శ్రీమద్వాల్మీకీయ రామాయణే సుందరకాండమ్ ।
అథ త్రిచత్వారింశస్సర్గః ।
తతస్స కింకరాన్హత్వా హనుమాంధ్యానమాస్థితః ।
వనం భగ్నం మయా చైత్యప్రాసాదో న వినాశితః ॥ 1 ॥
తస్మాత్ప్రాసాదమప్యేవం భీమం విధ్వంసయామ్యహమ్ ।
ఇతి సంచింత్య మనసా హనుమాందర్శయన్బలమ్ ॥ 2 ॥
చైత్యప్రాసాదమాప్లుత్య మేరుశృంగమివోన్నతమ్ ।
ఆరురోహ కపిశ్రేష్ఠో హనుమాన్మారుతాత్మజః ॥ 3 ॥
ఆరుహ్య గిరిసంకాశం ప్రాసాదం హరియూథపః ।
బభౌ స సుమహాతేజాః ప్రతిసూర్య ఇవోదితః ॥ 4 ॥
సంప్రధృష్య చ దుర్ధర్షం చైత్యప్రాసాదముత్తమమ్ ।
హనుమాన్ప్రజ్వలన్లక్ష్మ్యా పారియాత్రోపమోఽభవత్ ॥ 5 ॥
స భూత్వా సుమహాకాయః ప్రభావాన్మారుతాత్మజః ।
ధృష్టమాస్ఫోటయామాస లంకాం శబ్దేన పూరయన్ ॥ 6 ॥
తస్యాస్ఫోటితశబ్దేన మహతా శ్రోత్రఘాతినా ।
పేతుర్విహంగమాస్తత్ర చైత్యపాలాశ్చ మోహితాః ॥ 7 ॥
అస్త్రవిజ్జయతాం రామో లక్ష్మణశ్చ మహాబలః ।
రాజా జయతి సుగ్రీవో రాఘవేణాభిపాలితః ॥ 8 ॥
దాసోఽహం కోసలేంద్రస్య రామస్యాక్లిష్టకర్మణః ।
హనుమాన్శత్రుసైన్యానాం నిహంతా మారుతాత్మజః ॥ 9 ॥
న రావణసహస్రం మే యుద్ధే ప్రతిబలం భవేత్ ।
శిలాభిస్తు ప్రహరతః పాదపైశ్చ సహస్రశః ॥ 10 ॥
అర్దయిత్వా పురీం లంకామభివాద్య చ మైథిలీమ్ ।
సమృద్ధార్థో గమిష్యామి మిషతాం సర్వరక్షసామ్ ॥ 11 ॥
ఏవముక్త్వా విమానస్థశ్చైత్యస్థాన్హరియూథపః ।
ననాద భీమనిర్హ్రాదో రక్షసాం జనయన్భయమ్ ॥ 12 ॥
తేన శబ్దేన మహతా చైత్యపాలాశ్శతం యయుః ।
గృహీత్వా వివిధానస్త్రాన్ప్రాసాన్ఖంగాన్పరశ్వథాన్ ॥ 13 ॥
విసృజంతో మహాకాయా మారుతిం పర్యవారయన్ ।
తే గదాభిర్విచిత్రాభిః పరిఘైః కాంచనాంగదైః ।
ఆజఘ్నుర్వానరశ్రేష్ఠం బాణైశ్చాదిత్యసన్నిభైః ॥ 14 ॥
ఆవర్త ఇవ గంగాయాస్తోయస్య విపులో మహాన్ ।
పరిక్షిప్య హరిశ్రేష్ఠం స బభౌ రక్షసాం గణః ॥ 15 ॥
తతో వాతాత్మజః క్రుద్ధో భీమ రూపం సమాస్థితః ॥ 16 ॥
ప్రాసాదస్య మహంతస్య స్తంబం హేమపరిష్కృతమ్ ।
ఉత్పాటయిత్వా వేగేన హనుమాన్పవనాత్మజః ॥ 17 ॥
తతస్తం భ్రామయామాస శతధారం మహాబలః ।
తత్ర చాగ్నిస్సమభవత్ప్రాసాదశ్చాప్యదహ్యత ॥ 18 ॥
దహ్యమానం తతో దృష్ట్వా ప్రాసాదం హరియూథపః ।
స రాక్షసశతం హత్త్వా వజ్రేణేంద్ర ఇవాసురాన్ ॥ 19 ॥
అంతరిక్షే స్థితశ్శ్తీమానిదం వచనమబ్రవీత్ ।
మాదృశానాం సహస్రాణి విసృష్టాని మహాత్మనామ్ ॥ 20 ॥
బలినాం వానరేంద్రాణాం సుగ్రీవవశవర్తినామ్ ।
అటంతి వసుధాం కృత్స్నాం వయమన్యే చ వానరాః ॥ 21 ॥
దశనాగబలాః కేచిత్కేచిద్దశగుణోత్తరాః ।
కేచిన్నాగసహస్రస్య బభూవుస్తుల్యవిక్రమాః ॥ 22 ॥
సంతి చౌఘబలాః కేచిత్కేచిద్వాయుబలోపమాః ।
అప్రమేయబలాశ్చాన్యే తత్రాసన్హరియూథపాః ॥ 23 ॥
ఈదృగ్విధైస్తు హరిభిర్వృతో దంతనఖాయుధైః ।
శతైశ్శతసహస్రైశ్చ కోటీభిరయుతైరపి ॥ 24 ॥
ఆగమిష్యతి సుగ్రీవః సర్వేషాం వో నిషూదనః ।
నేయమస్తి పురీ లంకా న యూయం న చ రావణః ॥ 25 ॥
ఇత్యార్షే శ్రీమద్రామాయణే వాల్మీకీయ ఆదికావ్యే సుందరకాండే త్రిచత్వారింశస్సర్గః ॥
