ශ්රීමද්වාල්මීකීය රාමායණේ අරණ්යකාංඩම් ।
අථ චතුඃසප්තතිතමස්සර්ගඃ ।
තෞ කබංධේන තං මාර්ගං පංපායා දර්ශිතං වනේ ।
ප්රතස්ථතුර්දිශං ගෘහ්ය ප්රතීචීං නෘවරාත්මජෞ ॥ 1 ॥
තෞ ශෛලේෂ්වාචිතානේකාන් ක්ෂෞද්රකල්පඵලාංද්රුමාන් ।
වීක්ෂංතෞ ජග්මතුර්ධ්රෂ්ටුං සුග්රීවං රාමලක්ෂ්මණෞ ॥ 2 ॥
කෘත්වා ච ශෛලපෘෂ්ඨේ තු තෞ වාසං රාමලක්ෂ්මණෞ ।
පංපායාඃ පශ්චිමං තීරං රාඝවාවුපතස්ථතුඃ ॥ 3 ॥
තෞ පුෂ්කරිණ්යාඃ පංපායාස්තීරමාසාද්ය පශ්චිමම් ।
අපශ්යතාං තතස්තත්ර ශබර්යා රම්යමාශ්රමම් ॥ 4 ॥
තෞ තමාශ්රමමාසාද්ය ද්රුමෛර්බහුභීරාවෘතම් ।
සුරම්යමභිවීක්ෂංතෞ ශබරීමභ්යුපේයතුඃ ॥ 5 ॥
තෞ ච දෘෂ්ට්වා තදා සිද්ධා සමුත්ථාය කෘතාංජලිඃ ।
රාමස්ය පාදෞ ජග්රාහ ලක්ෂ්මණස්ය ච ධීමතඃ ॥ 6 ॥
පාද්යමාචමනීයං ච සර්වං ප්රාදාද්යථාවිධි ।
තාමුවාච තතෝ රාමශ්ශ්රමණීං සංශිතව්රතාම් ॥ 7 ॥
කච්චිත්තේ නිර්ජිතා විඝ්නාඃ කච්චිත්තේ වර්ධතේ තපඃ ।
කච්චිත්තේ නියතඃ ක්රෝධ ආහාරශ්ච තපෝධනේ ॥ 8 ॥
කච්චිත්තේ නියමාඃ ප්රාප්තාඃ කච්චිත්තේ මනසඃ සුඛම් ।
කච්චිත්තේ ගුරුශුශ්රූෂා සඵලා චාරුභාෂිණි ॥ 9 ॥
රාමේණ තාපසී පෘෂ්ටා සා සිද්ධා සිද්ධසම්මතා ।
ශශංස ශබරී වෘද්ධා රාමාය ප්රත්යුපස්ථිතා ॥ 10 ॥
අද්ය ප්රාප්තා තපස්සිද්ධිස්තව සංදර්ශනාන්මයා ।
අද්ය මේ සඵලං තප්තං ගුරවශ්ච සුපූජිතාඃ ॥ 11 ॥
අද්ය මේ සඵලං ජන්ම ස්වර්ගශ්චෛව භවිෂ්යති ।
ත්වයි දේවවරේ රාම පූජිතේ පුරුෂර්ෂභ ॥ 12 ॥
චක්ෂුෂා තව සෞම්යේන පූතාස්මි රඝුනංදන ।
ගමිෂ්යාම්යක්ෂයාන්ලෝකාංස්ත්වත්ප්රසාදාදරිංදම ॥ 13 ॥
චිත්රකූටං ත්වයි ප්රාප්තේ විමානෛරතුලප්රභෛඃ ।
ඉතස්තේ දිවමාරූඪා යානහං පර්යචාරිෂම් ॥ 14 ॥
තෛශ්චාහමුක්තා ධර්මජ්ඤෛර්මහාභාගෛර්මහර්ෂිභිඃ ।
ආගමිෂ්යති තේ රාමස්සුපුණ්යමිමමාශ්රමම් ॥ 15 ॥
ස තේ ප්රතිග්රහීතව්යස්සෞමිත්රිසහිතෝතිථිඃ ।
තං ච දෘෂ්ට්වා වරාන්ලෝකානක්ෂයාංස්ත්වං ගමිෂ්යසි ॥ 16 ॥
මයා තු විවිධං වන්යං සංචිතං පුරුෂර්ෂභ ।
තවාර්ථේ පුරුෂව්යාඝ්ර පංපායාස්තීරසංභවම් ॥ 17 ॥
ඒවමුක්තස්ස ධර්මාත්මා ශබර්යා ශබරීමිදම් ।
රාඝවඃ ප්රාහ විජ්ඤානේ තාං නිත්යමබහිෂ්කෘතාම් ॥ 18 ॥
දනෝස්සකාශාත්තත්ත්වේන ප්රභාවං තේ මහාත්මනඃ ।
ශ්රුතං ප්රත්යක්ෂමිච්ඡාමි සංද්රෂ්ටුං යදි මන්යසේ ॥ 19 ॥
ඒතත්තු වචනං ශ්රුත්තා රාමවක්ත්රාද්විනිස්සෘතම් ।
ශබරී දර්ශයාමාස තාවුභෞ තද්වනං මහත් ॥ 20 ॥
පශ්ය මේඝඝනප්රඛ්යං මෘගපක්ෂිසමාකුලම් ।
මතංගවනමිත්යේව විශ්රුතං රඝුනංදන ॥ 21 ॥
ඉහ තේ භාවිතාත්මානෝ ගුරවෝ මේ මහාවනේ ।
ජුහවාංචක්රිරේ තීර්ථං මංත්රවන්මංත්රපූජිතම් ॥ 22 ॥
ඉයං ප්රත්යක්ථ්සලී වේදිර්යත්ර තේ මේ සුසත්කෘතාඃ ।
පුෂ්පෝපහාරං කුර්වංති ශ්රමාදුද්වේපිභිඃ කරෛඃ ॥ 23 ॥
තේෂාං තපඃප්රභාවේණ පශ්යාද්යාපි රඝූද්වහ ।
ද්යෝතයංති දිශස්සර්වාශ්ශ්රියා වේද්යෝऽතුලප්රභාඃ ॥ 24 ॥
අශක්නුවද්භිස්තෛර්ගංතුමුපවාසශ්රමාලසෛඃ ।
චිංතිතේऽභ්යාගතාන්පශ්ය සහිතාන්සප්තසාගරාන් ॥ 25 ॥
කෘතාභිෂේකෛස්තෛර්න්යස්තා වල්කලාඃ පාදපේෂ්විහ ।
අද්යාපි නාවශුෂ්යංති ප්රදේශේ රඝුනංදන ॥ 26 ॥
දේවකාර්යාණි කුර්වද්භිර්යානීමානි කෘතානි වෛ ।
පුෂ්පෛඃකුවලයෛස්සාර්ධං ම්ලානත්වං නෝපයාංතිවෛ ॥ 27 ॥
කෘත්ස්නං වනමිදං දෘෂ්ටං ශ්රෝතව්යං ච ශ්රුතං ත්වයා ।
තදිච්ඡාම්යභ්යනුජ්ඤාතා ත්යක්තුමේතත්කලේබරම් ॥ 28 ॥
තේෂාමිච්ඡාම්යහං ගංතුං සමීපං භාවිතාත්මනාම් ।
මුනීනාමාශ්රමෝ යේෂාමහං ච පරිචාරිණී ॥ 29 ॥
ධර්මිෂ්ඨං තු වචශ්ශ්රුත්වා රාඝවස්සහලක්ෂ්මණඃ ।
ප්රහර්ෂමතුලං ලේභේ ආශ්චර්යමිති තත්ත්වතඃ ॥ 30 ॥
තාමුවාච තතෝ රාමශ්ශ්රමණීං සංශිතව්රතාම් ।
අර්චිතෝऽහං ත්වයා භක්ත්යා ගච්ඡකාමං යථාසුඛම් ॥ 31 ॥
ඉත්යුක්තා ජටිලා වෘද්ධා චීරකෘෂ්ණාජිනාංබරා ।
තස්මින්මුහූර්තේ ශබරී දේහං ජීර්ණං ජිහාසතී ॥ 32 ॥
අනුජ්ඤාතා තු රාමේණ හුත්වාත්මානං හුතාශනේ ।
ජ්වලත්පාවකසංකාශා ස්වර්ගමේව ජගාම සා ॥ 33 ॥
දිව්යාභරණසංයුක්තා දිව්යමාල්යානුලේපනා ।
දිව්යාංබරධරා තත්ර බභූව ප්රියදර්ශනා ॥ 34 ॥
විරාජයංතී තං දේශං විද්යුත්සෞදාමිනී යථා ।
යත්ර තේ සුකෘතාත්මානෝ විහරංති මහර්ෂයඃ ॥ 35 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ චතුඃසප්තතිතමස්සර්ගඃ ॥
