శ్రీమద్వాల్మీకీయ రామాయణే బాలకాండమ్ ।
అథ వింశస్సర్గః ।
తచ్ఛ్రుత్వా రాజశార్దూలో విశ్వామిత్రస్య భాషితమ్ ।
ముహూర్తమివ నిస్సంజ్ఞస్సంజ్ఞావానిదమబ్రవీత్ ॥ 1 ॥
ఊనషోడశవర్షో మే రామో రాజీవలోచనః ।
న యుద్ధయోగ్యతామస్య పశ్యామి సహ రాక్షసైః ॥ 2 ॥
ఇయమక్షౌహిణీ పూర్ణా యస్యాహం పతిరీశ్వరః ।
అనయా సంవృతో గత్వా యోద్ధాఽహం తైర్నిశాచరైః ॥ 3 ॥
ఇమే శూరాశ్చ విక్రాంతా భృత్యా మేఽస్త్రవిశారదాః ।
యోగ్యా రక్షోగణైర్యోద్ధుం న రామం నేతుమర్హసి ॥ 4 ॥
అహమేవ ధనుష్పాణిర్గోప్తా సమరమూర్ధని ।
యావత్ప్రాణాంధరిష్యామి తావద్యోత్స్యే నిశాచరైః ॥ 5 ॥
నిర్విఘ్నా వ్రతచర్యా సా భవిష్యతి సురక్షితా ।
అహం తత్రాగమిష్యామి న రామం నేతుమర్హసి ॥ 6 ॥
బాలో హ్యకృతవిద్యశ్చ న చ వేత్తి బలాబలమ్ ।
న చాస్త్రబలసంయుక్తో న చ యుద్ధవిశారదః ॥ 7 ॥
న చాసౌ రక్షసాం యోగ్యః కూటయుద్ధా హి తే ధ్రువమ్ ।
విప్రయుక్తో హి రామేణ ముహూర్తమపి నోత్సహే ॥ 8 ॥
జీవితుం మునిశార్దూల న రామం నేతుమర్హసి ।
యది వా రాఘవం బ్రహ్మన్నేతుమిచ్ఛసి సువ్రత ॥ 9 ॥
చతురంగసమాయుక్తం మయా చ సహితం నయ ।
షష్టిర్వర్షసహస్రాణి జాతస్య మమ కౌశిక ॥ 10 ॥
దుఃఖేనోత్పాదితశ్చాయం న రామం నేతుమర్హసి ।
చతుర్ణామాత్మజానాం హి ప్రీతిఃపరమికా మమ ॥ 11 ॥
జ్యేష్ఠం ధర్మప్రధానం చ న రామం నేతుమర్హసి ।
కింవీర్యా రాక్షసాస్తే చ కస్య పుత్రాశ్చ తే చ కే ॥ 12 ॥
కథం ప్రమాణాః కే చైతాన్రక్షంతి మునిపుంగవ ।
కథం చ ప్రతికర్తవ్యం తేషాం రామేణ రక్షసామ్ ॥ 13 ॥
మామకైర్వా బలైర్బ్రహ్మన్మయా వా కూటయోధినామ్ ।
3 సర్వం మే శంస భగవన్కథం తేషాం మయా రణే ॥ 14 ॥
స్థాతవ్యం దుష్టభావానాం వీర్యోత్సిక్తా హి రాక్షసాః ।
4 తస్య తద్వచనం శ్రుత్వా విశ్వామిత్రోఽభ్యభాషత ॥ 15 ॥
పౌలస్త్యవంశప్రభవో రావణో నామ రాక్షసః ।
స బ్రహ్మణా దత్తవరస్త్రైలోక్యం బాధతే భృశమ్ ॥ 16 ॥
మహాబలో మహావీర్యో రాక్షసైర్బహుభిర్వృతః ।
శ్రూయతే హి మహావీర్యో రావణో రాక్షసాధిపః ॥ 17 ॥
సాక్షాద్వైశ్రవణభ్రాతా పుత్రో విశ్రవసో మునేః ।
యదా స్వయం న యజ్ఞస్య విఘ్నకర్తా మహాబలః ॥ 18 ॥
తేన సంచోదితౌ ద్వౌ తు రాక్షసౌ వై మహాబలౌ ।
మారీచశ్చ సుబాహుశ్చ యజ్ఞవిఘ్నం కరిష్యతః ॥ 19 ॥
ఇత్యుక్తో మునినా తేన రాజోవాచ మునిం తదా ।
న హి శక్తోఽస్మి సంగ్రామే స్థాతుం తస్య దురాత్మనః ॥ 20 ॥
స త్వం ప్రసాదం ధర్మజ్ఞ కురుష్వ మమ పుత్రకే ।
మమ చైవాల్పభాగ్యస్య దైవతం హి భవాన్గురుః ॥ 21 ॥
దేవదానవగంధర్వా యక్షాఃపతగపన్నగాః ।
న శక్తా రావణం సోఢుం కిం పునర్మానవా యుధి ॥ 22 ॥
స హి వీర్యవతాం వీర్యమాదత్తే యుధి రాక్షసః ।
తేన చాహం న శక్తోఽస్మి సంయోద్ధుం తస్య వా బలైః ॥ 23 ॥
సబలో వా మునిశ్రేష్ఠ సహితో వా మమాత్మజైః ।
కథమప్యమరప్రఖ్యం సంగ్రామాణామకోవిదమ్ ।
బాలం మే తనయం బ్రహ్మన్ నైవ దాస్యామి పుత్రకమ్ ॥ 24 ॥
అథ కాలోపమౌ యుధ్దే సుతౌ సుందోపసుందయోః ॥ 25 ॥
యజ్ఞవిఘ్నకరౌ తౌ తే నైవ దాస్యామి పుత్రకమ్ ।
మారీచశ్చ సుబాహుశ్చ వీర్యవంతౌ సుశిక్షితౌ ।
తయోరన్యతరేణాహం యోధ్దా స్యాం ససుహృద్గణః ॥ 26 ॥
ఇతి నరపతిజల్పనాద్ద్విజేంద్రం కుశికసుతం సుమహాన్వివేశ మన్యుః ।
సుహుత ఇవ మఖేఽగ్నిరాజ్యసిక్త స్సమభవదుజ్జ్వలితో మహర్షివహ్నిః ॥ 27 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే వింశస్సర్గః ॥
