శ్రీమద్వాల్మీకీయ రామాయణే సుందరకాండమ్ ।
అథ చతుశ్చత్వారింశస్సర్గః ।
సందిష్టో రాక్షసేంద్రేణ ప్రహస్తస్య సుతో బలీ ।
జంబుమాలీ మహాదంష్ట్రో నిర్జగామ ధనుర్ధరః ॥ 1 ॥
రక్తమాల్యాంబరధరస్స్రగ్వీ రుచిరకుండలః ।
మహాన్వివృత్తనయనశ్చండస్సమరదుర్జయః ॥ 2 ॥
ధనుశ్శక్రధనుః ప్రఖ్యం మహద్రుచిరసాయకమ్ ।
విష్ఫారయాణో వేగేన వజ్రాశనిసమస్వనమ్ ॥ 3 ॥
తస్య విష్ఫారఘోషేణ ధనుషో మహతా దిశః ।
ప్రదిశశ్చ నభశ్చైవ సహసా సమపూర్యత ॥ 4 ॥
రథేన ఖరయుక్తేన తమాగతముదీక్ష్య సః ।
హనుమాన్వేగసంపన్నో జహర్ష చ ననాద చ ॥ 5 ॥
తం తోరణవిటంకస్థం హనుమంతం మహాకపిమ్ ।
జంబుమాలీ మహాబాహుర్వివ్యాధ నిశితైశ్శరైః ॥ 6 ॥
అర్ధచంద్రేణ వదనే శిరస్యేకేన కర్ణినా ।
బాహ్వోర్వివ్యాధ నారాచైర్దశభిస్తం కపీశ్వరమ్ ॥ 7 ॥
తస్య తచ్ఛుశుభే తామ్రం శరేణాభిహతం ముఖమ్ ।
శరదీవాంబుజం ఫుల్లం విద్ధం భాస్కరరశ్మినా ॥ 8 ॥
తత్తస్య రక్తం రక్తేన రంజితం శుశుభే ముఖమ్ ।
యథాకాశే మహాపద్మం సిక్తం చందనబిందుభిః ॥ 9 ॥
చుకోప బాణాభిహతో రాక్షసస్య మహాకపిః ।
తతః పార్శ్వేఽతివిపులాం దదర్శ మహతీం శిలామ్ ॥ 10 ॥
తరసా తాం సముత్పాట్య చిక్షేప బలవద్భలీ ।
తాం శరైర్దశభిః క్రుద్ధస్తాడయామాస రాక్షసః ॥ 11 ॥
విపన్నం కర్మ తద్దృష్ట్వా హనుమాంశ్చండవిక్రమః ।
సాలం విపులముత్పాట్య భ్రామయామాస వీర్యవాన్ ॥ 12 ॥
భ్రామయంతం కపిం దృష్ట్వా సాలవృక్షం మహాబలమ్ ।
చిక్షేప సుబహూన్బాణాన్జంబుమాలీ మహాబలః ॥ 13 ॥
సాలం చతుర్భిశ్చిచ్ఛేద వానరం పంచభిర్భుజే ।
ఉరస్యేకేన బాణేన దశభిస్తు స్తనాంతరే ॥ 14 ॥
స శరైః పూరితతనుః క్రోధేన మహతా వృతః ।
తమేవ పరిఘం గృహ్య భ్రామయామాస వేగితః ॥ 15 ॥
అతివేగోఽతివేగేన భ్రామయిత్వా బలోత్కటః ।
పరిఘం పాతయామాస జంబుమాలేర్మహోరసి ॥ 16 ॥
తస్య చైవ శిరో నాస్తి న బాహూ న చ జానునీ ।
న ధనుర్న రథో నాశ్వాస్తత్రాదృశ్యంత నేషవః ॥ 17 ॥
స హతస్సహసా తేన జంబుమాలీ మహాబలః ।
పపాత నిహతో భూమౌ చూర్ణితాంగవిభూషణః ॥ 18 ॥
జంబుమాలిం చ నిహతం కింకరాంశ్చ మహాబలాన్ ।
చుక్రోధ రావణశ్శుత్వా కోపసంరక్తలోచనః ॥ 19 ॥
స రోషసంవర్తితతామ్రలోచనః ప్రహస్తపుత్త్రే నిహతే మహాబలే ।
అమాత్యపుత్త్రానతివీర్యవిక్రమాన్ సమాదిదేశాశు నిశాచరేశ్వరః ॥ 20 ॥
ఇత్యార్షే శ్రీమద్రామాయణే వాల్మీకీయ ఆదికావ్యే సుందరకాండే చతుశ్చత్వారింశస్సర్గః ॥
