శ్రీమద్వాల్మీకీయ రామాయణే బాలకాండమ్ ।
అథ ఏకచత్వారింశస్సర్గః ।
పుత్రాంశ్చిరగతాన్ జ్ఞాత్వా సగరో రఘునందన ।
నప్తారమబ్రవీద్రాజా దీప్యమానం స్వతేజసా ॥ 1 ॥
శూరశ్చ కృతవిద్యశ్చ పూర్వైస్తుల్యోఽసి తేజసా ।
పితృణాం గతిమన్విచ్ఛ యేన చాశ్వోఽపవాహితః ॥ 2 ॥
అంతర్భౌమాని సత్త్వాని వీర్యవంతి మహాంతి చ ।
తేషాం త్వం ప్రతిఘాతార్థం సాస్త్రం గృహ్ణీష్వ కార్ముకమ్ ॥ 3 ॥
అభివాద్యాభివాద్యాంస్త్వం హత్వా విఘ్నకరానపి ।
సిద్ధార్థస్సన్నివర్తస్వ మమ యజ్ఞస్య పారగః ॥ 4 ॥
ఏవముక్తోంఽశుమాన్సమ్యక్ సగరేణ మహాత్మనా ।
ధనురాదాయ ఖడ్గం చ జగామ లఘువిక్రమః ॥ 5 ॥
స ఖాతం పితృభిర్మార్గమంతర్భౌమం మహాత్మభిః ।
ప్రాపద్యత నరశ్రేష్ఠ తేన రాజ్ఞాఽభిచోదితః ॥ 6 ॥
దైత్యదానవరక్షోభిః పిశాచపతగోరగైః ।
పూజ్యమానం మహాతేజా దిశాగజమపశ్యత ॥ 7 ॥
స తం ప్రదక్షిణం కృత్వా పృష్ట్వా చాపి నిరామయమ్ ।
పితృన్ స పరిపప్రచ్ఛ వాజిహర్తారమేవ చ ॥ 8 ॥
దిశాగజస్తు తచ్ఛ్రుత్వా ప్రత్యాహాంశుమతో వచః ।
ఆసమంజ కృతార్థస్త్వం సహాశ్వశ్శీఘ్రమేష్యసి ॥ 9 ॥
తస్య తద్వచనం శ్రుత్వా సర్వానేవ దిశాగజాన్ ।
యథాక్రమం యథాన్యాయం ప్రష్టుం సముపచక్రమే ॥ 10 ॥
తైశ్చ సర్వైర్దిశాపాలైర్వాక్యజ్ఞైర్వాక్యకోవిదైః ।
పూజితస్సహయశ్చైవ గంతాఽసీత్యభిచోదితః ॥ 11 ॥
తేషాం తద్వచనం శ్రుత్వా జగామ లఘువిక్రమః ।
భస్మరాశీకృతా యత్ర పితరస్తస్య సాగరాః ॥ 12 ॥
స దుఃఖవశమాపన్నస్త్వసమంజసుతస్తదా ।
చుక్రోశ పరమార్తస్తు వధాత్తేషాం సుదుఃఖితః ॥ 13 ॥
యజ్ఞీయం చ హయం తత్ర చరంతమవిదూరతః ।
దదర్శ పురుషవ్యాఘ్రో దుఃఖశోకసమన్వితః ॥ 14 ॥
స తేషాం రాజపుత్రాణాం కర్తుకామో జలక్రియామ్ ।
సలిలార్థీ మహాతేజా న చాపశ్యజ్జలాశయమ్ ॥ 15 ॥
విసార్య నిపుణాం దృష్టిం తతోఽపశ్యత్ఖగాధిపమ్ ।
పితృణాం మాతులం రామ సుపర్ణమనిలోపమమ్ ॥ 16 ॥
స చైవమబ్రవీద్వాక్యం వైనతేయో మహాబల ః ।
మా శుచః పురుషవ్యాఘ్ర వధోఽయం లోకసమ్మతః ॥ 17 ॥
కపిలేనాప్రమేయేన దగ్ధా హీమే మహాబలాః ।
సలిలం నార్హసి ప్రాజ్ఞ దాతుమేషాం హి లౌకికమ్ ॥ 18 ॥
గంగా హిమవతో జ్యేష్ఠా దుహితా పురుషర్షభ ।
తస్యాం కురు మహాబాహో పితృణాం తు జలక్రియామ్ ॥ 19 ॥
భస్మరాశీకృతానేతాన్ ప్లావయేల్లోకపావనీ ।
తయా క్లిన్నమిదం భస్మ గంగయా లోకకాంతయా ॥ 20 ॥
షష్టిం పుత్రసహస్రాణి స్వర్గలోకం చ నేష్యతి ।
గచ్ఛ చాశ్వం మహాభాగ తం గృహ్య పురుషర్షభ ॥ 21 ॥
యజ్ఞం పైతామహం వీర సంవర్తయితుమర్హసి ।
సుపర్ణవచనం శ్రుత్వా సోంఽశుమానతివీర్యవాన్ ॥ 22 ॥
త్వరితం హయమాదాయ పునరాయాన్మహాయశాః ।
తతో రాజానమాసాద్య దీక్షితం రఘునందన ॥ 23 ॥
న్యవేదయద్యథావృత్తం సుపర్ణవచనం తథా ।
తచ్ఛ్రుత్వా ఘోరసంకాశం వాక్యమంశుమతో నృపః ॥ 24 ॥
యజ్ఞం నివర్తయామాస యథాకల్పం యథావిధి ।
స్వపురం చాగమచ్ఛ్రీమానిష్టయజ్ఞోమహీపతిః ॥ 25 ॥
గంగాయాశ్చాగమే రాజా నిశ్చయం నాధ్యగచ్ఛత ।
అకృత్వా నిశ్చయం రాజా కాలేన మహతా మహాన్ ।
త్రింశద్వర్షసహస్రాణి రాజ్యం కృత్వా దివం గతః ॥ 26 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే ఏకచత్వారింశస్సర్గః ॥
