శ్రీమద్వాల్మీకీయ రామాయణే బాలకాండమ్ ।
అథ ద్విపంచాశస్సర్గః ।
స దృష్ట్వా పరమప్రీతో విశ్వామిత్రో మహాబలః ।
ప్రణతో వినయాద్వీరో వసిష్ఠం జపతాం వరమ్ ॥ 1 ॥
స్వాగతం తవ చేత్యుక్తో వసిష్ఠేన మహాత్మనా ।
ఆసనం చాస్య భగవాన్ వసిష్ఠో వ్యాదిదేశ హ ॥ 2 ॥
ఉపవిష్టాయ చ తదా విశ్వామిత్రాయ ధీమతే ।
యథాన్యాయం మునివరః ఫలమూలముపాహరత్ ॥ 3 ॥
ప్రతిగృహ్య తు తాం పూజాం వసిష్ఠాద్రాజసత్తమః ।
తపోగ్నిహోత్రశిష్యేషు కుశలం పర్యపృచ్ఛత ॥ 4 ॥
విశ్వామిత్రో మహాతేజా వనస్పతిగణే తథా ।
సర్వత్ర కుశలం చాహ వసిష్ఠో రాజసత్తమమ్ ॥ 5 ॥
సుఖోపవిష్టం రాజానం విశ్వామిత్రం మహాతపాః ।
పప్రచ్ఛ జపతాం శ్రేష్ఠో వసిష్ఠో బ్రహ్మణస్సుతః ॥ 6 ॥
కచ్చిత్తే కుశలం రాజన్ కచ్చిద్ధర్మేణ రంజయన్ ।
ప్రజాః పాలయసే వీర రాజవృత్తేన ధార్మిక ॥ 7 ॥
కచ్చిత్తే సంభృతా భృత్యాః కచ్చిత్తిష్ఠంతి శాసనే ।
కచ్చిత్తే విజితాస్సర్వే రిపవో రిపుసూదన ॥ 8 ॥
కచ్చిద్బలేషు కోశేషు మిత్రేషు చ పరంతప ।
కుశలం తే నరవ్యాఘ్ర పుత్రపౌత్రే తవానఘ ॥ 9 ॥
సర్వత్ర కుశలం రాజా వసిష్ఠం ప్రత్యుదాహరత్ ।
విశ్వామిత్రో మహాతేజా వసిష్ఠం వినయాన్వితః ॥ 10 ॥
కృత్వోభౌ సుచిరం కాలం ధర్మిష్ఠౌ తాః కథాః శుభాః ।
ముదా పరమయా యుక్తౌ ప్రీయేతాం తౌ పరస్పరమ్ ॥ 11 ॥
తతో వసిష్ఠో భగవాన్ కథాఽంతే రఘునందన ।
విశ్వామిత్రమిదం వాక్యమువాచ ప్రహసన్నివ ॥ 12 ॥
ఆతిథ్యం కర్తుమిచ్ఛామి బలస్యాస్య మహాబల ।
తవ చైవాప్రమేయస్య యథార్హం సంప్రతీచ్ఛ మే ॥ 13 ॥
సత్క్రియాం తు భవానేతాం ప్రతీచ్ఛతు మయోద్యతామ్ ।
రాజా త్వమతిథిశ్రేష్ఠః పూజనీయః ప్రయత్నతః ॥ 14 ॥
ఏవముక్తో వసిష్ఠేన విశ్వామిత్రో మహామతిః ।
కృతమిత్యబ్రవీద్రాజా ప్రియవాక్యేన మే త్వయా ॥ 15 ॥
ఫలమూలేన భగవన్ విద్యతే యత్తవాశ్రమే ।
పాద్యేనాచమనీయేన భగవద్దర్శనేన చ ॥ 16 ॥
సర్వథా చ మహాప్రాజ్ఞ పూజార్హేణ సుపూజితః ।
గమిష్యామి నమస్తేఽస్తు మైత్రేణేక్షస్వ చక్షుషా ॥ 17 ॥
ఏవం బ్రువంతం రాజానం వసిష్ఠఃపునరేవ హి ।
న్యమంత్రయత ధర్మాత్మా పునఃపునరుదారధీః ॥ 18 ॥
బాఢమిత్యేవ గాధేయో వసిష్ఠం ప్రత్యువాచ హ ।
యథా ప్రియం భగవతస్తథాఽస్తు మునిపుంగవ ॥ 19 ॥
ఏవముక్తో మహాతేజా వసిష్ఠో జపతాం వరః ।
ఆజుహావ తతః ప్రీతః కల్మాషీం ధూతకల్మషః ॥ 20 ॥
ఏహ్యేహి శబలే క్షిప్రం శ్రృణు చాపి వచో మమ ।
సబలస్యాస్య రాజర్షేఃకర్తుం వ్యవసితోఽస్మ్యహమ్ ॥ 21 ॥
భోజనేన మహార్హేణ సత్కారం సంవిధత్స్వ మే ।
యస్య యస్య యథాకామం షడ్రసేష్వభిపూజితమ్ ।
తత్సర్వం కామధుక్క్షిప్రమభివర్ష కృతే మమ ॥ 22 ॥
రసేనాన్నేన పానేన లేహ్యచోష్యేణ సంయుతమ్ ।
అన్నానాం నిచయం సర్వం సృజస్వ శబలే త్వర ॥ 23 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే ద్విపంచాశస్సర్గః ॥
