śrīmadvālmīkīya rāmāyaṇē bālakāṇḍam ।
atha dvādaśassargaḥ ।
tataḥ kālē bahutithē kasmiṃśchitsumanōharē ।
vasantē samanuprāptē rājñō yaṣṭuṃ manō'bhavat ॥ 1 ॥
tataḥ prasādya śirasā taṃ vipraṃ dēvavarṇinam ।
yajñāya varayāmāsa santānārthaṃ kulasya vai ॥ 2 ॥
tathēti cha sa rājānamuvācha cha susatkṛtaḥ ।
sambhārā sambhriyantāṃ tē turagaścha vimuchyatām ॥ 3 ॥
tatō rājā'bravīdvākyaṃ sumantraṃ mantrisattamam ।
sumantrāvāhaya kṣipraṃ ṛtvijō brahmavādinaḥ ॥ 4 ॥
suyajñaṃ vāmadēvaṃ cha jābālimatha kāśyapam ।
purōhitaṃ vasiṣṭhaṃ cha yē chānyē dvijasattamāḥ ॥ 5 ॥
tatassumantrastvaritaṃ gatvā tvaritavikramaḥ ।
samānayatsa tānviprān samastānvēdapāragān ॥ 6 ॥
tānpūjayitvā dharmātmā rājā daśarathastadā ।
dharmārthasahitaṃ yuktaṃ ślakṣṇaṃ vachanamabravīt ॥ 7 ॥
mama lālapyamānasya putrārthaṃ nāsti vai sukham ।
tadarthaṃ hayamēdhēna yakṣyāmīti matirmama ॥ 8 ॥
tadahaṃ yaṣṭumichChāmi śāstradṛṣṭēna karmaṇā ।
ṛṣiputraprabhāvēna kāmānprāpsyāmi chāpyaham ॥ 9 ॥
tatassādhviti tadvākyaṃ brāhmaṇāḥ pratyapūjayan ।
vasiṣṭhapramukhāssarvē pārthivasya mukhāchchyutam ॥ 10 ॥
ṛṣyaśṛṅgapurōgāścha pratyūchurnṛpatiṃ tadā ।
sambhārāssambhriyantāṃ tē turagaścha vimuchyatām ॥ 11 ॥
sarvathā prāpsyasē putrāṃśchatvārō'mitavikramān ।
yasya tē dhārmikī buddhiriyaṃ putrārthamāgatā ॥ 12 ॥
tataḥ prītō'bhavadrājā śrutvā tadvijabhāṣitam ।
amātyāṃśchābravīdrājā harṣēṇēdaṃ śubhākṣaram ॥ 13 ॥
gurūṇāṃ vachanāchChīghraṃ sambhārāssambhriyantu mē ।
samarthādhiṣṭhitaśchāśvassōpādhyāyō vimuchyatām ॥ 14 ॥
sarayvāśchōttarē tīrē yajñabhūmirvidhīyatām ।
śāntayaśchābhivardhantāṃ yathākalpaṃ yathāvidhi ॥ 15 ॥
śakyaḥ prāptumayaṃ yajñassarvēṇāpi mahīkṣitā ।
nāparādhō bhavētkaṣṭō yadyasminkratusattamē ॥ 16 ॥
Chidraṃ hi mṛgayantē'tra vidvāṃsō brahmarākṣasāḥ ।
nihatasya cha yajñasya sadyaḥ kartā vinaśyati ॥ 17 ॥
tadyathā vidhipūrvaṃ mē kraturēṣa samāpyatē ।
tathā vidhānaṃ kriyatāṃ samarthāḥ karaṇēṣviha ॥ 18 ॥
tathēti cha tatassarvē mantriṇaḥ pratyapūjayan ।
pārthivēndrasya tadvākyaṃ yathājñaptamakurvata ॥ 19 ॥
tatō dvijāstē dharmajñamastuvanpārthivarṣabham ।
anujñātāstatassarvē punarjagmuryathāgatam ॥ 20 ॥
gatēṣvatha dvijāgyrēṣu mantriṇastānnarādhipaḥ ।
visarjayitvā svaṃ vēśma pravivēśa mahādyutiḥ ॥ 21 ॥
ityārṣē śrīmadrāmāyaṇē vālmīkīya ādikāvyē bālakāṇḍē dvādaśassargaḥ ॥
