ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଦ୍ଵାଦଶସ୍ସର୍ଗଃ ।
ତତଃ କାଲେ ବହୁତିଥେ କସ୍ମିଂଶ୍ଚିତ୍ସୁମନୋହରେ ।
ଵସଂତେ ସମନୁପ୍ରାପ୍ତେ ରାଜ୍ଞୋ ୟଷ୍ଟୁଂ ମନୋଽଭଵତ୍ ॥ 1 ॥
ତତଃ ପ୍ରସାଦ୍ୟ ଶିରସା ତଂ ଵିପ୍ରଂ ଦେଵଵର୍ଣିନମ୍ ।
ୟଜ୍ଞାୟ ଵରୟାମାସ ସଂତାନାର୍ଥଂ କୁଲସ୍ୟ ଵୈ ॥ 2 ॥
ତଥେତି ଚ ସ ରାଜାନମୁଵାଚ ଚ ସୁସତ୍କୃତଃ ।
ସଂଭାରା ସଂଭ୍ରିୟଂତାଂ ତେ ତୁରଗଶ୍ଚ ଵିମୁଚ୍ୟତାମ୍ ॥ 3 ॥
ତତୋ ରାଜାଽବ୍ରଵୀଦ୍ଵାକ୍ୟଂ ସୁମଂତ୍ରଂ ମଂତ୍ରିସତ୍ତମମ୍ ।
ସୁମଂତ୍ରାଵାହୟ କ୍ଷିପ୍ରଂ ଋତ୍ଵିଜୋ ବ୍ରହ୍ମଵାଦିନଃ ॥ 4 ॥
ସୁୟଜ୍ଞଂ ଵାମଦେଵଂ ଚ ଜାବାଲିମଥ କାଶ୍ୟପମ୍ ।
ପୁରୋହିତଂ ଵସିଷ୍ଠଂ ଚ ୟେ ଚାନ୍ୟେ ଦ୍ଵିଜସତ୍ତମାଃ ॥ 5 ॥
ତତସ୍ସୁମଂତ୍ରସ୍ତ୍ଵରିତଂ ଗତ୍ଵା ତ୍ଵରିତଵିକ୍ରମଃ ।
ସମାନୟତ୍ସ ତାନ୍ଵିପ୍ରାନ୍ ସମସ୍ତାନ୍ଵେଦପାରଗାନ୍ ॥ 6 ॥
ତାନ୍ପୂଜୟିତ୍ଵା ଧର୍ମାତ୍ମା ରାଜା ଦଶରଥସ୍ତଦା ।
ଧର୍ମାର୍ଥସହିତଂ ୟୁକ୍ତଂ ଶ୍ଲକ୍ଷ୍ଣଂ ଵଚନମବ୍ରଵୀତ୍ ॥ 7 ॥
ମମ ଲାଲପ୍ୟମାନସ୍ୟ ପୁତ୍ରାର୍ଥଂ ନାସ୍ତି ଵୈ ସୁଖମ୍ ।
ତଦର୍ଥଂ ହୟମେଧେନ ୟକ୍ଷ୍ୟାମୀତି ମତିର୍ମମ ॥ 8 ॥
ତଦହଂ ୟଷ୍ଟୁମିଚ୍ଛାମି ଶାସ୍ତ୍ରଦୃଷ୍ଟେନ କର୍ମଣା ।
ଋଷିପୁତ୍ରପ୍ରଭାଵେନ କାମାନ୍ପ୍ରାପ୍ସ୍ୟାମି ଚାପ୍ୟହମ୍ ॥ 9 ॥
ତତସ୍ସାଧ୍ଵିତି ତଦ୍ଵାକ୍ୟଂ ବ୍ରାହ୍ମଣାଃ ପ୍ରତ୍ୟପୂଜୟନ୍ ।
ଵସିଷ୍ଠପ୍ରମୁଖାସ୍ସର୍ଵେ ପାର୍ଥିଵସ୍ୟ ମୁଖାଚ୍ଚ୍ୟୁତମ୍ ॥ 10 ॥
ଋଷ୍ୟଶୃଂଗପୁରୋଗାଶ୍ଚ ପ୍ରତ୍ୟୂଚୁର୍ନୃପତିଂ ତଦା ।
ସଂଭାରାସ୍ସଂଭ୍ରିୟଂତାଂ ତେ ତୁରଗଶ୍ଚ ଵିମୁଚ୍ୟତାମ୍ ॥ 11 ॥
ସର୍ଵଥା ପ୍ରାପ୍ସ୍ୟସେ ପୁତ୍ରାଂଶ୍ଚତ୍ଵାରୋଽମିତଵିକ୍ରମାନ୍ ।
ୟସ୍ୟ ତେ ଧାର୍ମିକୀ ବୁଦ୍ଧିରିୟଂ ପୁତ୍ରାର୍ଥମାଗତା ॥ 12 ॥
ତତଃ ପ୍ରୀତୋଽଭଵଦ୍ରାଜା ଶ୍ରୁତ୍ଵା ତଦ୍ଵିଜଭାଷିତମ୍ ।
ଅମାତ୍ୟାଂଶ୍ଚାବ୍ରଵୀଦ୍ରାଜା ହର୍ଷେଣେଦଂ ଶୁଭାକ୍ଷରମ୍ ॥ 13 ॥
ଗୁରୂଣାଂ ଵଚନାଚ୍ଛୀଘ୍ରଂ ସଂଭାରାସ୍ସଂଭ୍ରିୟଂତୁ ମେ ।
ସମର୍ଥାଧିଷ୍ଠିତଶ୍ଚାଶ୍ଵସ୍ସୋପାଧ୍ୟାୟୋ ଵିମୁଚ୍ୟତାମ୍ ॥ 14 ॥
ସରୟ୍ଵାଶ୍ଚୋତ୍ତରେ ତୀରେ ୟଜ୍ଞଭୂମିର୍ଵିଧୀୟତାମ୍ ।
ଶାଂତୟଶ୍ଚାଭିଵର୍ଧଂତାଂ ୟଥାକଲ୍ପଂ ୟଥାଵିଧି ॥ 15 ॥
ଶକ୍ୟଃ ପ୍ରାପ୍ତୁମୟଂ ୟଜ୍ଞସ୍ସର୍ଵେଣାପି ମହୀକ୍ଷିତା ।
ନାପରାଧୋ ଭଵେତ୍କଷ୍ଟୋ ୟଦ୍ୟସ୍ମିନ୍କ୍ରତୁସତ୍ତମେ ॥ 16 ॥
ଛିଦ୍ରଂ ହି ମୃଗୟଂତେଽତ୍ର ଵିଦ୍ଵାଂସୋ ବ୍ରହ୍ମରାକ୍ଷସାଃ ।
ନିହତସ୍ୟ ଚ ୟଜ୍ଞସ୍ୟ ସଦ୍ୟଃ କର୍ତା ଵିନଶ୍ୟତି ॥ 17 ॥
ତଦ୍ୟଥା ଵିଧିପୂର୍ଵଂ ମେ କ୍ରତୁରେଷ ସମାପ୍ୟତେ ।
ତଥା ଵିଧାନଂ କ୍ରିୟତାଂ ସମର୍ଥାଃ କରଣେଷ୍ଵିହ ॥ 18 ॥
ତଥେତି ଚ ତତସ୍ସର୍ଵେ ମଂତ୍ରିଣଃ ପ୍ରତ୍ୟପୂଜୟନ୍ ।
ପାର୍ଥିଵେଂଦ୍ରସ୍ୟ ତଦ୍ଵାକ୍ୟଂ ୟଥାଜ୍ଞପ୍ତମକୁର୍ଵତ ॥ 19 ॥
ତତୋ ଦ୍ଵିଜାସ୍ତେ ଧର୍ମଜ୍ଞମସ୍ତୁଵନ୍ପାର୍ଥିଵର୍ଷଭମ୍ ।
ଅନୁଜ୍ଞାତାସ୍ତତସ୍ସର୍ଵେ ପୁନର୍ଜଗ୍ମୁର୍ୟଥାଗତମ୍ ॥ 20 ॥
ଗତେଷ୍ଵଥ ଦ୍ଵିଜାଗ୍ୟ୍ରେଷୁ ମଂତ୍ରିଣସ୍ତାନ୍ନରାଧିପଃ ।
ଵିସର୍ଜୟିତ୍ଵା ସ୍ଵଂ ଵେଶ୍ମ ପ୍ରଵିଵେଶ ମହାଦ୍ୟୁତିଃ ॥ 21 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଦ୍ଵାଦଶସ୍ସର୍ଗଃ ॥
