శ్రీమద్వాల్మీకీయ రామాయణే బాలకాండమ్ ।
అథ పంచవింశస్సర్గః ।
అథ తస్యాప్రమేయస్య మునేర్వచనముత్తమమ్ ।
శ్రుత్వా పురుషశార్దూలః ప్రత్యువాచ శుభాం గిరమ్ ॥ 1 ॥
అల్పవీర్యా యదా యక్షా శ్శ్రూయంతే మునిపుంగవ ।
కథన్నాగసహస్రస్య ధారయత్యబలా బలమ్ ॥ 2 ॥
విశ్వామిత్రోఽబ్రవీద్వాక్యం శృణ యేన బలోత్తరా ।
వరదానకృతం వీర్యం ధారయత్యబలా బలమ్ ॥ 3 ॥
పూర్వమాసీన్మహాయక్షస్సుకేతుర్నామ వీర్యవాన్ ।
అనపత్యశ్శుభాచారస్స చ తేపే మహత్తపః ॥ 4 ॥
పితామహస్తు సుప్రీతస్తస్య యక్షపతే స్తదా ।
కన్యారత్నం దదౌ రామ తాటకాం నామ నామతః ॥ 5 ॥
దదౌ నాగసహస్రస్య బలం చాస్యాః పితామహః ।
నత్వేవ పుత్రం యక్షాయ దదౌ బ్రహ్మా మహాయశాః ॥ 6 ॥
తాం తు జాతాం వివర్ధంతీం రూపయౌవనశాలినీమ్ ।
ఝర్ఝపుత్రాయ సుందాయ దదౌ భార్యాం యశస్వినీమ్ ॥ 7 ॥
కస్యచిత్త్వథ కాలస్య యక్షీ పుత్రమజాయత ।
మారీచం నామ దుర్ధర్షం యశ్శాపాద్రాక్షసోఽభవత్ ॥ 8 ॥
సుందే తు నిహతే రామ సాగస్త్యమృషిసత్తమమ్ ।
తాటకా సహ పుత్రేణ ప్రధర్షయితుమిచ్ఛతి ॥ 9 ॥
భక్షార్థం జాతసంరంభా గర్జంతీ సాభ్యధావత ।
0 ఆపతంతీం తు తాం దృష్ట్వా అగస్త్యో భగవానృషిః ॥ 10 ॥
రాక్షసత్వం భజస్వేతి మారీచం వ్యాజహార సః ।
1 అగస్త్యః పరమక్రుద్ధస్తాటకామపి శప్తవాన్ ॥ 11 ॥
పురుషాదీ మహాయక్షీ విరూపా వికృతాననా ।
ఇదం రూపం విహాయాథ దారుణం రూపమస్తు తే ॥ 12 ॥
సైషా శాపకృతామర్షా తాటకా క్రోధమూర్ఛితా ।
దేశముత్సాదయత్యేనమగస్త్యచరితం శుభమ్ ॥ 13 ॥
ఏనాం రాఘవ దుర్వృత్తాం యక్షీం పరమదారుణామ్ ।
గోబ్రాహ్మణహితార్థాయ జహి దుష్టపరాక్రమామ్ ॥ 14 ॥
న హ్యేనాం శాపసమ్స్పృష్టాం కశ్చిదుత్సహతే పుమాన్ ।
నిహంతుం త్రిషు లోకేషు త్వామృతే రఘునందన ॥ 15 ॥
న హి తే స్త్రీవధకృతే ఘృణా కార్యా నరోత్తమ ।
చాతుర్వణ్యహితార్థాయ కర్తవ్యం రాజసూనునా ॥ 16 ॥
నృశంసమనృశంసం వా ప్రజారక్షణకారణాత్ ।
పాతకం వా సదోషం వా కర్తవ్యం రక్షతా సతా ॥ 17 ॥
రాజ్యభారనియుక్తానామేష ధర్మస్సనాతనః ।
అధర్మ్యాం జహి కాకుత్స్థ ధర్మోహ్యస్యా న విద్యతే ॥ 18 ॥
శ్రూయతే హి పురా శక్రో విరోచనసుతాం నృప ।
పృథివీం హంతుమిచ్ఛంతీం మంథరామభ్యసూదయత్ ॥ 19 ॥
విష్ణునాపి పురా రామ భృగుపత్నీ దృఢవ్రతా ।
అనింద్రం లోకమిచ్ఛంతీ కావ్యమాతా నిషూదితా ॥ 20 ॥
ఏతైశ్చాన్యైశ్చ బహుభీ రాజపుత్ర మహాత్మభిః ।
అధర్మసహితా నార్యో హతాః పురుషసత్తమైః ॥ 21 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే పంచవింశస్సర్గః ॥
