శ్రీమద్వాల్మీకీయ రామాయణే యుద్ధకాండమ్ ।
అథ సప్తచత్వారింశస్సర్గః ।
ప్రతిప్రవిష్టేలంకాయాంకృతార్థేరావణాత్మజే ।
రాఘవంపరివార్యార్తురక్షుర్వానరర్షభాః ॥ 1 ॥
హనుమానంగదోనీలఃసుషేణఃకుముదోనలః ।
గజోగవాక్షోగవయశ్శరభోగంధమాదనః ॥ 2 ॥
జాంబవానృషభఃసుందోరంభఃశతవలిఃపృథుః ।
వ్యూఢానీకాశ్చయత్తాశ్చద్రుమానాదాయసర్వతః ॥ 3 ॥
వీక్షమాణాదిశస్సర్వాస్తిర్యగూర్ధ్వంచవానరాః ।
తృణేష్వపిచచేష్టత్సురాక్షసాఇతిమేనిరే ॥ 4 ॥
రావణశ్చాపిసమ్హృష్టోవిసృజ్యేంద్రజితంసుతమ్ ।
అజుహావతతస్సీతాక్షిణీరాక్షసీస్తదా ॥ 5 ॥
రాక్షస్యస్త్రిజటాచైవశాసనాత్సముపస్థితాః ।
తాఉవాచతతోహృష్టోరాక్షసీరాక్షసాధమః ॥ 6 ॥
హతావింద్రజితాఖ్యాతవైదేహ్యారామలక్ష్మణౌ ।
పుష్పకంతత్సమారోప్యదర్శయధ్వంహతౌరణే ॥ 7 ॥
యదాశ్రయాదవష్టబ్ధామాముపతిష్ఠతి ।
సోఽస్యాభర్తాసహభ్రాత్రానిహతోరణమూర్ధని ॥ 8 ॥
నిర్విశంకానిరుద్విగ్నానిరపేక్షాచమైథిలీ ।
మాముపస్థాస్యతేసీతాసర్వాభరణభూషితా ॥ 9 ॥
అద్యకాలవశంప్రాప్తంరణేరామంసలక్ష్మణమ్ ।
అవేక్ష్యవినివృత్తాసాచాన్యాంగతిమపశ్యతీ ॥ 10 ॥
నిరపేక్షావిశాలాక్షీమాముపస్థాస్యతేస్వయమ్ ।
తస్యతద్వచనంశ్రుత్వారావణస్యదురాత్మనః ॥ 11 ॥
రాక్షస్యస్తాస్తథేత్యుక్త్వాజగ్ముర్వైయత్రపుష్పకమ్ ।
తతఃపుష్పకమాదాయరాక్షస్యోరావణాజ్ఞయా ॥ 12 ॥
అశోకవనికాస్థాంతాంమైథిలీంసముపానయన్ ।
తామాదాయతురాక్షస్యోభర్తృశోకపరాజితామ్ ॥ 13 ॥
సీతామారోపయామాసుర్విమానంపుష్పకంతదా ।
తతఃపుష్పకమారోప్యసీతాంత్రిజటయాసహ ॥ 14 ॥
జగ్ముర్దర్శయితుంతస్యైరాక్షస్యోరామలక్ష్మణౌ ।
రావణోఽకారయల్లంకాంపతాకాధ్వజమాలినీమ్ ॥ 15 ॥
ప్రాఘోషయతహృష్టశ్చలంకాయాంరాక్షసేశ్వరః ।
రాఘవోలక్ష్మణశ్చైవహతావింద్రజితారణే ॥ 16 ॥
విమానేనాపిగత్వాతుసీతాత్రిజటయాసహ ।
దదర్శవానరాణాంతుసర్వంసైన్యంనిపాతితమ్ ॥ 17 ॥
ప్రహృష్టమనసశ్చాపిదదర్శపిశితాశనాన్ ।
వానరాంశ్చాతిదుఃఖార్తాన్రామలక్ష్మణపార్శ్వతః ॥ 18 ॥
తతస్సీతాదదర్శోభౌశయానౌశరతల్పగౌ ।
లక్ష్మణంచాపిరామంచవిసంజ్ఞౌశరపీడితౌ ॥ 19 ॥
విధ్వస్తకవచౌవీరౌవిప్రవిద్ధశరాసనౌ ।
సాయకైచశిన్నసర్వాంగౌశరస్తంబమయౌక్షితౌ ॥ 20 ॥
తౌదృష్టవాభ్రాతరౌతత్రప్రవీరౌపురుషర్షభౌ ।
శయానౌపుండరీకాక్షౌకుమారావివపావకీ ॥ 21 ॥
శరతల్పగతౌవీరౌతథాభూతానరర్షభౌ ।
దుఃఖార్తాకరుణంసీతాసుభృశంవిలలాపహ ॥ 22 ॥
భర్తారమనవద్యాంగీలక్ష్మణంచాసితేక్షణా ।
ప్రేక్ష్యపాంసుషుచేష్టంతౌరురోదజనకాత్మజా ॥ 23 ॥
సబాష్పశోకాభిహతాసమీక్ష్యతౌభ్రాతరౌదేవసమప్రభావౌ ।
వితర్కయంతీనిధనంతయోస్సాదుఃఖాన్వితావాక్యమిదంజగాద ॥ 24 ॥
ఇత్యార్షే శ్రీమద్రామాయణే వాల్మీకీయ ఆదికావ్యే యుద్ధకాండే సప్తచత్వారింశస్సర్గః ॥
