ශ්රීමද්වාල්මීකීය රාමායණේ බාලකාංඩම් ।
අථ ද්වාදශස්සර්ගඃ ।
තතඃ කාලේ බහුතිථේ කස්මිංශ්චිත්සුමනෝහරේ ।
වසංතේ සමනුප්රාප්තේ රාජ්ඤෝ යෂ්ටුං මනෝऽභවත් ॥ 1 ॥
තතඃ ප්රසාද්ය ශිරසා තං විප්රං දේවවර්ණිනම් ।
යජ්ඤාය වරයාමාස සංතානාර්ථං කුලස්ය වෛ ॥ 2 ॥
තථේති ච ස රාජානමුවාච ච සුසත්කෘතඃ ।
සංභාරා සංභ්රියංතාං තේ තුරගශ්ච විමුච්යතාම් ॥ 3 ॥
තතෝ රාජාऽබ්රවීද්වාක්යං සුමංත්රං මංත්රිසත්තමම් ।
සුමංත්රාවාහය ක්ෂිප්රං ඍත්විජෝ බ්රහ්මවාදිනඃ ॥ 4 ॥
සුයජ්ඤං වාමදේවං ච ජාබාලිමථ කාශ්යපම් ।
පුරෝහිතං වසිෂ්ඨං ච යේ චාන්යේ ද්විජසත්තමාඃ ॥ 5 ॥
තතස්සුමංත්රස්ත්වරිතං ගත්වා ත්වරිතවික්රමඃ ।
සමානයත්ස තාන්විප්රාන් සමස්තාන්වේදපාරගාන් ॥ 6 ॥
තාන්පූජයිත්වා ධර්මාත්මා රාජා දශරථස්තදා ।
ධර්මාර්ථසහිතං යුක්තං ශ්ලක්ෂ්ණං වචනමබ්රවීත් ॥ 7 ॥
මම ලාලප්යමානස්ය පුත්රාර්ථං නාස්ති වෛ සුඛම් ।
තදර්ථං හයමේධේන යක්ෂ්යාමීති මතිර්මම ॥ 8 ॥
තදහං යෂ්ටුමිච්ඡාමි ශාස්ත්රදෘෂ්ටේන කර්මණා ।
ඍෂිපුත්රප්රභාවේන කාමාන්ප්රාප්ස්යාමි චාප්යහම් ॥ 9 ॥
තතස්සාධ්විති තද්වාක්යං බ්රාහ්මණාඃ ප්රත්යපූජයන් ।
වසිෂ්ඨප්රමුඛාස්සර්වේ පාර්ථිවස්ය මුඛාච්ච්යුතම් ॥ 10 ॥
ඍෂ්යශෘංගපුරෝගාශ්ච ප්රත්යූචුර්නෘපතිං තදා ।
සංභාරාස්සංභ්රියංතාං තේ තුරගශ්ච විමුච්යතාම් ॥ 11 ॥
සර්වථා ප්රාප්ස්යසේ පුත්රාංශ්චත්වාරෝऽමිතවික්රමාන් ।
යස්ය තේ ධාර්මිකී බුද්ධිරියං පුත්රාර්ථමාගතා ॥ 12 ॥
තතඃ ප්රීතෝऽභවද්රාජා ශ්රුත්වා තද්විජභාෂිතම් ।
අමාත්යාංශ්චාබ්රවීද්රාජා හර්ෂේණේදං ශුභාක්ෂරම් ॥ 13 ॥
ගුරූණාං වචනාච්ඡීඝ්රං සංභාරාස්සංභ්රියංතු මේ ।
සමර්ථාධිෂ්ඨිතශ්චාශ්වස්සෝපාධ්යායෝ විමුච්යතාම් ॥ 14 ॥
සරය්වාශ්චෝත්තරේ තීරේ යජ්ඤභූමිර්විධීයතාම් ।
ශාංතයශ්චාභිවර්ධංතාං යථාකල්පං යථාවිධි ॥ 15 ॥
ශක්යඃ ප්රාප්තුමයං යජ්ඤස්සර්වේණාපි මහීක්ෂිතා ।
නාපරාධෝ භවේත්කෂ්ටෝ යද්යස්මින්ක්රතුසත්තමේ ॥ 16 ॥
ඡිද්රං හි මෘගයංතේऽත්ර විද්වාංසෝ බ්රහ්මරාක්ෂසාඃ ।
නිහතස්ය ච යජ්ඤස්ය සද්යඃ කර්තා විනශ්යති ॥ 17 ॥
තද්යථා විධිපූර්වං මේ ක්රතුරේෂ සමාප්යතේ ।
තථා විධානං ක්රියතාං සමර්ථාඃ කරණේෂ්විහ ॥ 18 ॥
තථේති ච තතස්සර්වේ මංත්රිණඃ ප්රත්යපූජයන් ।
පාර්ථිවේංද්රස්ය තද්වාක්යං යථාජ්ඤප්තමකුර්වත ॥ 19 ॥
තතෝ ද්විජාස්තේ ධර්මජ්ඤමස්තුවන්පාර්ථිවර්ෂභම් ।
අනුජ්ඤාතාස්තතස්සර්වේ පුනර්ජග්මුර්යථාගතම් ॥ 20 ॥
ගතේෂ්වථ ද්විජාග්ය්රේෂු මංත්රිණස්තාන්නරාධිපඃ ।
විසර්ජයිත්වා ස්වං වේශ්ම ප්රවිවේශ මහාද්යුතිඃ ॥ 21 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ද්වාදශස්සර්ගඃ ॥
