం రాఘవావుపతస్థతుః ॥ 3 ॥
తౌ పుష్కరిణ్యాః పంపాయాస్తీరమాసాద్య పశ్చిమమ్ ।
అపశ్యతాం తతస్తత్ర శబర్యా రమ్యమాశ్రమమ్ ॥ 4 ॥
తౌ తమాశ్రమమాసాద్య ద్రుమైర్బహుభీరావృతమ్ ।
సురమ్యమభివీక్షంతౌ శబరీమభ్యుపేయతుః ॥ 5 ॥
తౌ చ దృష్ట్వా తదా సిద్ధా సముత్థాయ కృతాంజలిః ।
రామస్య పాదౌ జగ్రాహ లక్ష్మణస్య చ ధీమతః ॥ 6 ॥
పాద్యమాచమనీయం చ సర్వం ప్రాదాద్యథావిధి ।
తామువాచ తతో రామశ్శ్రమణీం సంశితవ్రతామ్ ॥ 7 ॥
కచ్చిత్తే నిర్జితా విఘ్నాః కచ్చిత్తే వర్ధతే తపః ।
కచ్చిత్తే నియతః క్రోధ ఆహారశ్చ తపోధనే ॥ 8 ॥
కచ్చిత్తే నియమాః ప్రాప్తాః కచ్చిత్తే మనసః సుఖమ్ ।
కచ్చిత్తే గురుశుశ్రూషా సఫలా చారుభాషిణి ॥ 9 ॥
రామేణ తాపసీ పృష్టా సా సిద్ధా సిద్ధసమ్మతా ।
శశంస శబరీ వృద్ధా రామాయ ప్రత్యుపస్థితా ॥ 10 ॥
అద్య ప్రాప్తా తపస్సిద్ధిస్తవ సందర్శనాన్మయా ।
అద్య మే సఫలం తప్తం గురవశ్చ సుపూజితాః ॥ 11 ॥
అద్య మే సఫలం జన్మ స్వర్గశ్చైవ భవిష్యతి ।
త్వయి దేవవరే రామ పూజితే పురుషర్షభ ॥ 12 ॥
చక్షుషా తవ సౌమ్యేన పూతాస్మి రఘునందన ।
గమిష్యామ్యక్షయాన్లోకాంస్త్వత్ప్రసాదాదరిందమ ॥ 13 ॥
చిత్రకూటం త్వయి ప్రాప్తే విమానైరతులప్రభైః ।
ఇతస్తే దివమారూఢా యానహం పర్యచారిషమ్ ॥ 14 ॥
తైశ్చాహముక్తా ధర్మజ్ఞైర్మహాభాగైర్మహర్షిభిః ।
ఆగమిష్యతి తే రామస్సుపుణ్యమిమమాశ్రమమ్ ॥ 15 ॥
స తే ప్రతిగ్రహీతవ్యస్సౌమిత్రిసహితోతిథిః ।
తం చ దృష్ట్వా వరాన్లోకానక్షయాంస్త్వం గమిష్యసి ॥ 16 ॥
మయా తు వివిధం వన్యం సంచితం పురుషర్షభ ।
తవార్థే పురుషవ్యాఘ్ర పంపాయాస్తీరసంభవమ్ ॥ 17 ॥
ఏవముక్తస్స ధర్మాత్మా శబర్యా శబరీమిదమ్ ।
రాఘవః ప్రాహ విజ్ఞానే తాం నిత్యమబహిష్కృతామ్ ॥ 18 ॥
దనోస్సకాశాత్తత్త్వేన ప్రభావం తే మహాత్మనః ।
శ్రుతం ప్రత్యక్షమిచ్ఛామి సంద్రష్టుం యది మన్యసే ॥ 19 ॥
ఏతత్తు వచనం శ్రుత్తా రామవక్త్రాద్వినిస్సృతమ్ ।
శబరీ దర్శయామాస తావుభౌ తద్వనం మహత్ ॥ 20 ॥
పశ్య మేఘఘనప్రఖ్యం మృగపక్షిసమాకులమ్ ।
మతంగవనమిత్యేవ విశ్రుతం రఘునందన ॥ 21 ॥
ఇహ తే భావితాత్మానో గురవో మే మహావనే ।
జుహవాంచక్రిరే తీర్థం మంత్రవన్మంత్రపూజితమ్ ॥ 22 ॥
ఇయం ప్రత్యక్థ్సలీ వేదిర్యత్ర తే మే సుసత్కృతాః ।
పుష్పోపహారం కుర్వంతి శ్రమాదుద్వేపిభిః కరైః ॥ 23 ॥
తేషాం తపఃప్రభావేణ పశ్యాద్యాపి రఘూద్వహ ।
ద్యోతయంతి దిశస్సర్వాశ్శ్రియా వేద్యోఽతులప్రభాః ॥ 24 ॥
అశక్నువద్భిస్తైర్గంతుముపవాసశ్రమాలసైః ।
చింతితేఽభ్యాగతాన్పశ్య సహితాన్సప్తసాగరాన్ ॥ 25 ॥
కృతాభిషేకైస్తైర్న్యస్తా వల్కలాః పాదపేష్విహ ।
అద్యాపి నావశుష్యంతి ప్రదేశే రఘునందన ॥ 26 ॥
దేవకార్యాణి కుర్వద్భిర్యానీమాని కృతాని వై ।
పుష్పైఃకువలయైస్సార్ధం మ్లానత్వం నోపయాంతివై ॥ 27 ॥
కృత్స్నం వనమిదం దృష్టం శ్రోతవ్యం చ శ్రుతం త్వయా ।
తదిచ్ఛామ్యభ్యనుజ్ఞాతా త్యక్తుమేతత్కలేబరమ్ ॥ 28 ॥
తేషామిచ్ఛామ్యహం గంతుం సమీపం భావితాత్మనామ్ ।
మునీనామాశ్రమో యేషామహం చ పరిచారిణీ ॥ 29 ॥
ధర్మిష్ఠం తు వచశ్శ్రుత్వా రాఘవస్సహలక్ష్మణః ।
ప్రహర్షమతులం లేభే ఆశ్చర్యమితి తత్త్వతః ॥ 30 ॥
తామువాచ తతో రామశ్శ్రమణీం సంశితవ్రతామ్ ।
అర్చితోఽహం త్వయా భక్త్యా గచ్ఛకామం యథాసుఖమ్ ॥ 31 ॥
ఇత్యుక్తా జటిలా వృద్ధా చీరకృష్ణాజినాంబరా ।
తస్మిన్ముహూర్తే శబరీ దేహం జీర్ణం జిహాసతీ ॥ 32 ॥
అనుజ్ఞాతా తు రామేణ హుత్వాత్మానం హుతాశనే ।
జ్వలత్పావకసంకాశా స్వర్గమేవ జగామ సా ॥ 33 ॥
దివ్యాభరణసంయుక్తా దివ్యమాల్యానులేపనా ।
దివ్యాంబరధరా తత్ర బభూవ ప్రియదర్శనా ॥ 34 ॥
విరాజయంతీ తం దేశం విద్యుత్సౌదామినీ యథా ।
యత్ర తే సుకృతాత్మానో విహరంతి మహర్షయః ॥ 35 ॥
ఇత్యార్షే శ్రీమద్రామాయణే వాల్మీకీయ ఆదికావ్యే అరణ్యకాండే చతుఃసప్తతితమస్సర్గః ॥
