శ్రీమద్వాల్మీకీయ రామాయణే అయోధ్యాకాండమ్ ।
అథ సప్తాధికశతతమస్సర్గః ।
పునరేవం బ్రువాణం తం భరతం లక్ష్మణాగ్రజః ।
ప్రత్యువాచ తత శ్శ్రీమాన్ జ్ఞాతిమధ్యేఽభిసత్కృతః ॥ 1 ॥
ఉపపన్నమిదం వాక్యం యత్త్వమేవమభాషథాః ।
జాతః పుత్రో దశరథాత్కైకేయ్యాం రాజసత్తమాత్ ॥ 2 ॥
పురా భ్రాతః పితా న స్స మాతరం తే సముద్వహన్ ।
మాతామహే సమాశ్రౌషీద్రాజ్యశుల్కమనుత్తమమ్ ॥ 3 ॥
దైవాసురే చ సంగ్రామే జనన్యై తవ పార్థివః ।
సంప్రహృష్టో దదౌ రాజా వరమారాధితః ప్రభుః ॥ 4 ॥
తతస్సా సంప్రతిశ్రావ్య తవ మాతా యశస్వినీ ।
అయాచత నరశ్రేష్ఠం ద్వౌ వరౌ వరవర్ణినీ ॥ 5 ॥
తవ రాజ్యం నరవ్యాఘ్ర మమ ప్రవ్రాజనం తథా ।
తౌ చ రాజా తదా తస్యై నియుక్తః ప్రదదౌ వరౌ ॥ 6 ॥
తతః సా సంప్రతిశ్రావ్య తవ మాతా యశస్వినీ ।
అయాచత నరశ్రేష్ఠం ద్వౌ వరౌ వరవర్ణినీ ॥ 7 ॥
తవ రాజ్యం నరవ్యాఘ్ర మమ ప్రవ్రాజనం తథా ।
తచ్చ రాజా తదా తస్యై నియుక్తః ప్రదదౌ వరౌ ॥ 8 ॥
తేన పిత్రాఽహమప్యత్ర నియుక్తః పురుషర్షభ ।
చతుర్దశ వనే వాసం వర్షాణి వరదానికమ్ ॥ 9 ॥
సోఽహం వనమిదం ప్రాప్తో నిర్జనం లక్ష్మణాన్వితః ।
సీతయా చాప్రతిద్వంద్వ స్సత్యవాదే స్థితః పితుః ॥ 10 ॥
భవానపి తథేత్యేవ పితరం సత్యవాదినమ్ ।
కర్తుమర్హతి రాజేంద్ర క్షిప్రమేవాభిషేచనాత్ ॥ 11 ॥
ఋణాన్మోచయ రాజానం మత్కృతే భరత ప్రభుమ్ ।
పితరం చాపి ధర్మజ్ఞం మాతరం చాభినందయ ॥ 12 ॥
శ్రూయతే ధీమతా తాత శ్రుతిర్గీతా యశస్వినా ।
గయేన యజమానేన గయేష్వేవ పితౄన్ ప్రతి ॥ 13 ॥
పున్నామ్నో నరకాద్ యస్మాత్ పితరం త్రాయతే సుతః ।
తస్మాత్ పుత్ర ఇతి ప్రోక్తః పితౄన్ యః పాతి సర్వతః ॥ 14 ॥
ఏష్టవ్యా బహవః పుత్రా గుణవంతో బహుశ్రుతాః ।
తేషాం వై సమవేతానామపి కశ్చిద్గయాం వ్రజేత్ ॥ 15 ॥
ఏవం రాజర్షయ స్సర్వే ప్రతీతా రాజనందన ।
తస్మాత్రాహి నరశ్రేష్ఠ పితరం నరకాత్ప్రభో ॥ 16 ॥
అయోధ్యాం గచ్ఛ భరత ప్రకృతీరనురంజయ ।
శత్రుఘ్నసహితో వీర సహ సర్వైర్ద్విజాతిభిః ॥ 17 ॥
ప్రవేక్ష్యే దండకారణ్యమహమప్యవిలంబయన్ ।
ఆభ్యాంతు సహితో రాజన్ వైదేహ్యా లక్ష్మణేన చ ॥ 18 ॥
త్వం రాజా భరత భవ స్వయం నరాణాం వన్యానామహమపి రాజరాణ్మృగాణామ్ ।
గచ్ఛ త్వం పురవరమద్య సంప్రహృష్టస్సంహృష్టస్త్వహమపి దండకాన్ప్రవేక్ష్యే ॥ 19 ॥
ఛాయాం తే దినకరభాః ప్రబాధమానాం వర్షత్రం భరత కరోతు మూర్ధ్ని శీతామ్ ।
ఏతేషామహమపి కాననద్రుమాణాం ఛాయాం తామతిశయినీం సుఖీ శ్రయిష్యే ॥ 20 ॥
శత్రుఘ్నః కుశలమతిస్తు తే సహాయస్సౌమిత్రిర్మమ విదితః ప్రధానమిత్రమ్ ।
చత్వారస్తనయవరా వయం నరేంద్రం సత్యస్థం భరత చరామ మా విషీద ॥ 21 ॥
ఇత్యార్షే శ్రీమద్రామాయణే వాల్మీకీయ ఆదికావ్యే అయోధ్యాకాండే సప్తాధికశతతమస్సర్గః ॥
