శ్రీమద్వాల్మీకీయ రామాయణే బాలకాండమ్ ।
అథ పంచపంచాశస్సర్గః ।
తతస్తానాకులాన్ దృష్ట్వా విశ్వామిత్రాస్త్రమోహితాన్ ।
వసిష్ఠశ్చోదయామాస కామధుక్ సృజ యోగతః ॥ 1 ॥
తస్యాహుంభారవాజ్జాతాః కాంభోజా రవిసన్నిభాః ।
ఊధసస్త్వథ సంజాతాః పప్లవాశ్శస్త్రపాణయః ॥ 2 ॥
యోనిదేశాచ్చ యవనాశ్శకృద్దేశాచ్ఛకా స్తథా ।
రోమకూపేషు చ మ్లేచ్ఛా హారీతాస్సకిరాతకాః ॥ 3 ॥
తైస్తైర్నిషూదితం సర్వం విశ్వామిత్రస్య తత్క్షణాత్ ।
సపదాతిగజం సాశ్వం సరథం రఘునందన ॥ 4 ॥
దృష్ట్వా నిషూదితం సైన్యం వసిష్ఠేన మహాత్మనా ।
విశ్వామిత్రసుతానాం చ శతం నానావిధాయుధమ్ ॥ 5 ॥
అభ్యధావత్సుసంకృద్ధం వసిష్ఠం జపతాం వరమ్ ।
హుంకారేణైవ తాన్ సర్వాన్ దదాహ భగవాన్ ఋషిః ॥ 6 ॥
తే సాశ్వరథపాదాతా వసిష్ఠేన మహాత్మనా ।
భస్మీకృతా ముహూర్తేన విశ్వామిత్రసుతా స్తదా ॥ 7 ॥
దృష్ట్వా వినాశితాన్ పుత్రాన్ బలం చ సుమహాయశాః ।
సవ్రీడశ్చింతయాఽవిష్టో విశ్వామిత్రోఽభవత్తదా ॥ 8 ॥
సముద్ర ఇవ నిర్వేగో భగ్నదంష్ట్ర ఇవోరగః ।
ఉపరక్త ఇవాదిత్యస్సద్యో నిష్ప్రభతాం గతః ॥ 9 ॥
హతపుత్రబలో దీనో లూనపక్ష ఇవ ద్విజః ।
హతదర్పో హతోత్సాహో నిర్వేదం సమపద్యత ॥ 10 ॥
స పుత్రమేకం రాజ్యాయ పాలయేతి నియుజ్య చ ।
పృథివీం క్షత్రధర్మేణ వనమేవాన్వపద్యత ॥ 11 ॥
స గత్వా హిమవత్పార్శ్వం కిన్నరోరగసేవితమ్ ।
మహాదేవప్రసాదార్థం తపస్తేపే మహాతపాః ॥ 12 ॥
కేనచిత్త్వథ కాలేన దేవేశో వృషభధ్వజః ।
దర్శయామాస వరదో విశ్వామిత్రం మహాబలమ్ ॥ 13 ॥
కిమర్థం తప్యసే రాజన్ బ్రూహి యత్తే వివక్షితమ్ ।
వరదోఽస్మి వరో యస్తే కాంక్షితస్సోఽభిధీయతామ్ ॥ 14 ॥
ఏవముక్తస్తు దేవేన విశ్వామిత్రో మహాతపాః ।
ప్రణిపత్య మహాదేవమిదం వచనమబ్రవీత్ ॥ 15 ॥
యది తుష్టో మహాదేవ ధనుర్వేదో మమానఘ ।
సాంగోపాంగోపనిషదస్సరహస్యః ప్రదీయతామ్ ॥ 16 ॥
యాని దేవేషు చాస్త్రాణి దానవేషు మహర్షిషు ।
గంధర్వయక్షరక్షస్సు ప్రతిభాంతు మమానఘ ॥ 17 ॥
తవ ప్రసాదాద్భవతు దేవదేవమమేప్సితమ్ ।
ఏవమస్త్వితి దేవేశో వాక్యముక్త్వా గతస్తదా ॥ 18 ॥
ప్రాప్య చాస్త్రాణి రాజర్షిర్విశ్వామిత్రో మహాబలః ।
దర్పేణ మహతా యుక్తో దర్పపూర్ణోఽభవత్తదా ॥ 19 ॥
వివర్ధమానో వీర్యేణ సముద్ర ఇవ పర్వణి ।
హతమేవ తదా మేనే వసిష్ఠమృషిసత్తమమ్ ॥ 20 ॥
తతో గత్వాఽఽశ్రమపదం ముమోచాస్త్రాణి పార్థివః ।
యైస్తత్తపోవనం సర్వం నిర్దగ్ధం చాస్త్రతేజసా ॥ 21 ॥
ఉదీర్యమాణమస్త్రం తద్విశ్వామిత్రస్య ధీమతః ।
దృష్ట్వా విప్రద్రుతాస్సర్వే మునయశ్శతశో దిశః ॥ 22 ॥
వసిష్ఠస్య చ యే శిష్యాస్తథైవ మృగపక్షిణః ।
విద్రవంతి భయాద్భీతా నానాదిగ్భ్యస్సహస్రశః ॥ 23 ॥
వసిష్ఠస్యాశ్రమపదం శూన్యమాసీన్మహాత్మనః ।
ముహూర్తమివ నిశ్శబ్దమాసీదిరిణసన్నిభమ్ ॥ 24 ॥
వదతో వై వసిష్ఠస్య మా భైరితి ముహుర్ముహుః ।
నాశయామ్యద్య గాధేయం నీహారమివ భాస్కరః ॥ 25 ॥
ఏవముక్త్వా మహాతేజా వసిష్ఠో జపతాం వరః ।
విశ్వామిత్రం తదా వాక్యం సరోషమిదమబ్రవీత్ ॥ 26 ॥
ఆశ్రమం చిరసమ్వృద్ధం యద్వినాశితవానసి ।
దురాచారోఽసి తన్మూఢ తస్మాత్త్వం న భవిష్యసి ॥ 27 ॥
ఇత్యుక్త్వా పరమక్రుద్ధో దండముద్యమ్య సత్వరః ।
విధూమమివ కాలాగ్నిం యమదండమివాపరమ్ ॥ 28 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే పంచపంచాశస్సర్గః ॥
