śrīmadvālmīkīya rāmāyaṇē araṇyakāṇḍam ।
atha chatuḥsaptatitamassargaḥ ।
tau kabandhēna taṃ mārgaṃ pampāyā darśitaṃ vanē ।
pratasthaturdiśaṃ gṛhya pratīchīṃ nṛvarātmajau ॥ 1 ॥
tau śailēṣvāchitānēkān kṣaudrakalpaphalāndrumān ।
vīkṣantau jagmaturdhraṣṭuṃ sugrīvaṃ rāmalakṣmaṇau ॥ 2 ॥
kṛtvā cha śailapṛṣṭhē tu tau vāsaṃ rāmalakṣmaṇau ।
pampāyāḥ paśchimaṃ tīraṃ rāghavāvupatasthatuḥ ॥ 3 ॥
tau puṣkariṇyāḥ pampāyāstīramāsādya paśchimam ।
apaśyatāṃ tatastatra śabaryā ramyamāśramam ॥ 4 ॥
tau tamāśramamāsādya drumairbahubhīrāvṛtam ।
suramyamabhivīkṣantau śabarīmabhyupēyatuḥ ॥ 5 ॥
tau cha dṛṣṭvā tadā siddhā samutthāya kṛtāñjaliḥ ।
rāmasya pādau jagrāha lakṣmaṇasya cha dhīmataḥ ॥ 6 ॥
pādyamāchamanīyaṃ cha sarvaṃ prādādyathāvidhi ।
tāmuvācha tatō rāmaśśramaṇīṃ saṃśitavratām ॥ 7 ॥
kachchittē nirjitā vighnāḥ kachchittē vardhatē tapaḥ ।
kachchittē niyataḥ krōdha āhāraścha tapōdhanē ॥ 8 ॥
kachchittē niyamāḥ prāptāḥ kachchittē manasaḥ sukham ।
kachchittē guruśuśrūṣā saphalā chārubhāṣiṇi ॥ 9 ॥
rāmēṇa tāpasī pṛṣṭā sā siddhā siddhasammatā ।
śaśaṃsa śabarī vṛddhā rāmāya pratyupasthitā ॥ 10 ॥
adya prāptā tapassiddhistava sandarśanānmayā ।
adya mē saphalaṃ taptaṃ guravaścha supūjitāḥ ॥ 11 ॥
adya mē saphalaṃ janma svargaśchaiva bhaviṣyati ।
tvayi dēvavarē rāma pūjitē puruṣarṣabha ॥ 12 ॥
chakṣuṣā tava saumyēna pūtāsmi raghunandana ।
gamiṣyāmyakṣayānlōkāṃstvatprasādādarindama ॥ 13 ॥
chitrakūṭaṃ tvayi prāptē vimānairatulaprabhaiḥ ।
itastē divamārūḍhā yānahaṃ paryachāriṣam ॥ 14 ॥
taiśchāhamuktā dharmajñairmahābhāgairmaharṣibhiḥ ।
āgamiṣyati tē rāmassupuṇyamimamāśramam ॥ 15 ॥
sa tē pratigrahītavyassaumitrisahitōtithiḥ ।
taṃ cha dṛṣṭvā varānlōkānakṣayāṃstvaṃ gamiṣyasi ॥ 16 ॥
mayā tu vividhaṃ vanyaṃ sañchitaṃ puruṣarṣabha ।
tavārthē puruṣavyāghra pampāyāstīrasambhavam ॥ 17 ॥
ēvamuktassa dharmātmā śabaryā śabarīmidam ।
rāghavaḥ prāha vijñānē tāṃ nityamabahiṣkṛtām ॥ 18 ॥
danōssakāśāttattvēna prabhāvaṃ tē mahātmanaḥ ।
śrutaṃ pratyakṣamichChāmi sandraṣṭuṃ yadi manyasē ॥ 19 ॥
ētattu vachanaṃ śruttā rāmavaktrādvinissṛtam ।
śabarī darśayāmāsa tāvubhau tadvanaṃ mahat ॥ 20 ॥
paśya mēghaghanaprakhyaṃ mṛgapakṣisamākulam ।
mataṅgavanamityēva viśrutaṃ raghunandana ॥ 21 ॥
iha tē bhāvitātmānō guravō mē mahāvanē ।
juhavāñchakrirē tīrthaṃ mantravanmantrapūjitam ॥ 22 ॥
iyaṃ pratyakthsalī vēdiryatra tē mē susatkṛtāḥ ।
puṣpōpahāraṃ kurvanti śramādudvēpibhiḥ karaiḥ ॥ 23 ॥
tēṣāṃ tapaḥprabhāvēṇa paśyādyāpi raghūdvaha ।
dyōtayanti diśassarvāśśriyā vēdyō'tulaprabhāḥ ॥ 24 ॥
aśaknuvadbhistairgantumupavāsaśramālasaiḥ ।
chintitē'bhyāgatānpaśya sahitānsaptasāgarān ॥ 25 ॥
kṛtābhiṣēkaistairnyastā valkalāḥ pādapēṣviha ।
adyāpi nāvaśuṣyanti pradēśē raghunandana ॥ 26 ॥
dēvakāryāṇi kurvadbhiryānīmāni kṛtāni vai ।
puṣpaiḥkuvalayaissārdhaṃ mlānatvaṃ nōpayāntivai ॥ 27 ॥
kṛtsnaṃ vanamidaṃ dṛṣṭaṃ śrōtavyaṃ cha śrutaṃ tvayā ।
tadichChāmyabhyanujñātā tyaktumētatkalēbaram ॥ 28 ॥
tēṣāmichChāmyahaṃ gantuṃ samīpaṃ bhāvitātmanām ।
munīnāmāśramō yēṣāmahaṃ cha parichāriṇī ॥ 29 ॥
dharmiṣṭhaṃ tu vachaśśrutvā rāghavassahalakṣmaṇaḥ ।
praharṣamatulaṃ lēbhē āścharyamiti tattvataḥ ॥ 30 ॥
tāmuvācha tatō rāmaśśramaṇīṃ saṃśitavratām ।
architō'haṃ tvayā bhaktyā gachChakāmaṃ yathāsukham ॥ 31 ॥
ityuktā jaṭilā vṛddhā chīrakṛṣṇājināmbarā ।
tasminmuhūrtē śabarī dēhaṃ jīrṇaṃ jihāsatī ॥ 32 ॥
anujñātā tu rāmēṇa hutvātmānaṃ hutāśanē ।
jvalatpāvakasaṅkāśā svargamēva jagāma sā ॥ 33 ॥
divyābharaṇasaṃyuktā divyamālyānulēpanā ।
divyāmbaradharā tatra babhūva priyadarśanā ॥ 34 ॥
virājayantī taṃ dēśaṃ vidyutsaudāminī yathā ।
yatra tē sukṛtātmānō viharanti maharṣayaḥ ॥ 35 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē chatuḥsaptatitamassargaḥ ॥
