శ్రీమద్వాల్మీకీయ రామాయణే సుందరకాండమ్ ।
అథ త్రయోవింశస్సర్గః ।
ఇత్యుక్త్వా మైథిలీం రాజా రావణః శత్రురావణః ।
సందిశ్య చ తతః సర్వా రాక్షసీర్నిర్జగామ హ ॥ 1 ॥
నిష్క్రాంతే రాక్షసేంద్రే తు పునరంతఃపురం గతే ।
రాక్షస్యో భీమరూపాస్తాః సీతాం సమభిదుద్రువుః ॥ 2 ॥
తతః సీతాముపాగమ్య రాక్షస్యః క్రోధమూర్ఛితాః ।
పరం పరుషయా వాచా వైదేహీమిదమబ్రువన్ ॥ 3 ॥
పౌలస్త్యస్య వరిష్ఠస్య రావణస్య మహాత్మనః ।
దశగ్రీవస్య భార్యా త్వం సీతే న బహుమన్యసే ॥ 4 ॥
తతస్త్వేకజటా నామ రాక్షసీ వాక్యమబ్రవీత్ ।
ఆమంత్య్ర క్రోధాతామ్రాక్షీ సీతాం కరతలోదరీమ్ ॥ 5 ॥
ప్రజాపతీనాం షణ్ణాం తు చతుర్థో యః ప్రజాపతిః ।
మానసో బ్రహ్మణః పుత్రః పులస్త్య ఇతి విశ్రుతః ॥ 6 ॥
పులస్త్యస్య తు తేజస్వీ మహర్షిర్మానసః సుతః ।
నామ్నా స విశ్రవా నామ ప్రజాపతిసమప్రభః ॥ 7 ॥
తస్య పుత్రో విశాలాక్షి రావణః శత్రురావణః ।
తస్య త్వం రాక్షసేంద్రస్య భార్యా భవితుమర్హసి ॥ 8 ॥
మయోక్తం చారుసర్వాంగిః వాక్యం కిం నానుమన్యసే ।
తతో హరిజటా నామ రాక్షసీ వాక్యమబ్రవీత్ ॥ 9 ॥
వివర్త్య నయనే కోపాన్మార్జారసదృశేక్షణా ।
యేన దేవాస్త్రయస్త్రింశద్దేవరాజశ్చ నిర్జితాః ॥ 10 ॥
తస్య త్వం రాక్షసేంద్రస్య భార్యా భవితుమర్హసి ।
తతస్తు ప్రఘసా నామ రాక్షసీ క్రోధమూర్ఛితా ॥ 11 ॥
భర్త్సయంతీ తదా ఘోరమిదం వచనమబ్రవీత్ ।
వీర్యోత్సిక్తస్య శూరస్య సంగ్రామేషు నివర్తినః ॥ 12 ॥
బలినో వీర్యయుక్తస్య భార్యాత్వం కిం న లప్స్యసే ।
ప్రియాం బహుమతాం భార్యాం త్యక్త్వా రాజా మహాబలః ॥ 13 ॥
సర్వాసాం చ మహాభాగాం త్వాముపైష్యతి రావణః ।
సమృద్ధం స్త్రీసహస్రేణ నానారత్నోపశోభితమ్ ॥ 14 ॥
అంతఃపురం సముత్సృజ్య త్వాముపైష్యతి రావణః ।
అన్యా తు వికటా నామ రాక్షసీ వాక్యమబ్రవీత్ ॥ 15 ॥
అసకృద్దేవతా యుద్ధే నాగగంధర్వదానవాః ।
నిర్జితాః సమరే యేన స తే పార్శ్వముపాగతః ॥ 16 ॥
తస్య సర్వసమృద్ధస్య రావణస్య మహాత్మనః ।
కిమద్య రాక్షసేంద్రస్య భార్యాత్వం నేచ్ఛసేఽధమే ॥ 17 ॥
తతస్తు దుర్ముఖీ నామ రాక్షసీ వాక్యమబ్రవీత్ ।
యస్య సూర్యో న తపతి భీతో యస్య చ మారుతః ॥ 18 ॥
న వాతి స్మాయతాపాంగే కిం త్వం తస్య న తిష్ఠసి ।
పుష్పవృష్టిం చ తరవో ముముచుర్యస్య వై భయాత్ ॥ 19 ॥
శైలాశ్చ సుభ్రు పానీయం జలదాశ్చ యదేచ్ఛతి ।
తస్య నైరృతరాజస్య రాజరాజస్య భామిని ॥ 20 ॥
కిం త్వం న కురుషే బుద్ధిం భార్యార్థే రావణస్య హి ।
సాధు తే తత్త్వతో దేవి కథితం సాధు భామిని ॥ 21 ॥
ఇత్యార్షే శ్రీమద్రామాయణే వాల్మీకీయ ఆదికావ్యే సుందరకాండే త్రయోవింశస్సర్గః ॥
