శ్రీమద్వాల్మీకీయ రామాయణే బాలకాండమ్ ।
అథ షట్పంచాశస్సర్గః ।
ఏవముక్తో వసిష్ఠేన విశ్వామిత్రో మహాబలః ।
ఆగ్నేయమస్త్రముత్క్షిప్య తిష్ఠ తిష్ఠేతి చాబ్రవీత్ ॥ 1 ॥
బ్రహ్మదండం సముత్క్షిప్య కాలదండమివాఽపరమ్ ।
వసిష్ఠో భగవాన్ క్రోధాదిదం వచనమబ్రవీత్ ॥ 2 ॥
క్షత్రబంధో స్థితోస్మ్యేష యద్బలం తద్విదర్శయ ।
నాశయామ్యద్య తే దర్పం శస్త్రస్య తవ గాధిజ ॥ 3 ॥
క్వ చ తే క్షత్రియబలం క్వ చ బ్రహ్మబలం మహత్ ।
పశ్య బ్రహ్మబలం దివ్యం మమ క్షత్రియపాంసన ॥ 4 ॥
తస్యాస్త్రం గాధిపుత్రస్య ఘోరమాగ్నేయముద్యతమ్ ।
బ్రహ్మదండేన తచ్ఛాంతమగ్నేర్వేగ ఇవాంభసా ॥ 5 ॥
వారుణం చైవ రౌద్రం చ ఐంద్రం పాశుపతం తథా ।
ఐషీకం చాపి చిక్షేప కుపితో గాధినందనః ॥ 6 ॥
మానవం మోహనం చైవ గాంధర్వం స్వాపనం తథా ।
జృంభణం మాదనం చైవ సంతాపనవిలాపనే ॥ 7 ॥
శోషణం దారణం చైవ వజ్రమస్త్రం సుదుర్జయమ్ ।
బ్రహ్మపాశం కాలపాశం వారుణం పాశమేవ చ ॥ 8 ॥
పైనాకాస్త్రం చ దయితం శుష్కార్ద్రే అశనీ ఉభే ।
దండాస్త్రమథ పైశాచం క్రౌంచమస్త్రం తథైవ చ ॥ 9 ॥
ధర్మచక్రం కాలచక్రం విష్ణుచక్రం తథైవ చ ।
వాయవ్యం మథనం చైవ అస్త్రం హయశిరస్తథా ॥ 10 ॥
శక్తిద్వయం చ చిక్షేప కంకాలం ముసలం తథా ।
560 వైద్యాధరం మహాస్త్రం చ కాలాస్త్రమథ దారుణమ్ ॥ 11 ॥
త్రిశూలమస్త్రం ఘోరం చ కాపాలమథ కంకణమ్ ।
ఏతాన్యస్త్రాణి చిక్షేప సర్వాణి రఘునందన ॥ 12 ॥
వసిష్ఠే జపతాం శ్రేష్ఠే తదద్భుతమివాభవత్ ।
తాని సర్వాణి దండేన గ్రసతే బ్రహ్మణస్సుతః ॥ 13 ॥
తేషు శాంతేషు బ్రహ్మాస్త్రం క్షిప్తవాన్ గాధినందనః ।
తదస్త్రముద్యతం దృష్ట్వా దేవాస్సాగ్నిపురోగమాః ॥ 14 ॥
దేవర్షయశ్చ సంభ్రాంతాగంధర్వాస్సమహోరగాః ।
త్రైలోక్యమాసీత్సంతప్తం బ్రహ్మాస్త్రే సముదీరితే ॥ 15 ॥
తదప్యస్త్రం మహాఘోరం బ్రహ్మం బ్రాహ్మేణ తేజసా ।
వసిష్ఠో గ్రసతే సర్వం బ్రహ్మదండేన రాఘవ ॥ 16 ॥
బ్రహ్మాస్త్రం గ్రసమానస్య వసిష్ఠస్య మహాత్మనః ।
త్రైలోక్యమోహనం రౌద్రం రూపమాసీత్సుదారుణమ్ ॥ 17 ॥
రోమకూపేషు సర్వేషు వసిష్ఠస్య మహాత్మనః ।
మరీచ్య ఇవ నిష్పేతురగ్నేర్ధూమాకులార్చిషః ॥ 18 ॥
ప్రాజ్వలద్బ్రహ్మదండశ్చ వసిష్ఠస్య కరోద్యతః ।
విధూమ ఇవ కాలాగ్నిర్యమదండ ఇవాపరః ॥ 19 ॥
తతోఽస్తువన్ మునిగణా వసిష్ఠం జపతాం వరమ్ ।
అమోఘం తే బలం బ్రహ్మన్ తేజో ధారయ తేజసా ॥ 20 ॥
నిగృహీతస్త్వయా బ్రహ్మన్ విశ్వామిత్రో మహాతపాః ।
ప్రసీద జపతాం శ్రేష్ఠ లోకాస్సంతు గతవ్యథాః ॥ 21 ॥
ఏవముక్తో మహాతేజాశ్శమం చక్రే మహాతపాః ।
విశ్వామిత్రోఽపి నికృతో వినిశ్వస్యేదమబ్రవీత్ ॥ 22 ॥
ధిగ్బలం క్షత్రియబలం బ్రహ్మతేజో బలం బలమ్ ।
ఏకేన బ్రహ్మదండేన సర్వాస్త్రాణి హతాని మే ॥ 23 ॥
తదేతత్సమవేక్ష్యాహం ప్రసన్నేంద్రియమానసః ।
తపో మహత్సమాస్థాస్యే యద్వై బ్రహ్మత్వకారణమ్ ॥ 24 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే షట్పంచాశస్సర్గః ॥
