శ్రీమద్వాల్మీకీయ రామాయణే కిష్కింధాకాండమ్ ।
అథ చతుర్దశస్సర్గః ।
సర్వే తే త్వరితం గత్వా కిష్కింధాం వాలి పాలితామ్ ।
వృక్షైరాత్మానమావృత్య వ్యతిష్ఠన్ గహనే వనే ॥ 1 ॥
విచార్య సర్వతో దృష్టిం కాననే కాననప్రియః ।
సుగ్రీవో విపులగ్రీవః క్రోధమాహారయద్భృశమ్ ॥ 2 ॥
తతస్స నినదం ఘోరం కృత్వా యుద్ధాయ చాహ్వయత్ ।
పరివారైః పరివృతో నాదైర్భిందన్నివాంబరమ్ ॥ 3 ॥
గర్జన్నివ మహామేఘో వాయువేగపురస్సరః ।
అథ బాలార్కసదృశో దృప్తసింహగతిస్తదా ॥ 4 ॥
దృష్ట్వా రామం క్రియాదక్షం సుగ్రీవో వాక్యమబ్రవీత్ ।
హరివాగురయా వ్యాప్తాం తప్తకాంచనతోరణామ్ ।
ప్రాప్తాః స్మ ధ్వజయంత్రాఢ్యాం కిష్కింధాం వాలినః పురీమ్ ॥ 5 ॥
ప్రతిజ్ఞా యా త్వయా వీర కృతా వాలివధే పురా ।
సఫలాం కురు తాం క్షిప్రం లతాం కాల ఇవాగతః ॥ 6 ॥
ఏవముక్తస్తు ధర్మాత్మా సుగ్రీవేణ స రాఘవః ।
తమేవోవాచ వచనం సుగ్రీవం శత్రుసూదనః ॥ 7 ॥
కృతాభిజ్ఞానచిహ్నస్త్వ మనయా గజసాహ్వయా ।
లక్ష్మణేన సముత్పాట్య యైషా కంఠే కృతా తవ ॥ 8 ॥
శోభసేఽహ్యధికం వీర లతయా కంఠసక్తయా ।
విపరీత ఇవాకాశే సూర్యో నక్షత్రమాలయా ॥ 9 ॥
అద్య వాలిసముత్థం తే భయం వైరం చ వానర ।
ఏకేనాహం ప్రమోక్ష్యామి బాణమోక్షేణ సంయుగే ॥ 10 ॥
మమ దర్శయ సుగ్రీవ వైరిణం భ్రాతృరూపిణమ్ ।
వాలీ వినిహతో యావద్వనే పాంసుషు వేష్టతే ॥ 11 ॥
యది దృష్టిపథం ప్రాప్తో జీవన్స వినివర్తతే ।
తతో దోషేణ మా గచ్ఛేత్సద్యో గర్హేచ్చ మా భవాన్ ॥ 12 ॥
ప్రత్యక్షం సప్త తే సాలా మయా బాణేన దారితాః ।
తేనావేహి బలేనాద్య వాలినం నిహతం మయా ॥ 13 ॥
అనృతం నోక్తపూర్వం మే వీర కృచ్ఛ్రేఽపి తిష్టతా ।
ధర్మలోభపరీతేన న చ వక్ష్యే కథంచన ॥ 14 ॥
సఫలాం చ కరిష్యామి ప్రతిజ్ఞాం జహి సంభ్రమమ్ ।
ప్రసూతం కలమం క్షేత్రే వర్షేణేవ శతక్రతుః ॥ 15 ॥
తదాహ్వాననిమిత్తం త్వం వాలినో హేమమాలినః ।
సుగ్రీవ కురు తం శబ్దం నిష్పతేద్యేన వానరః ॥ 16 ॥
జితకాశీ బలశ్లాఘీ త్వయా చాధర్షితః పురా ।
నిష్పతిష్యత్యసంగేన వాలీ స ప్రియసంయుగః ॥ 17 ॥
రిపూణాం ధర్షిణ శూరా మర్షయంతి న సంయుగే ।
జానంతస్తు స్వకం వీర్యం స్త్రీసమక్షం విశేషతః ॥ 18 ॥
స తు రామవచశ్శ్రుత్వా సుగ్రీవో హేమపింగలః ।
ననర్ద క్రూరనాదేన వినిర్భిందన్నివాంబరమ్ ॥ 19 ॥
తస్య శబ్దేన విత్రస్తా గావో యాంతి హతప్రభాః ।
రాజదోషపరామృష్టాః కులస్త్రియ ఇవాకులాః ॥ 20 ॥
ద్రవంతి చ మృగాశ్శీఘ్రం భగ్నా ఇవ రణే హయాః ।
పతంతి చ ఖగా భూమౌ క్షీణపుణ్యా ఇవ గ్రహాః ॥ 21 ॥
తతస్సజీమూతగణప్రణాదో నాదం హ్యముంచత్త్వరయా ప్రతీతః ।
సూర్యాత్మజశ్శౌర్యవివృద్ధతేజాః సరిత్పతిర్వాఽనిలచంచలోర్మిః ॥ 22 ॥
ఇత్యార్షే శ్రీమద్రామాయణే వాల్మీకీయ ఆదికావ్యే కిష్కింధాకాండే చతుర్దశస్సర్గః ॥
