శ్రీమద్వాల్మీకీయ రామాయణే బాలకాండమ్ ।
అథ సప్తదశస్సర్గః ।
పుత్రత్వం తు గతే విష్ణౌ రాజ్ఞస్తస్య సుమహాత్మనః ।
ఉవాచ దేవతాస్సర్వాస్స్వయంభూర్భగవానిదమ్ ॥ 1 ॥
సత్యసంధస్య వీరస్య సర్వేషాన్నో హితైషిణః ।
విష్ణోస్సహాయాన్బలినస్సృజధ్వం కామరూపిణః ॥ 2 ॥
మాయావిదశ్చ శూరాంశ్చ వాయువేగసమాంజవే ।
నయజ్ఞాన్బుద్ధిసంపన్నాన్విష్ణుతుల్యపరాక్రమాన్ ॥ 3 ॥
అసంహార్యానుపాయజ్ఞాన్ దివ్యసంహననాన్వితాన్ ।
సర్వాస్త్రగుణసంపన్నానమృతప్రాశనానివ ॥ 4 ॥
అప్సరస్సు చ ముఖ్యాసు గంధర్వాణాం తనూషు చ ।
సృజధ్వం హరిరూపేణ పుత్రాంస్తుల్యపరాక్రమాన్ ॥ 5 ॥
పూర్వమేవ మయా సృష్టో జాంబవానృక్షపుంగవః ।
జృంభమాణస్య సహసా మమ వక్త్రాదజాయత ॥ 6 ॥
తే తథోక్తా భగవతా తత్ప్రతిశ్రుత్య శాసనమ్ ।
జనయామాసురేవం తే పుత్రాన్వానరరూపిణః ॥ 7 ॥
ఋషయశ్చ మహాత్మానస్సిద్ధవిద్యాధరోరగాః ।
చారణాశ్చ సుతాన్వీరాన్ససృజుర్వనచారిణః ॥ 8 ॥
వానరేంద్రం మహేంద్రాభమింద్రో వాలినమూర్జితమ్ ।
సుగ్రీవం జనయామాస తపనస్తపతాం వరః ॥ 9 ॥
బృహస్పతిస్త్వజనయత్తారం నామ మహాహరిమ్ ।
సర్వవానరముఖ్యానాం బుద్ధిమంతమనుత్తమమ్ ॥ 10 ॥
ధనదస్య సుతశ్శ్రీమాన్ వానరో గంధమాదనః ।
విశ్వకర్మాత్వజనయన్నలం నామ మహాహరిమ్ ॥ 11 ॥
పావకస్య సుతశ్శ్రీమాన్ నీలోఽగ్నిసదృశప్రభః ।
తేజసా యశసా వీర్యాదత్యరిచ్యత వానరాన్ ॥ 12 ॥
రూపద్రవిణసంపన్నావశ్వినౌ రూపసమ్మతౌ ।
మైందం చ ద్వివిదం చైవ జనయామాసతుస్స్వయమ్ ॥ 13 ॥
వరుణో జనయామాస సుషేణం వానరర్షభమ్ ।
శరభం జనయామాస పర్జన్యస్తు మహాబలమ్ ॥ 14 ॥
మారుతస్యాత్మజశ్శ్రీమాన్హనుమాన్నామ వీర్యవాన్ ।
వజ్రసంహననోపేతో వైనతేయసమో జవే ॥ 15 ॥
తే సృష్టా బహుసాహస్రా దశగ్రీవవధే రతాః ।
అప్రమేయబలా వీరా విక్రాంతాః కామరూపిణః ॥ 16 ॥
మేరుమందరసంకాశా వపుష్మంతో మహాబలాః ।
ఋక్షవానరగోపుచ్ఛాః క్షిప్రమేవాభిజజ్ఞిరే ॥ 17 ॥
యస్య దేవస్య యద్రూపం వేషో యశ్చ పరాక్రమః ।
అజాయత సమస్తేన తస్య తస్య సుతః పృథక్ ॥ 18 ॥
గోలాంగూలీషు చోత్పన్నాః కేచిత్సమ్మతవిక్రమాః ।
ఋక్షీషు చ తథా జాతా వానరాః కిన్నరీషు చ ॥ 19 ॥
దేవా మహర్షిగంధర్వాస్తార్క్ష్యా యక్షా యశస్వినః ।
నాగాః కింపురుషాశ్చైవ సిద్ధవిద్యాధరోరగాః ॥ 20 ॥
బహవో జనయామాసుర్హృష్టాస్తత్ర సహస్రశః ।
వానరాన్సుమహాకాయాన్సర్వాన్వై వనచారిణః ॥ 21 ॥
అప్సరస్సు చ ముఖ్యాసు తథా విద్యాధరీషు చ ।
నాగకన్యాసు చ తథా గంధర్వీణాం తనూషు చ ॥ 22 ॥
కామరూపబలోపేతా యథాకామం విచారిణః ।
సింహశార్దూలసదృశా దర్పేణ చ బలేన చ ॥ 23 ॥
శిలాప్రహరణాస్సర్వే సర్వే పాదపయోధినః ॥ 24 ॥
నఖదంష్ట్రాయుధాస్సర్వే సర్వే సర్వాస్త్రకోవిదాః ।
విచాలయేయుశ్శైలేంద్రాన్భేదయేయుస్స్థిరాంద్రుమాన్ ।
క్షోభయేయుశ్చ వేగేన సముద్రం సరితాం పతిమ్ ॥ 25 ॥
దారయేయుః క్షితిం పద్భ్యామాప్లవేయుర్మహార్ణవమ్ ।
నభఃస్థలం విశేయుశ్చ గృహ్ణీయురపి తోయదాన్ ॥ 26 ॥
గృహ్ణీయురపి మాతంగాన్మత్తాన్ప్రవ్రజతో వనే ।
నర్దమానాశ్చ నాదేన పాతయేయుర్విహంగమాన్ ॥ 27 ॥
ఈదృశానాం ప్రసూతాని హరీణాం కామరూపిణామ్ ।
శతం శతసహస్రాణి యూథపానాం మహాత్మనామ్ ॥ 28 ॥
తే ప్రధానేషు యూథేషు హరీణాం హరియూథపాః ।
బభూవుర్యూథపశ్రేష్ఠా వీరాంశ్చాజనయన్ హరీన్ ॥ 29 ॥
అన్యే ఋక్షవతః ప్రస్థానవతస్థు స్సహస్రశః ।
అన్యే నానావిధాన్శైలాన్భేజిరే కాననాని చ ॥ 30 ॥
సూర్యపుత్రం చ సుగ్రీవం శక్రపుత్రం చ వాలినమ్ ।
భ్రాతరావుపతస్థుస్తే సర్వ ఏవ హరీశ్వరాః ॥ 31 ॥
నలం నీలం హనూమంతమన్యాంశ్చ హరియూథపాన్ ।
3 తే తార్క్ష్యబలసంపన్నాస్సర్వే యుద్ధవిశారదాః ।
విచరంతోఽర్దయందర్పాత్సింహవ్యాఘ్రమహోరగాన్ ॥ 32 ॥
తాంశ్చ సర్వాన్మహాబాహుర్వాలీ విపులవిక్రమః ।
జుగోప భుజవీర్యేణ ఋక్షగోపుచ్ఛవానరాన్ ॥ 33 ॥
తైరియం పృథివీ శూరైస్సపర్వతవనార్ణవా ।
కీర్ణా వివిధసంస్థానైర్నానావ్యంజనలక్షణైః ॥ 34 ॥
తైర్మేఘబృందాచలకూటకల్పైః మహాబలైర్వానరయూథపాలైః ।
బభూవ భూర్భీమశరీరరూపై స్సమావృతా రామసహాయహేతోః ॥ 35 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే సప్తదశస్సర్గః ॥
