শ্রীমদ্বাল্মীকীয় রামাযণে কিষ্কিংধাকাংডম্ ।
অথ ত্রিংশস্সর্গঃ ।
গুহং প্রবিষ্টে সুগ্রীবে বিমুক্তে গগনে ঘনৈঃ ।
বর্ষরাত্রোষিতো রামঃ কামশোকাভিপীডিতঃ ॥ 1 ॥
পাংডুরং গগনং দৃষ্ট্বা বিমলং চংদ্রমংডলম্ ।
শারদীং রজনীং চৈব দৃষ্ট্বা জ্য়োত্স্নানুলেপনাম্ ॥ 2 ॥
কামবৃত্তং চ সুগ্রীবং নষ্টাং চ জনকাত্মজাম্ ।
বুদ্ধ্বা কালমতীতং চ মুমোহ পরমাতুরঃ ॥ 3 ॥
স তু সংজ্ঞামুপাগম্য় মুহূর্তান্মতিমান্পুনঃ ।
মনস্স্থামপি বৈদেহীং চিংতয়ামাস রাঘবঃ ॥ 4 ॥
আসীনঃ পর্বতস্য়াগ্রে হেমধাতুবিভূষিতে ।
শারদং গগনং দৃষ্ট্বা জগাম মনসা প্রিয়াম্ ॥ 5 ॥
দৃষ্ট্বা চ বিমলং ব্য়োম গতবিদ্য়ুদ্বলাহকম্ ।
সারসারাবসংঘুষ্ঠং বিললাপার্তয়া গিরা ॥ 6 ॥
সারসারাবসন্নাদৈস্সারসারবনাদিনী ।
যাঽঽশ্রমে রমতে বালা সাঽদ্য় মে রমতে কথম্ ॥ 7 ॥
পুষ্পিতাংশ্চাসনান্ দৃষ্ট্বা কাংচনানিব নির্মলান্ ।
কথং সা রমতে বালা পশ্য়ংতী মামপশ্যতী ॥ 8 ॥
যা পুরা কলহংসানাং স্বরেণ কলভাষিণী ।
বুধ্যতে চারুসর্বাংগী সাঽদ্য় মে বুদ্ধ্যতে কথম্ ॥ 9 ॥
নিস্বনং চক্রবাকানাং নিশম্য় নহচারিণাম্ ।
পুংডরীকবিশালাক্ষী কথমেষা ভবিষ্যতি ॥ 10 ॥
সরাংসি সরিতো বাপীঃ কাননানি বনানি চ ।
তাং বিনা মৃগশাবাক্ষীং চরন্নাদ্য় সুখং লভে ॥ 11 ॥
অপি তাং মদ্বিয়োগাচ্ছ সৌকুমার্য়াচ্চ ভামিনীম্ ।
সুদূরং পীডয়েত্কামশ্শরদ্গুণনিরংতরঃ ॥ 12 ॥
এবমাদি নরশ্রেষ্ঠো বিললাপ নৃপাত্মজঃ ।
বিহংগ ইব সারংগস্সলিলং ত্রিদশেশ্বরাত্ ॥ 13 ॥
ততশ্চংচূর্য় রম্য়েষু ফলার্থী গিরিসানুষু ।
দদর্শ পর্য়ুপাবৃত্তো লক্ষ্মীবান্লক্ষ্মণোঽগ্রজম্ ॥ 14 ॥
তং চিংতয়া দুস্সহয়া পরীতং বিসংজ্ঞমেকং বিজনে মনস্বী ।
ভ্রাতুর্বিষাদাত্পরিতাপদীনঃ সমীক্ষ্য় সৌমিত্রিরুবাচ রামম্ ॥ 15 ॥
কিমার্য় কামস্য় বশংগতেন কিমাত্মপৌরুষ্যপরাভবেন ।
অয়ং সদা সংহ্রিযতে সমাধিঃ কিমত্র যোগেন নিবর্তিতেন ॥ 16 ॥
ক্রিয়াভিয়োগং মনসঃ প্রসাদং সমাধিয়োগানুগতং চ কালম্ ।
সহাযসামর্থ্যমদীনসত্ত্বঃ স্বকর্ম হেতুং চ কুরুষ্ব হেতুম্ ॥ 17 ॥
ন জানকী মানব বংশনাথ ত্বয়া সনাথা সুলভা পরেণ ।
ন চাগ্নিচূডাং জ্বলিতামুপেত্য় ন দহ্যতে বীর বরার্হ কচ্ছিত্ ॥ 18 ॥
সলক্ষণং লক্ষ্মণমপ্রধৃষ্য়ং স্বভাবজং বাক্যমুবাচ রামঃ ।
হিতং চ পথ্য়ং চ নযপ্রসক্তং সসাম ধর্মার্থসমাহিতং চ ॥ 19 ॥
নিস্সংশয়ং কার্যমবেক্ষিতব্য়ং ক্রিয়াবিশেষোঽহ্যনুবর্তিতব্য়ঃ ।
ননু প্রবৃত্তস্য় দুরাসদস্য় কুমার কার্যস্য় ফলং চ চিংত্যম্ ॥ 20 ॥
অথ পদ্মপলাশাক্ষীং মৈথিলীমনুচিংতযন্ ।
উবাচ লক্ষ্মণং রামো মুখেন পরিশুষ্যতা ॥ 21 ॥
তর্পয়িত্বা সহস্রাক্ষস্সলিলেন বসুংধরাম্ ।
নির্বর্তয়িত্বা সস্য়ানি কৃতকর্মা ব্যবস্থিতঃ ॥ 22 ॥
স্নিগ্ধগংভীরনির্ঘোষাশ্শৈলদ্রুমপুরোগমাঃ ।
বিসৃজ্য় সলিলং মেঘাঃ পরিশ্রাংতা নৃপাত্মজ ॥ 23 ॥
নীলোত্পলদলশ্য়ামাশ্শ্য়ামীকৃত্বা দিশো দশ ।
বিমদা ইব মাতংগাশ্শাংতবেগাঃ পয়োধরাঃ ॥ 24 ॥
জলগর্ভা মহামেঘা কুটজার্জুনগংধিনঃ ।
চরিত্বা বিরতাস্সৌম্য় বৃষ্টিবাতাস্সমুদ্যতাঃ ॥ 25 ॥
ঘনানাং বারণানাং চ ময়ূরাণাং চ লক্ষ্মণ ।
নাদঃ প্রস্রবণানাং চ প্রশাংতস্সহসাঽনঘ ॥ 26 ॥
অভিবৃষ্টা মহামেঘৈর্নির্মলাশ্চিত্রসানবঃ ।
অনুলিপ্তা ইবাঽভাংতি গিরযশ্চিত্রদীপ্তিভিঃ ॥ 27 ॥
শাখাসু সপ্তচ্ছদপাদপানাং প্রভাসু তারার্কনিশাকরাণাম্ ।
লীলাসু চৈবোত্তম বারণানাং শ্রিয়ং বিভজ্য়াদ্য় শরত্প্রবৃত্তা ॥ 28 ॥
সংপ্রত্যনেকাশ্রয় চিত্রশোভা লক্ষ্মীশ্শরত্কালগুণোপনীতা ।
সূর্য়াগ্রহস্তপ্রতিবোধিতেষু পদ্মাকরেষ্বভ্যধিকং বিভাতি ॥ 29 ॥
সপ্তচ্ছদানাং কুসুমোপগংধী ষট্পাদবৃংদৈরনুগীযমানঃ ।
মত্তদ্বিপানাং পবনোঽনুসারী দর্পং বিনেষ্যন্নধিকং করোতি ॥ 30 ॥
অভ্য়াগতৈশ্চারুবিশালপক্ষৈ স্সরঃপ্রিয়ৈঃ পদ্মরজোবকীর্ণৈঃ ।
মহানদীনাং পুলিনোপয়াতৈঃ ক্রীডংতি হংসাস্সহ চক্রবাকৈঃ ॥ 31 ॥
মদপ্রগল্ভেষু চ বারণেষু গবাং সমূহেষু চ দর্পিতেষু ।
প্রসন্নতোয়াসু চ নিম্নগাসু বিভাতি লক্ষ্মীর্বহুধা বিভক্তা ॥ 32 ॥
নভস্সমীক্ষ্য়াংবুধরৈর্বিমুক্তং বিমুক্তবর্হাভরণা বনেষু ।
প্রিয়াস্বসক্তা বিনিবৃত্তশোভা গতোত্সবা ধ্য়ানপরা ময়ূরাঃ ॥ 33 ॥
মনোজ্ঞগংধৈঃ প্রিযকৈরনল্পৈঃ পুষ্পাতিভারাবনতাগ্রশাখৈঃ ।
সুবর্ণগৌরৈর্নযনাভিরামৈ রুদ্য়োতিতানীব বনাংতরাণি ॥ 34 ॥
প্রিয়ান্বিতানাং নলিনীপ্রিয়াণাং বনে রতানাং কুসুমোদ্ধতানাম্ ।
মদোত্কটানাং মদলালসানাং গজোত্তমানাং গতয়োঽদ্য় মংদাঃ ॥ 35 ॥
ব্যভ্রং নভশ্শস্ত্রবিধৌতবর্ণং কৃশপ্রবাহানি নদীজলানি ।
কহ্লারশীতাঃ পবনাঃ প্রবাংতি তমোবিমুক্তাশ্চ দিশঃ প্রকাশাঃ ॥ 36 ॥
সূর্য়াতপক্রামণনষ্টপংকা ভূমিশ্চিরোদধাটিতসাংদ্ররেণুঃ ।
অন্য়োন্যবৈরেণসমায়ুতানা মুদ্য়োগকালোঽদ্য় নরাধিপানাম্ ॥ 37 ॥
শরদ্গুণাপ্য়ায়িতরূপশোভাঃ প্রহর্ষিতাঃ পাংশুসমুত্ক্ষিতাংগাঃ ।
মদোত্কটাস্সংপ্রতি যুদ্ধলুব্ধা বৃষা গবাং মধ্যগতা নদংতি ॥ 38 ॥
সমন্মথং তীব্রগতানুরাগাঃ কুলান্বিতা মংদগতিং করিণ্য়ঃ ।
মদান্বিতং সংপরিবার্য় যাংতং বনেষু ভর্তারমনুপ্রয়াংতি ॥ 39 ॥
ত্যক্ত্বা বরাণ্য়াত্মবিভূষণানি বর্হাণি তীরোপগতা নদীনাম্ ।
নির্ভর্ত্স্যমানা ইব সারসৌঘৈঃ প্রয়াংতি দীনা বিমদা ময়ূরাঃ ॥ 40 ॥
বিত্রাস্য় কারংডবচক্রবাকা ন্মহারবৈর্ভিন্নকটা গজেংদ্রাঃ ।
সরস্সু বদ্ধাংবুজভূষণেষু বিক্ষোভ্য় বিক্ষোভ্য় জলং পিবংতি ॥ 41 ॥
ব্যপেতপংকাসু সবালুকাসু প্রসন্নতোয়াসু সগোকুলাসু ।
সসারসারাবনিনাদিতাসু নদীষু হৃষ্টা নিপতংতি হংসাঃ ॥ 42 ॥
নদীঘনপ্রস্রবণোদকানা মতিপ্রবৃদ্ধানিলবর্হিণানাম্ ।
প্লবংগমানাং চ গতোত্সবানাং দ্রুতং রবাস্সংপ্রতি সংপ্রণষ্টাঃ ॥ 43 ॥
অনেকবর্ণাস্সুবিনষ্টকায়া নবোদিতেষ্বংবুধরেষু নষ্টাঃ ।
ক্ষুধার্দিতা ঘোরবিষা বিলেভ্য় শ্চিরোষিতা বিপ্রসরংতি সর্পাঃ ॥ 44 ॥
চংচচ্চংদ্রকরস্পর্শহর্ষোন্মীলিততারকা ।
অহো রাগবতী সংধ্য়া জহাতি স্বযমংবরম্ ॥ 45 ॥
রাত্রিশ্শশাংকোদিতসৌম্যবক্ত্রা তারাগণোন্মীলিতচারুনেত্রা ।
জ্য়োত্স্নাংশুকপ্রাবরণা বিভাতি নারীব শুক্লাংশুকসংবৃতাংগী ॥ 46 ॥
বিপক্বশালিপ্রসবানি ভুক্ত্বা প্রহর্ষিতা সারসচারুপংক্তিঃ ।
নভস্সমাক্রামতি শীঘ্রবেগাঃ বাতাবধূতা গ্রথিতেব মালা ॥ 47 ॥
সুপ্তৈকহংসং কুমুদৈরুপেতং মহাহ্রদস্থং সলিলং বিভাতি ।
ঘনৈর্বিমুক্তং নিশি পূর্ণচংদ্রং তারাগণাকীর্ণমিবাংতরিক্ষম্ ॥ 48 ॥
প্রকীর্ণহংসাকুলমেখলানাং প্রবুদ্ধপদ্মোত্পলমালিনীনাম্ ।
বাপ্য়ুত্তমানামধিকাঽদ্য় লক্ষ্মী র্বরাংগনানামিব ভূষিতানাম্ ॥ 49 ॥
বেণুস্বনব্য়ংজিততূর্যমিশ্রঃ প্রত্য়ূষকালানিলসংপ্রবৃদ্ধঃ ।
সম্মূর্ছিতো গর্গরগোবৃষাণা মন্য়োন্যমাপূরযতীব শব্দঃ ॥ 50 ॥
নবৈর্নদীনাং কুসুমপ্রভাসৈ র্ব্য়াধূযমানৈর্মৃদুমারুতেন ।
ধৌতামলক্ষৌমপটপ্রকাশৈঃ কূলানি কাশৈরুপশোভিতানি ॥ 51 ॥
বনপ্রচংডা মধুপানশৌংডাঃ প্রিয়ান্বিতাষ্ষট্চরণাঃ প্রহ্রৃষ্টাঃ ।
বনেষু মত্তাঃ পবনানুয়াত্রাং কুর্বংতি পদ্মাসনরেণুগৌরাঃ ॥ 52 ॥
জলং প্রসন্নং কুমুদং প্রভাসং ক্রৌংচস্বনশ্শালিবনং বিপক্বম্ ।
মৃদুশ্চ বায়ুর্বিমলশ্চ চংদ্র শ্শংসংতি বর্ষব্যপনীতকালম্ ॥ 53 ॥
মীনোপসংদর্শিতমেখলানাং নদীবধূনাং গতয়োঽদ্য় মংদাঃ ।
কাংতোপভুক্তালসগামিনীনাং প্রভাতকালেষ্বিব কামিনীনাম্ ॥ 54 ॥
সচক্রবাকানি সশৈবলানি কাশৈর্দুকূলৈরিব সংবৃতানি ।
সপত্রলেখানি সরোচনানি বধূমুখানীব নদীমুখানি ॥ 55 ॥
প্রফুল্লবাণাসনচিত্রিতেষু প্রহৃষ্টষট্পাদনিকূজিতেষু ।
গৃহীতচাপোদ্যতচংডদংডঃ প্রচংডচারোঽদ্য় বনেষু কামঃ ॥ 56 ॥
লোকং সুবৃষ্ট্য়া পরিতোষয়িত্বা নদীস্তটাকানি চ পূরয়িত্বা ।
নিষ্পন্নসস্য়াং বসুধাং চ কৃত্বা ত্যক্ত্বা নভস্তোযধরাঃ প্রণষ্টাঃ ॥ 57 ॥
দর্শয়ংতি শরন্নদ্য়ঃ পুলিনানি শনৈঃ শনৈঃ ।
নবসংগমসব্রীডা জঘনানীব যোষিতঃ ॥ 58 ॥
প্রসন্নসলিলাস্সৌম্য় কুররীভির্বিনাদিতাঃ ।
চক্রবাকগণাকীর্ণা বিভাংতি সলিলাশয়াঃ ॥ 59 ॥
অসনাস্সপ্তপর্ণাশ্চ কোবিদারাশ্চ পুষ্পিতাঃ ।
দৃশ্য়ংতে বংধুজীবাশ্চ শ্য়ামাশ্চ গিরিসানুষু ॥ 60 ॥
হংসসারসচক্রাহ্বৈঃ কুররৈশ্চ সমংততঃ ।
পুলিনান্যবকীর্ণানি নদীনাং পশ্য় লক্ষ্মণ ॥ 61 ॥
অন্য়োন্যবদ্ধবৈরাণাং জিগীষূণাং নৃপাত্মজ ।
উদ্য়োগসমযস্সৌম্য় পার্থিবানামুপস্থিতঃ ॥ 62 ॥
ইয়ং সা প্রথমা যাত্রা পার্থিবানাং নৃপাত্মজ ন চ পশ্য়ামি সুগ্রীবমুদ্য়োগং বা তথাবিধম্ ॥ 63 ॥
চত্বারো বার্ষিকা মাসা গতা বর্ষশতোপমাঃ ।
মম শোকাভিভূতস্য় সৌম্য় সীতামপশ্যতঃ ॥ 64 ॥
চক্রবাকীব ভর্তারং পৃষ্ঠতোঽনুগতা বনম্ ।
বিষমং দংডকারণ্যমুদ্য়ানমিব যাঽগতা ॥ 65 ॥
প্রিয়াবিহীনে দুঃখার্তে হৃতরাজ্য়ে বিবাসিতে ।
কৃপাং ন কুরুতে রাজা সুগ্রীবো ময়ি লক্ষ্মণ ॥ 66 ॥
অনাথো হৃতরাজ্য়োঽয়ং রাবণেন চ ধর্ষিতঃ ।
দীনো দূরগৃহঃ কামী মাং চৈব শরণং গতঃ ॥ 67 ॥
ইত্য়েতৈঃ কারণৈস্সৌম্য় সুগ্রীবস্য় দুরাত্মনঃ ।
অহং বানররাজস্য় পরিভূতঃ পরংতপ ॥ 68 ॥
স কালং পরিসংখ্য়ায় সীতায়াঃ পরিমার্গণে ।
কৃতার্থস্সময়ং কৃত্বা দুর্মতির্নাববুধ্যতে ॥ 69 ॥
ত্বং চ কিষ্কিংধাং প্রবিশ্য় ব্রূহি বানরপুংগবম্ ।
মূর্খং গ্রাম্যসুখে সক্তং সুগ্রীবং বচনান্মম ॥ 70 ॥
অর্থিনামুপপন্নানাং পূর্বং চাপ্য়ুপকারিণাম্ ।
আশাং সংশ্রুত্য় যো হংতি স লোকে পুরুষাধমঃ ॥ 71 ॥
শুভং বা যদি বা পাপং যো হি বাক্যমুদীরিতম্ ।
সত্য়েন প্রতিগৃহ্ণাতি স বীরঃ পুরুষোত্তমঃ ॥ 72 ॥
কৃতার্থা হ্যকৃতার্থানাং মিত্রাণাং ন ভবংতি যে ।
তান্মৃতানপি ক্রব্য়াদাঃ কৃতঘ্নান্নোপভুংজতে ॥ 73 ॥
নূনং কাংচনপৃষ্ঠস্য় বিকৃষ্টস্য় ময়া রণে ।
দ্রষ্টুমিচ্ছতি চাপস্য় রূপং বিদ্য়ুদ্গণোপমম্ ॥ 74 ॥
ঘোরং জ্য়াতলনির্ঘোষং ক্রুদ্ধস্য় মম সংয়ুগে ।
নির্ঘোষমিব বজ্রস্য় পুনস্সংশ্রোতুমিচ্ছসি ॥ 75 ॥
কামমেবংগতেঽপ্যস্য় পরিজ্ঞাতে পরাক্রমে ।
ত্বত্সহাযস্য় মে বীর ন চিংতা স্য়ান্নৃপাত্মজ ॥ 76 ॥
যদর্থমযমারংভঃ কৃতঃ পরপুরংজয়ঃ ।
সময়ং নাভিজানাতি কৃতার্থঃ প্লবগেশ্বরঃ ॥ 77 ॥
বর্ষাসমযকালং তু প্রতিজ্ঞায় হরীশ্বরঃ ।
ব্যতীতাংশ্চতুরো মাসান্বিহরন্নাববুধ্যতে ॥ 78 ॥
সামাত্যপরিষত্ক্রীডন্পানমেবোপসেবতে ।
শোকদীনেষু নাস্মাসু সুগ্রীবঃ কুরুতে দয়াম্ ॥ 79 ॥
উচ্যতাং গচ্ছ সুগ্রীবস্ত্বয়া বত্স মহাবল ।
মম রোষস্য় যদ্রূপং ব্রূয়াশ্চৈবমিদং বচঃ ॥ 80 ॥
ন চ সংকুচিতঃ পংথা যেন বালী হতো গতঃ ।
সময়ে তিষ্ঠ সুগ্রীব মা বালিপথমন্বগাঃ ॥ 81 ॥
এক এব রণে বালী শরেণ নিহতো ময়া ।
ত্বাং তু সত্য়াদতিক্রাংতং হনিষ্য়ামি সবাংধবম্ ॥ 82 ॥
তদেবং বিহিতে কার্য়ে যদ্ধিতং পুরুষর্ষভ ।
তত্তদ্ভ্রূহি নরশ্রেষ্ঠত্বর কালব্যতিক্রমঃ ॥ 83 ॥
কুরুষ্ব সত্য়ং ময়ি বানরেশ্বর প্রতিশ্রুতং ধর্মমবেক্ষ্য় শাশ্বতম্ ।
মা বালিনং প্রেত্য় গতো যমক্ষয়ং ত্বমদ্য় পশ্য়ের্মম চোদিতৈশ্শরৈঃ ॥ 84 ॥
স পূর্বজং তীব্রবিবৃদ্ধকোপং লালপ্যমানং প্রসমীক্ষ্য় দীনম্ ।
চকার তীব্রাং মতিমুগ্রতেজা হরীশ্বরে মানববংশনাথঃ ॥ 85 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে কিষ্কিংধাকাংডে ত্রিংশস্সর্গঃ ॥
