ശ്രീമദ്വാല്മീകീയ രാമായണേ ബാലകാംഡമ് ।
അഥ ദ്വാദശസ്സര്ഗഃ ।
തതഃ കാലേ ബഹുതിഥേ കസ്മിംശ്ചിത്സുമനോഹരേ ।
വസംതേ സമനുപ്രാപ്തേ രാജ്ഞോ യഷ്ടും മനോഽഭവത് ॥ 1 ॥
തതഃ പ്രസാദ്യ ശിരസാ തം വിപ്രം ദേവവര്ണിനമ് ।
യജ്ഞായ വരയാമാസ സംതാനാര്ഥം കുലസ്യ വൈ ॥ 2 ॥
തഥേതി ച സ രാജാനമുവാച ച സുസത്കൃതഃ ।
സംഭാരാ സംഭ്രിയംതാം തേ തുരഗശ്ച വിമുച്യതാമ് ॥ 3 ॥
തതോ രാജാഽബ്രവീദ്വാക്യം സുമംത്രം മംത്രിസത്തമമ് ।
സുമംത്രാവാഹയ ക്ഷിപ്രം ഋത്വിജോ ബ്രഹ്മവാദിനഃ ॥ 4 ॥
സുയജ്ഞം വാമദേവം ച ജാബാലിമഥ കാശ്യപമ് ।
പുരോഹിതം വസിഷ്ഠം ച യേ ചാന്യേ ദ്വിജസത്തമാഃ ॥ 5 ॥
തതസ്സുമംത്രസ്ത്വരിതം ഗത്വാ ത്വരിതവിക്രമഃ ।
സമാനയത്സ താന്വിപ്രാന് സമസ്താന്വേദപാരഗാന് ॥ 6 ॥
താന്പൂജയിത്വാ ധര്മാത്മാ രാജാ ദശരഥസ്തദാ ।
ധര്മാര്ഥസഹിതം യുക്തം ശ്ലക്ഷ്ണം വചനമബ്രവീത് ॥ 7 ॥
മമ ലാലപ്യമാനസ്യ പുത്രാര്ഥം നാസ്തി വൈ സുഖമ് ।
തദര്ഥം ഹയമേധേന യക്ഷ്യാമീതി മതിര്മമ ॥ 8 ॥
തദഹം യഷ്ടുമിച്ഛാമി ശാസ്ത്രദൃഷ്ടേന കര്മണാ ।
ഋഷിപുത്രപ്രഭാവേന കാമാന്പ്രാപ്സ്യാമി ചാപ്യഹമ് ॥ 9 ॥
തതസ്സാധ്വിതി തദ്വാക്യം ബ്രാഹ്മണാഃ പ്രത്യപൂജയന് ।
വസിഷ്ഠപ്രമുഖാസ്സർവേ പാര്ഥിവസ്യ മുഖാച്ച്യുതമ് ॥ 10 ॥
ഋഷ്യശൃംഗപുരോഗാശ്ച പ്രത്യൂചുര്നൃപതിം തദാ ।
സംഭാരാസ്സംഭ്രിയംതാം തേ തുരഗശ്ച വിമുച്യതാമ് ॥ 11 ॥
സർവഥാ പ്രാപ്സ്യസേ പുത്രാംശ്ചത്വാരോഽമിതവിക്രമാന് ।
യസ്യ തേ ധാര്മികീ ബുദ്ധിരിയം പുത്രാര്ഥമാഗതാ ॥ 12 ॥
തതഃ പ്രീതോഽഭവദ്രാജാ ശ്രുത്വാ തദ്വിജഭാഷിതമ് ।
അമാത്യാംശ്ചാബ്രവീദ്രാജാ ഹര്ഷേണേദം ശുഭാക്ഷരമ് ॥ 13 ॥
ഗുരൂണാം വചനാച്ഛീഘ്രം സംഭാരാസ്സംഭ്രിയംതു മേ ।
സമര്ഥാധിഷ്ഠിതശ്ചാശ്വസ്സോപാധ്യായോ വിമുച്യതാമ് ॥ 14 ॥
സരയ്വാശ്ചോത്തരേ തീരേ യജ്ഞഭൂമിർവിധീയതാമ് ।
ശാംതയശ്ചാഭിവര്ധംതാം യഥാകല്പം യഥാവിധി ॥ 15 ॥
ശക്യഃ പ്രാപ്തുമയം യജ്ഞസ്സർവേണാപി മഹീക്ഷിതാ ।
നാപരാധോ ഭവേത്കഷ്ടോ യദ്യസ്മിന്ക്രതുസത്തമേ ॥ 16 ॥
ഛിദ്രം ഹി മൃഗയംതേഽത്ര വിദ്വാംസോ ബ്രഹ്മരാക്ഷസാഃ ।
നിഹതസ്യ ച യജ്ഞസ്യ സദ്യഃ കര്താ വിനശ്യതി ॥ 17 ॥
തദ്യഥാ വിധിപൂർവം മേ ക്രതുരേഷ സമാപ്യതേ ।
തഥാ വിധാനം ക്രിയതാം സമര്ഥാഃ കരണേഷ്വിഹ ॥ 18 ॥
തഥേതി ച തതസ്സർവേ മംത്രിണഃ പ്രത്യപൂജയന് ।
പാര്ഥിവേംദ്രസ്യ തദ്വാക്യം യഥാജ്ഞപ്തമകുർവത ॥ 19 ॥
തതോ ദ്വിജാസ്തേ ധര്മജ്ഞമസ്തുവന്പാര്ഥിവര്ഷഭമ് ।
അനുജ്ഞാതാസ്തതസ്സർവേ പുനര്ജഗ്മുര്യഥാഗതമ് ॥ 20 ॥
ഗതേഷ്വഥ ദ്വിജാഗ്യ്രേഷു മംത്രിണസ്താന്നരാധിപഃ ।
വിസര്ജയിത്വാ സ്വം വേശ്മ പ്രവിവേശ മഹാദ്യുതിഃ ॥ 21 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ദ്വാദശസ്സര്ഗഃ ॥
