శ్రీమద్వాల్మీకీయ రామాయణే బాలకాండమ్ ।
అథ పంచదశస్సర్గః ।
మేథావీ తు తతో ధ్యాత్వా స కించిదిదముత్తరమ్ ।
లబ్ధసంజ్ఞస్తతస్తం తు వేదజ్ఞో నృపమబ్రవీత్ ॥ 1 ॥
ఇష్టిం తేఽహం కరిష్యామి పుత్రీయాం పుత్రకారణాత్ ।
అథర్వశిరసి ప్రోక్తైర్మంత్రైస్సిద్ధాం విధానతః ॥ 2 ॥
తతః ప్రాక్రమదిష్టిం తాం పుత్రీయాం పుత్రకారణాత్ ।
జుహావ చాగ్నౌ తేజస్వీ మంత్రదృష్టేన కర్మణా ॥ 3 ॥
తతో దేవాస్సగంధర్వాస్సిద్ధాశ్చ పరమర్షయః ।
భాగప్రతిగ్రహార్థం వై సమవేతా యథావిధి ॥ 4 ॥
తాస్సమేత్య యథాన్యాయం తస్మిన్సదసి దేవతాః ।
అబ్రువన్ లోకకర్తారం బ్రహ్మాణం వచనం మహత్ ॥ 5 ॥
భగవంత్వత్ప్రసాదేన రావణో నామ రాక్షసః ।
సర్వాన్నో బాధతే వీర్యాచ్ఛాసితుం తం న శక్నుమః ॥ 6 ॥
త్వయా తస్మై వరో దత్తః ప్రీతేన భగవన్పురా ।
మానయంతశ్చ తం నిత్యం సర్వం తస్య క్షమామహే ॥ 7 ॥
ఉద్వేజయతి లోకాన్స్తీనుచ్ఛ్రితాంద్వేష్టి దుర్మతిః ।
శక్రం త్రిదశరాజానం ప్రధర్షయితుమిచ్ఛతి ॥ 8 ॥
ఋషీన్యక్షాన్సగంధర్వానసురాన్బ్రాహ్మణాంస్తథా ।
అతిక్రామతి దుర్ధర్షో వరదానేన మోహితః ॥ 9 ॥
నైనం సూర్యః ప్రతపతి పార్శ్వే వాతి న మారుతః ।
చలోర్మిమాలీ తం దృష్ట్వా సముద్రోఽపి న కంపతే ॥ 10 ॥
తన్మహన్నో భయం తస్మాద్రాక్షసాద్ఘోరదర్శనాత్ ।
వధార్థం తస్య భగవన్నుపాయం కర్తుమర్హసి ॥ 11 ॥
ఏవముక్తస్సురైస్సర్వైశ్చింతయిత్వా తతోఽబ్రవీత్ ।
హంతాయం విదితస్తస్య వధోపాయో దురాత్మనః ॥ 12 ॥
తేన గంధర్వయక్షాణాం దేవదానవరక్షసామ్ ।
అవధ్యోఽస్మీతి వాగుక్తా తథేత్యుక్తం చ తన్మయా ॥ 13 ॥
నాకీర్తయదవజ్ఞానాత్తద్రక్షో మానుషాన్ ప్రతి ।
తస్మాత్స మానుషాద్వధ్యో మృత్యుర్నాన్యోఽస్య విద్యతే ॥ 14 ॥
ఏతచ్ఛ్రుత్వా ప్రియం వాక్యం బ్రహ్మణా సముదాహృతమ్ ।
సర్వే మహర్షయో దేవాః ప్రహృష్టాస్తేఽభవంస్తదా ॥ 15 ॥
ఏతస్మిన్నంతరే విష్ణురుపయాతో మహాద్యుతిః ।
శంఖచక్రగదాపాణిః పీతవాసా జగత్పతిః ॥ 16 ॥
బ్రహ్మణా చ సమాగమ్య తత్ర తస్థౌ సమాహితః ।
1 తమబ్రువన్సురాస్సర్వే సమభిష్టూయ సన్నతాః ॥ 17 ॥
త్వాన్నియోక్ష్యామహే విష్ణో లోకానాం హితకామ్యయా ।
1 రాజ్ఞో దశరథస్య త్వమయోధ్యాధిపతేః ప్రభోః ॥ 18 ॥
ధర్మజ్ఞస్య వదాన్యస్య మహర్షిసమతేజసః ।
18 తస్య భార్యాసు తిసృషు హ్రీశ్రీకీర్త్యుపమాసు చ ॥ 19 ॥
విష్ణో పుత్రత్వమాగచ్ఛ కృత్వాఽఽత్మానం చతుర్విధమ్ ।
1 తత్ర త్వం మానుషో భూత్వా ప్రవృద్ధం లోకకంటకమ్ ।
అవధ్యం దైవతైర్విష్ణో సమరే జహి రావణమ్ ॥ 20 ॥
స హి దేవాంశ్చ గంధర్వాన్సిద్ధాంశ్చ మునిసత్తమాన్ ।
రాక్షసో రావణో మూర్ఖో వీర్యోత్సేకేన బాధతే ॥ 21 ॥
ఋషయశ్చ తతస్తేన గంధర్వాప్సరసస్తథా ।
క్రీడంతో నందనవనే క్రూరేణ కిల హింసితాః ॥ 22 ॥
వధార్థం వయమాయాతాస్తస్య వై మునిభిస్సహ ।
సిద్ధగంధర్వయక్షాశ్చ తతస్త్వాం శరణం గతాః ॥ 23 ॥
త్వం గతిః పరమా దేవ సర్వేషాం నః పరంతపః ।
వధాయ దేవశత్రూణాం నృణాం లోకే మనః కురు ॥ 24 ॥
ఏవముక్తస్తు దేవేశో విష్ణుస్త్రిదశపుంగవః ।
పితామహపురోగాంస్తాన్సర్వలోకనమస్కృతః ॥ 25 ॥
అబ్రవీత్త్రిదశాన్సర్వాన్సమేతాంధర్మసంహితాన్ ॥ 26 ॥
భయం త్యజత భద్రం వో హితార్థం యుధి రావణమ్ ।
సపుత్రపౌత్రం సామాత్యం సమిత్రజ్ఞాతిబాంధవమ్ ॥ 27 ॥
హత్వా క్రూరం దురాత్మానం దేవర్షీణాం భయావహమ్ ।
దశవర్షసహస్రాణి దశవర్షశతాని చ ।
వత్స్యామి మానుషే లోకే పాలయన్పృథివీమిమామ్ ॥ 28 ॥
ఏవం దత్వా వరం దేవో దేవానాం విష్ణురాత్మవాన్ ।
మానుషే చింతయామాస జన్మభూమిమథాత్మనః ॥ 29 ॥
తతః పద్మపలాశాక్షః కృత్వాఽఽత్మానం చతుర్విధమ్ ।
పితరం రోచయామాస తథా దశరథన్నృపమ్ ॥ 30 ॥
తదా దేవర్షి గంధర్వాస్సరుద్రాస్సాప్సరోగణాః ।
స్తుతిభిర్దివ్యరూపాభిస్తుష్టువుర్మధుసూదనమ్ ॥ 31 ॥
తముద్ధతం రావణముగ్రతేజసం ప్రవృద్ధదర్పం త్రిదశేశ్వరద్విషమ్ ।
విరావణం సాధుతపస్వికంటకం తపస్వినాముద్ధర తం భయావహమ్ ॥ 32 ॥
తమేవ హత్వా సబలం సబాంధవం విరావణం రావణమగ్య్రపౌరుషమ్ ।
స్వర్లోకమాగచ్ఛ గతజ్వరశ్చిరం సురేంద్రగుప్తం గతదోషకల్మషమ్ ॥ 33 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే పంచదశస్సర్గః ॥
