శ్రీమద్వాల్మీకీయ రామాయణే సుందరకాండమ్ ।
అథ పంచాశస్సర్గః ।
తముద్వీక్ష్య మహాబాహుః పింగాక్షం పురత స్థితమ్ ।
కోపేన మహతాఽవిష్టో రావణో లోకరావణః ॥ 1 ॥
శంకాహృతాత్మా దధ్యౌ స కపీంద్రం తేజసావృతమ్ ।
కిమేష భగవాన్నందీ భవేత్సాక్షాదిహాగతః ॥ 2 ॥
యేన శప్తోఽస్మి కైలాసే మయా సంచాలితే పురా ।
సోఽయం వానరమూర్తిస్స్యాత్కింస్విద్బాణో మహాఽసురః ॥ 3 ॥
స రాజా రోషతామ్రాక్షః ప్రహస్తం మంత్రిసత్తమమ్ ।
కాలయుక్తమువాచేదం వచోఽవిపులమర్థవత్ ॥ 4 ॥
దురాత్మా పృచ్ఛ్యతామేష కుతః కిం వాత్ర కారణమ్ ।
వనభంగే చ కోఽస్యార్థో రాక్షసీనాం చ తర్జనే ॥ 5 ॥
మత్పురీమప్రధృష్యాం వాఽగమనే కిం ప్రయోజనమ్ ।
ఆయోధనే వా కిం కార్యం పృచ్ఛయతామేష దుర్మతిః ॥ 6 ॥
రావణస్య వచశ్శ్రుత్వా ప్రహస్తో వాక్యమబ్రవీత్ ।
సమాశ్వసిహి భద్రం తే న భీః కార్యా త్వయా కపే ॥ 7 ॥
యది తావత్త్వమింద్రేణ ప్రేషితో రావణాలయమ్ ।
తత్త్వమాఖ్యాహి మా భూత్తే భయం వానర మోక్ష్యసే ॥ 8 ॥
యది వైశ్రవణస్య త్వం యమస్య వరుణస్య చ ।
చారరూపమిదం కృత్వా ప్రవిష్టో నః పురీమిమామ్ ॥ 9 ॥
విష్ణునా ప్రేషితో వాఽపి దూతో విజయకాంక్షిణా ।
న హి తే వానరం తేజో రూపమాత్రం తు వానరమ్ ॥ 10 ॥
తత్త్వతః కథయస్వాద్య తతో వానర మోక్ష్యసే ।
అనృతం వదతశ్చాపి దుర్లభం తవ జీవితమ్ ॥ 11 ॥
అథవా యన్నిమిత్తస్తే ప్రవేశో రావణాలయే ।
ఏవముక్తో హరిశ్రేష్ఠస్తదా రక్షోగణేశ్వరమ్ ॥ 12 ॥
అబ్రవీన్నాస్మి శక్రస్య యమస్య వరుణస్య వా ।
ధనదేన న మే సఖ్యం విష్ణునా నాస్మి చోదితః ॥ 13 ॥
జాతిరేవ మమ త్వేషా వానరోఽహమిహాగతః ।
దర్శనే రాక్షసేంద్రస్య దుర్లభే తదిదం మయా ॥ 14 ॥
వనం రాక్షసరాజస్య దర్శనార్థే వినాశితమ్ ।
తతస్తే రాక్షసాః ప్రాప్తా బలినో యుద్ధకాంక్షిణః ।
రక్షణార్థం తు దేహస్య ప్రతియుద్ధా మయా రణే ॥ 15 ॥
అస్త్రపాశైర్న శక్యోఽహం బద్ధుం దేవాసురైరపి ॥ 16 ॥
పితామహాదేష వరో మామాప్యేషోఽభ్యుపాగతః ।
రాజానం ద్రష్టుకామేన మయాస్త్రమనువర్తితమ్ ॥ 17 ॥
విముక్తో హ్యహమస్త్రేణ రాక్షసైస్త్వభిపీడితః ।
కేనచిద్రాజకార్యేణ సంప్రాప్తోఽస్మి తవాంతికమ్ ॥ 18 ॥
దూతోఽహమితి విజ్ఞేయో రాఘవస్యామితౌజసః ।
శ్రూయతాం చాపి వచనం మమ పథ్యమిదం ప్రభో ॥ 19 ॥
ఇత్యార్షే శ్రీమద్రామాయణే వాల్మీకీయ ఆదికావ్యే సుందరకాండే పంచాశస్సర్గః ॥
