శ్రీమద్వాల్మీకీయ రామాయణే బాలకాండమ్ ।
అథ పంచమస్సర్గః ।
. సర్వా పూర్వమియం యేషామాసీత్కృత్స్నా వసుంధరా ।
ప్రజాపతిముపాదాయ నృపాణాం జయశాలినామ్ ॥ 1 ॥
యేషాం స సగరో నామ సాగరో యేన ఖానితః ।
షష్టిః పుత్రసహస్రాణి యం యాంతం పర్యవారయన్ ॥ 2 ॥
ఇక్ష్వాకూణామిదం తేషాం రాజ్ఞాం వంశే మహాత్మనామ్ ।
మహదుత్పన్నమాఖ్యానం రామాయణమితి శ్రుతమ్ ॥ 3 ॥
తదిదం వర్తయిష్యామి సర్వం నిఖిలమాదితః ।
ధర్మకామార్థసహితం శ్రోతవ్యమనసూయయా ॥ 4 ॥
కోసలో నామ ముదితస్స్ఫీతో జనపదో మహాన్ ।
నివిష్టస్సరయూతీరే ప్రభూతధనధాన్యవాన్ ॥ 5 ॥
అయోధ్యా నామ నగరీ తత్రాసీల్లోకవిశ్రుతా ।
మనునా మానవేంద్రేణ యా పురీ నిర్మితా స్వయమ్ ॥ 6 ॥
ఆయతా దశ చ ద్వే చ యోజనాని మహాపురీ ।
శ్రీమతీ త్రీణి విస్తీర్ణా సువిభక్తమహాపథా ॥ 7 ॥
రాజమార్గేణ మహతా సువిభక్తేన శోభితా ।
ముక్తపుష్పావకీర్ణేన జలసిక్తేన నిత్యశః ॥ 8 ॥
తాం తు రాజా దశరథో మహారాష్ట్రవివర్ధనః ।
పురీమావాసయామాస దివం దేవపతిర్యథా ॥ 9 ॥
కవాటతోరణవతీం సువిభక్తాంతరాపణామ్ ।
సర్వయంత్రాయుధవతీముపేతాం సర్వశిల్పిభిః ॥ 10 ॥
సూతమాగధసంబాధాం శ్రీమతీమతులప్రభామ్ ।
ఉచ్చాట్టాలధ్వజవతీం శతఘ్నీశతసంకులామ్ ॥ 11 ॥
వధూనాటకసంఘైశ్చ సంయుక్తాం సర్వతః పురీమ్ ।
ఉద్యానామ్రవణోపేతాం మహతీం సాలమేఖలామ్ ॥ 12 ॥
దుర్గగంభీరపరిఘాం దుర్గామన్యైర్దురాసదామ్ ।
వాజివారణసంపూర్ణాం గోభిరుష్ట్రైః ఖరైస్తథా ॥ 13 ॥
సామంతరాజసంఘైశ్చ బలికర్మభిరావృతామ్ ।
నానాదేశనివాసైశ్చ వణిగ్భిరుపశోభితామ్ ॥ 14 ॥
ప్రాసాదై రత్నవికృతైః పర్వతైరుపశోభితామ్ ।
కూటాగారైశ్చ సంపూర్ణామింద్రస్యేవామరావతీమ్ ॥ 15 ॥
చిత్రామష్టాపదాకారాం నరనారీగణైర్యుతామ్ ।
సర్వరత్నసమాకీర్ణాం విమానగృహశోభితామ్ ॥ 16 ॥
గృహగాఢామవిచ్ఛిద్రాం సమభూమౌ నివేశితామ్ ।
శాలితండులసంపూర్ణామిక్షుకాండరసోదకామ్ ॥ 17 ॥
దుందుభీభిర్మృదంగైశ్చ వీణాభిః పణవైస్తథా ।
నాదితాం భృశమత్యర్థం పృథివ్యాం తామనుత్తమామ్ ॥ 18 ॥
విమానమివ సిద్ధానాం తపసాధిగతం దివి ।
సునివేశితవేశ్మాంతాం నరోత్తమసమావృతామ్ ॥ 19 ॥
యే చ బాణైర్న విధ్యంతి వివిక్తమపరాపరమ్ ।
శబ్దవేధ్యం చ వితతం లఘుహస్తా విశారదాః ॥ 20 ॥
సింహవ్యాఘ్రవరాహాణాం మత్తానాం నర్దతాం వనే ।
హంతారో నిశితైశ్శస్త్రైర్బలాద్బాహుబలైరపి ॥ 21 ॥
తాదృశానాం సహస్రైస్తామభిపూర్ణాం మహారథైః ।
పురీమావాసయామాస రాజా దశరథస్తదా ॥ 22 ॥
యే చ బాణైర్న విధ్యంతి వివిక్తమపరాపరమ్ ।
శబ్దవేధ్యం చ వితతం లఘుహస్తా విశారదాః ॥ 23 ॥
సింహవ్యాఘ్రవరాహాణాం మత్తానాం నర్దతాం వనే ।
హంతారో నిశితైశ్శస్త్రైర్బలాద్బాహుబలైరపి ॥ 24 ॥
తాదృశానాం సహస్రైస్తామభిపూర్ణాం మహారథైః ।
పురీమావాసయామాస రాజా దశరథస్తదా ॥ 25 ॥
తామగ్నిమద్భిర్గుణవద్భిరావృతాం ద్విజోత్తమైర్వేదషడంగపారగైః ।
సహస్రదైస్సత్యరతైర్మహాత్మభి ర్మహర్షికల్పై ఋషిభిశ్చ కేవలైః ॥ 26 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే పంచమస్సర్గః ॥
