శ్రీమద్వాల్మీకీయ రామాయణే బాలకాండమ్ ।
అథ ద్వాదశస్సర్గః ।
తతః కాలే బహుతిథే కస్మింశ్చిత్సుమనోహరే ।
వసంతే సమనుప్రాప్తే రాజ్ఞో యష్టుం మనోఽభవత్ ॥ 1 ॥
తతః ప్రసాద్య శిరసా తం విప్రం దేవవర్ణినమ్ ।
యజ్ఞాయ వరయామాస సంతానార్థం కులస్య వై ॥ 2 ॥
తథేతి చ స రాజానమువాచ చ సుసత్కృతః ।
సంభారా సంభ్రియంతాం తే తురగశ్చ విముచ్యతామ్ ॥ 3 ॥
తతో రాజాఽబ్రవీద్వాక్యం సుమంత్రం మంత్రిసత్తమమ్ ।
సుమంత్రావాహయ క్షిప్రం ఋత్విజో బ్రహ్మవాదినః ॥ 4 ॥
సుయజ్ఞం వామదేవం చ జాబాలిమథ కాశ్యపమ్ ।
పురోహితం వసిష్ఠం చ యే చాన్యే ద్విజసత్తమాః ॥ 5 ॥
తతస్సుమంత్రస్త్వరితం గత్వా త్వరితవిక్రమః ।
సమానయత్స తాన్విప్రాన్ సమస్తాన్వేదపారగాన్ ॥ 6 ॥
తాన్పూజయిత్వా ధర్మాత్మా రాజా దశరథస్తదా ।
ధర్మార్థసహితం యుక్తం శ్లక్ష్ణం వచనమబ్రవీత్ ॥ 7 ॥
మమ లాలప్యమానస్య పుత్రార్థం నాస్తి వై సుఖమ్ ।
తదర్థం హయమేధేన యక్ష్యామీతి మతిర్మమ ॥ 8 ॥
తదహం యష్టుమిచ్ఛామి శాస్త్రదృష్టేన కర్మణా ।
ఋషిపుత్రప్రభావేన కామాన్ప్రాప్స్యామి చాప్యహమ్ ॥ 9 ॥
తతస్సాధ్వితి తద్వాక్యం బ్రాహ్మణాః ప్రత్యపూజయన్ ।
వసిష్ఠప్రముఖాస్సర్వే పార్థివస్య ముఖాచ్చ్యుతమ్ ॥ 10 ॥
ఋష్యశృంగపురోగాశ్చ ప్రత్యూచుర్నృపతిం తదా ।
సంభారాస్సంభ్రియంతాం తే తురగశ్చ విముచ్యతామ్ ॥ 11 ॥
సర్వథా ప్రాప్స్యసే పుత్రాంశ్చత్వారోఽమితవిక్రమాన్ ।
యస్య తే ధార్మికీ బుద్ధిరియం పుత్రార్థమాగతా ॥ 12 ॥
తతః ప్రీతోఽభవద్రాజా శ్రుత్వా తద్విజభాషితమ్ ।
అమాత్యాంశ్చాబ్రవీద్రాజా హర్షేణేదం శుభాక్షరమ్ ॥ 13 ॥
గురూణాం వచనాచ్ఛీఘ్రం సంభారాస్సంభ్రియంతు మే ।
సమర్థాధిష్ఠితశ్చాశ్వస్సోపాధ్యాయో విముచ్యతామ్ ॥ 14 ॥
సరయ్వాశ్చోత్తరే తీరే యజ్ఞభూమిర్విధీయతామ్ ।
శాంతయశ్చాభివర్ధంతాం యథాకల్పం యథావిధి ॥ 15 ॥
శక్యః ప్రాప్తుమయం యజ్ఞస్సర్వేణాపి మహీక్షితా ।
నాపరాధో భవేత్కష్టో యద్యస్మిన్క్రతుసత్తమే ॥ 16 ॥
ఛిద్రం హి మృగయంతేఽత్ర విద్వాంసో బ్రహ్మరాక్షసాః ।
నిహతస్య చ యజ్ఞస్య సద్యః కర్తా వినశ్యతి ॥ 17 ॥
తద్యథా విధిపూర్వం మే క్రతురేష సమాప్యతే ।
తథా విధానం క్రియతాం సమర్థాః కరణేష్విహ ॥ 18 ॥
తథేతి చ తతస్సర్వే మంత్రిణః ప్రత్యపూజయన్ ।
పార్థివేంద్రస్య తద్వాక్యం యథాజ్ఞప్తమకుర్వత ॥ 19 ॥
తతో ద్విజాస్తే ధర్మజ్ఞమస్తువన్పార్థివర్షభమ్ ।
అనుజ్ఞాతాస్తతస్సర్వే పునర్జగ్ముర్యథాగతమ్ ॥ 20 ॥
గతేష్వథ ద్విజాగ్య్రేషు మంత్రిణస్తాన్నరాధిపః ।
విసర్జయిత్వా స్వం వేశ్మ ప్రవివేశ మహాద్యుతిః ॥ 21 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే ద్వాదశస్సర్గః ॥
