శ్రీమద్వాల్మీకీయ రామాయణే బాలకాండమ్ ।
అథ షష్ఠస్సర్గః ।
. తస్యాం పుర్యామయోధ్యాయాం వేదవిత్సర్వసంగ్రహః ।
దీర్ఘదర్శీ మహాతేజాః పౌరజానపదప్రియః ॥ 1 ॥
ఇక్ష్వాకూణామతిరథో యజ్వా ధర్మరతో వశీ ।
మహర్షికల్పో రాజర్షిస్త్రిషు లోకేషు విశ్రుతః ॥ 2 ॥
బలవాన్నిహతామిత్రో మిత్రవాన్విజితేంద్రియః ।
ధనైశ్చ సంగ్రహైశ్చాన్యైశ్శక్రవైశ్రవణోపమః ॥ 3 ॥
యథా మనుర్మహాతేజా లోకస్య పరిరక్షితా ।
తథా దశరథో రాజా వసంజగదపాలయత్ ॥ 4 ॥
తేన సత్యాభిసంధేన త్రివర్గమనుతిష్ఠతా ।
పాలితా సా పురీ శ్రేష్ఠా ఇంద్రేణేవామరావతీ ॥ 5 ॥
తస్మిన్పురవరే హృష్టా ధర్మాత్మానో బహుశ్రుతాః ।
నరాస్తుష్టా ధనైస్స్వైస్స్వైరలుబ్ధాస్సత్యవాదినః ॥ 6 ॥
నాల్పసన్నిచయః కశ్చిదాసీత్తస్మిన్ పురోత్తమే ।
కుటుంబీ యో హ్యసిద్ధార్థోఽగవాశ్వధనధాన్యవాన్ ॥ 7 ॥
కామీ వా న కదర్యో వా నృశంసః పురుషః క్వచిత్ ।
ద్రష్టుం శక్యమయోధ్యాయాన్నావిద్వాన్న చ నాస్తికః ॥ 8 ॥
సర్వే నరాశ్చ నార్యశ్చ ధర్మశీలాస్సుసంయతాః ।
ఉదితాశ్శీలవృత్తాభ్యాం మహర్షయ ఇవామలాః ॥ 9 ॥
నాకుండలీ నామకుటీ నాస్రగ్వీ నాల్పభోగవాన్ ।
నామృష్టో నానులిప్తాంగో నాసుగంధశ్చ విద్యతే ॥ 10 ॥
నామృష్టభోజీ నాదాతా నాప్యనంగదనిష్కధృక్ ।
నాహస్తాభరణో వాఽపి దృశ్యతే నాప్యనాత్మవాన్ ॥ 11 ॥
నానాహితాగ్నిర్నాయజ్వా న క్షుద్రో వా న తస్కరః ।
కశ్చిదాసీదయోధ్యాయాన్న చ నిర్వృత్తసంకరః ॥ 12 ॥
స్వకర్మనిరతా నిత్యం బ్రాహ్మణా విజితేంద్రియాః ।
దానాధ్యయనశీలాశ్చ సంయతాశ్చ పరిగ్రహే ॥ 13 ॥
న నాస్తికో నానృతకో న కశ్చిదబహుశ్రుతః ।
నాసూయకో న చాఽశక్తో నావిద్వాన్విద్యతే తదా ॥ 14 ॥
నాషడంగవిదత్రాసీన్నావ్రతో నాసహస్రదః ।
న దీనః క్షిప్తచిత్తో వా వ్యథితో వాఽపి కశ్చన ॥ 15 ॥
కశ్చిన్నరో వా నారీ వా నాశ్రీమాన్నాప్యరూపవాన్ ।
ద్రష్టుం శక్యమయోధ్యాయాం నాపి రాజన్యభక్తిమాన్ ॥ 16 ॥
వర్ణేష్వగ్ర్యచతుర్థేషు దేవతాతిథిపూజకాః ।
కృతజ్ఞాశ్చ వదాన్యాశ్చ శూరా విక్రమసంయుతాః ॥ 17 ॥
దీర్ఘాయుషో నరాస్సర్వే ధర్మం సత్యం చ సంశ్రితాః ।
సహితాః పుత్రపౌత్రైశ్చ నిత్యం స్త్రీభిః పురోత్తమే ॥ 18 ॥
క్షత్రం బ్రహ్మముఖం చాసీద్వైశ్యాః క్షత్రమనువ్రతాః ।
శూద్రాస్స్వధర్మనిరతాస్త్రీన్వర్ణానుపచారిణః ॥ 19 ॥
సా తేనేక్ష్వాకునాథేన పురీ సుపరిరక్షితా ।
యథా పురస్తాన్మనునా మానవేంద్రేణ ధీమతా ॥ 20 ॥
యోధానామగ్నికల్పానాం పేశలానామమర్షిణామ్ ।
సంపూర్ణా కృతవిద్యానాం గుహా కేసరిణామివ ॥ 21 ॥
కాంభోజవిషయే జాతైర్బాహ్లీకైశ్చ హయోత్తమైః ।
వనాయుజైర్నదీజైశ్చ పూర్ణా హరిహయోత్తమైః ॥ 22 ॥
వింధ్యపర్వతజైర్మత్తైః పూర్ణా హైమవతైరపి ।
మదాన్వితైరతిబలైర్మాతంగైః పర్వతోపమైః ॥ 23 ॥
ఐరావతకులీనైశ్చ మహాపద్మకులైస్తథా ।
అంజనాదపి నిష్పన్నైర్వామనాదపి చ ద్విపైః ॥ 24 ॥
భద్రైర్మంద్రైర్మృగైశ్చైవ భద్రమంద్రమృగైస్తథా ।
భద్రమంద్రైర్భద్రమృగైర్మృగమంద్రైశ్చ సా పురీ ।
నిత్యమత్తైస్సదా పూర్ణా నాగైరచలసన్నిభైః ॥ 25 ॥
సా యోజనే చ ద్వే భూయః సత్యనామా ప్రకాశతే ।
యస్యాం దశరథో రాజా వసన్ జగదపాలయత్ ॥ 26 ॥
తాం పురీం స మహాతేజా రాజా దశరథో మహాన్ ।
శశాస శమితామిత్రో నక్షత్రాణీవ చంద్రమాః ॥ 27 ॥
తాం సత్యనామాం దృఢతోరణార్గలాం గృహైర్విచిత్రైరుపశోభితాం శివామ్ ।
పురీమయోధ్యాం నృసహస్రసంకులాం శశాస వై శక్రసమో మహీపతిః ॥ 28 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే షష్ఠస్సర్గః ॥
